Vbe ikpẹdẹ nogie 23 vbe uki e March, ma yaro yọ wẹẹ emwa ni gberra ẹbo 12 gha do deba ima do Ugie Ayere. U miẹn ẹkpotọ nọ gha kie ne iran ya danmwehọ vbene ọmunu gha ya rhan otọre hẹ, ighẹ ẹsọhẹ ọghe adẹwerriegbe nọ ke obọ e Jehova rre kevbe afiangbe nibun ne emwa nagbọn khian lae miẹn vbe odaro! (Aiz 11:6-9; 35:5, 6; 65:21-23; Jọn 3:16) Vbọrhirhighayehẹ, ẹi re ọmunu ọkpa ẹre ọ khian sosẹ vbe ugie ne kpataki na. Ma hia gha sẹtin gha mwẹ obọ vbọ, adeghẹ ima na gbe ọbokhian ne erhunmwuyẹn ni rre. (Rom 15:7) Azẹvbiro eso rre emwa.

• Ne u gha te wa ya tota gha khẹ ne ugie na suẹn, ye oyaya gbe ọbokhian ne erhunmwuyẹn kevbe emwa ni worua vbe odẹ ọghe orhiọn ni rre

• Ọ khẹke ne u si iran kẹ egbe ighẹ emwa ne uwẹ tobọ ruẹ tiere gha dee. Sokpan, u gie aro ruẹ vbe gha sotọ vbe egbe emwa ọvbehe ni rre rhunmwuda ebe itie ne iran miẹn. Khama emwa ọgbọn ne iran do tota ke ruẹ, uwẹ vbe iran koko loo e Baibol kevbe ebe ihuan ruẹ

• Ọta gha fo nẹ, muegbe ne u ya rhie ewanniẹ ye avbe inọta ne iran mwẹ. Adeghẹ ẹi re iko ruẹ ọkpa ẹre ọ khian loo Ọgua Arriọba nii vbe ẹdẹrriọ, u ghi gu orhunmwuyẹn nọ rre ru emwamwa wẹẹ, u gha mu otuẹ giẹ vbe ẹdẹ ọvbehe. Adeghẹ u i mwẹ adrrẹsi ra enọmba efoni ọghẹe, u sẹtin khama rẹn wẹẹ: “I hoo ne I rẹn vbene u ghee ugie na hẹ. Vba khian ya miẹn egbe hẹ?”