UYINMWẸ ỌGHE IMA NE IVBIOTU E KRISTI
Gha Maa Egbuẹ Emwi Ne U Mieke Na Gha Mwẹ Ẹwaẹn Na Ya Rẹn Emwi Nọ Maan Kevbe Nẹi Maan
Te ọ khẹke ne ọmwa nọ ku iku isasegbe gha ru emwi nọ gha ya egbe ẹre situa ẹse, nọ mieke na sẹtin ye gha mwẹ alaghodaro. Erriọ vbe ye, te ọ khẹke ne ima gha maa egbe ima emwi ẹsẹsẹmwẹse ne ima mieke na sẹtin gha mwẹ ẹwaẹn na ya rẹn emwi nọ maan kevbe nẹi maan. (Hib 5:14) Ma sẹtin wa gha hoo ne ima zẹ owẹ lele azẹ ne emwa ọvbehe ru, sokpan te ọ khẹke ne ima ya ẹwaẹn obọ ima gha ru azẹ. Vbọzẹ? Rhunmwuda, dọmwadẹ ima ẹre ọ khian na iyẹn egbe ẹre ma Osanobua.—Rom 14:12.
Ọ ma khẹke ne ima gha roro ẹre wẹẹ, ẹghẹ hia ẹre ima khian wa ya gha ru azẹ nọ maan, rhunmwuda ighẹ ọ kpẹre ne ima ghi dinmwiamẹ. Ne ima mieke na sẹtin gha ru azẹ nọ maan, te ọ khẹke ne ima hẹnhẹn egbe yan e Jehova, Ẹmwẹ ọnrẹn kevbe otu ọghẹe.—Jọs 1:7, 8; Itan 3:5, 6; Mat 24:45.
GHEE VIDIO NỌ MWẸ UHUNMWUTA NỌ KHARE WẸẸ, “GHA MWẸ EKHỌE ỌGUỌMWAZIRO NỌ MAAN,” IYEKE ỌNI, A GHI ZẸ EWANNIẸN YE AVBE INỌTA NA:
-
De isievẹn ne Emma werriẹ aro daa?
-
Vbọzẹ nọ ma na khẹke ne ima gha ya ẹwaẹn obọ ima rhie adia ne emwa, vbe ọ gha de ọghe emwi ne Baibol ma na wa gbe uhi ne ima?
-
De adia ne kpataki ne ọdọ vbe amwẹ ọkpa rhie ne Emma?
-
De eke ne Emma na ghi miẹn adia nọ ru iyobọ nẹẹn?
