Arọndẹ ọghe ẹghẹ hia nọ rre odẹ ukpo 23 ya sẹ 65 ẹre u khin ra? Ọmwa nẹi rherhe khuọnmwi ẹre u khin ra, u vbe muegbe ne u ya ga vbe ehe na rhirhi gie ruẹ gha rrie ra? Adeghẹ erriọ nọ, u gha sẹtin rhiegbe ye Owebe Ọghe Etẹn Ni Kporhu Iyẹn Nọ Maan Ọghe Arriọba ra? Ẹi re avbiẹ ọdọ vbe amwẹ, etẹn nikpia kevbe etẹn nikhuo ni ma he ru orọnmwẹ, ẹre ọ he rhiegbe ye owebe na. Vbọrhirhighayehẹ, ma wa ye gualọ etẹn nikpia ni ma he ru orọnmwẹ vbe owebe na. Rinmwian e Jehova nọ ru iyobọ nuẹn ya sẹtin gha ru emwi nọ ya ẹko rhiẹnrhiẹn ọnrẹn kevbe ne u gha ya egbe taa Ovbi ẹre. (Psm 40:8; Mat 20:28; Hib 10:7) Iyeke ọni, u ghi hia ne u ru afiwerriẹ eso vbe nọ dekaẹn iwinna ne u ru, iwinna nọ bi yọ ruẹ izabọ vbuwe ẹgbẹe kevbe osa nọ rrọọ ruẹ urhu, ne u mieke na sẹtin yo owebe na.

De ẹkpotọ nọ kie ne etẹn na ya rhiegbe ye iwinna ugamwẹ sayọ vbe iran gha ladian nẹ vbe owebe na? Otu gie eso vbuwe etẹn na yo eke ne a na zẹ urhuẹvbo ọvbehe ra eke ne a na ru iwinna ikporhu ne kpataki vbe ehe ne emwa bi la. Vbene ẹghẹ ya khian, eso ghi vbe do gha ga zẹvbe ọyobọ ọghe ọgbaroghe ọghe otako ra ọgbaroghe ọghe otako ra arọndẹ na gie yo isi. Zẹvbe ne u ya muẹn roro, odẹ ne u gha ya sẹtin ru sayọ vbe ugamwẹ Jehova, gha mwẹ egbe ekhọe ọghe Aizaia nọ khare wẹẹ: “I gha yo! Gie mwẹ.”—Aiz 6:8.

GHEE VIDIO NỌ MWẸ UHUNMWUTA NỌ KHARE WẸẸ ETẸN NA GIE YO ISI KEGHI RHIEGBA YE IWINNA EMWIORHỌ, IYEKE ỌNI, A GHI ZẸ EWANNIẸN YE AVBE INỌTA NA:

• De vbene a ya zẹ etẹn na gie yo isi?

• De iwinna esiesi ne avbe etẹn na gie yo isi ru?

• De afiangbe eso na miẹn, vbe a ghaa ga zẹvbe arọndẹ na gie yo isi?