Avbe Osẹe Jehova keghi mwẹ ukpamuyọmọ nọ hiunsi. Ovbiotu e Kristi gha dinmwiamẹ nẹ, te ọ khẹke nọ ye gha gu e Jehova ne Osa Ne Udazi mwẹ asikẹgbe ne khuankhuankhuan. E Jehova keghi ya Ovbi ẹre si ima kẹ egbe. (Jọn 6:44) Ọ wa vbe họn erhunmwu ima.—Psm 34:15.

Vbe ima khian ya gbogba ga asikẹgbe ne ima gu Osanobua mwẹ? Ọ ma khẹke ne ima ya egbe taa Ivbi Izrẹl. Iran keghi yan wẹẹ, te iran khian gha ru emwi hia ne Jehova khare, sokpan ẹdẹ ghi rrie ẹdẹ, iran keghi ma ẹkhuia ẹmila ọghe igoru, iran na gha gae. (Ẹks 32:7, 8; 1 Kọr 10:7, 11, 14) Ma sẹtin nọ egbe ima wẹẹ: ‘De emwi nọ khẹke ne I ru vbe I gha werriẹ aro daa edanmwẹ? Uyinmwẹ mwẹ rhiẹre ma wẹẹ I ya aro nọ ghaan ghee asikẹgbe ne I gu e Jehova mwẹ ra?’ Ma gha gele hoẹmwẹ e Jehova, ma i khian gha ru emwi nẹi ya ẹko rhiẹnrhiẹn ọnrẹn.—Psm 97:10.

GHEE VIDIO NỌ MWẸ UHUNMWUTA NỌ KHARE WẸẸ GBOGBA GA ASIKẸGBE NE U GU E JEHOVA MWẸ (KỌL 3:5), IYEKE ỌNI, A GHI ZẸ EWANNIẸN YE AVBE INỌTA NA:

• Vbe a ya arovbẹmwẹ kha?

• Vbọzẹe nọ ma na khẹke ne ima gha re ọmwa arovbẹmwẹ kevbe ọmwa nọ ga ẹbọ?

• Vbọzẹe na gha na sẹtin kha wẹẹ, te ọmwa nọ fi owẹ ye oha ga ẹbọ?

• Vbọzẹe nọ na kakabọ ru ekpataki ne etẹn ni mwẹ ukpamuyọmọ vbe otu e Jehova gha mwẹ ẹghẹ ne ọvbokhan iran?