Maana 86nan

Dolo ye cɛw ɲɛminɛ

I ƝƐ bɛ dolo la, cɛ kelen bɛ ka min jira wa? A bɛ mɛnɛ-mɛnɛ kosɛbɛ. Nin cɛw bɛ bɔ kɔrɔn fɛ. U bɛ dolow kalan. U dalen bɛ a la ko nin dolo kura bɛna taa ni u ye mɔgɔba dɔ fɛ.

Cɛw sera tuma min na Jerusalɛm, u ye ɲininkali kɛ ko: ‘Den min ka kan ka kɛ Yahutuw ka masakɛ ye, o bɛ min?’ Israɛlkaw bɛ wele fana ko “Yahutuw”. Cɛw tilala k’a fɔ ko: ‘Siɲɛ fɔlɔ min na an y’a ka dolo ye, o kɛra ka an to kɔrɔn fɛ. An nana ka a bato.’

Hɛrɔde de ye Jerusalɛm masakɛ ye. Hɛrɔde ye o kuma mɛn tuma min na, a jɔrɔla kosɛbɛ. A tun t’a fɛ masakɛ wɛrɛ ka a ka masaya minɛ a la. O la sa, Hɛrɔde ye sarakalasebaga kuntigiw wele k’u ɲininka. A ko: ‘Masakɛ, Ala bɛ min ci, o ka kan ka wolo min?’ U y’a jaabi ko: ‘Bibulu b’a jira ko a kan ka wolo Bɛtilehɛm.’

 Cɛ minnu bɔra kɔrɔn fɛ, Hɛrɔde ye olu wele k’a fɔ u ye ko: ‘A’ ye taa den fitinin ɲini, ni aw y’a ye tuma min na, aw ka segin ka na o fɔ ne ye. Ne fana b’a fɛ ka taa a bato.’ Nka, tiɲɛ yɛrɛ la, Hɛrɔde tun t’a fɛ ka taa den bato, a tun b’a fɛ k’a dɔn den bɛ yɔrɔ min na walisa ka a faga.

Dolo y’i bila cɛw ɲɛ ka taa Bɛtilehɛm. Den tun bɛ so min kɔnɔ, dolo nana jɔ o kunna. Cɛw donna so kɔnɔ tuma min na, u ye Mariyama ni Yesu fitinin ye. U ye fɛn caman bɔ u ka bɔrɛ kɔnɔ ka u di Yesu ma. Nka kɔfɛ, Jehova y’a fɔ cɛw ye, sugo la, ko u kana segin Hɛrɔde fɛ. O kosɔn, u seginna sira wɛrɛ fɛ ka taa u ka jamana na.

Hɛrɔde y’a mɛn tuma min na ko cɛ minnu bɔra kɔrɔn fɛ, olu seginna u ka yɔrɔ la, a diminna kosɛbɛ. A y’a fɔ ko Bɛtilehɛm cɛmanin minnu bɛ san fila la ani o jukɔrɔ, ko olu bɛɛ ka faga. Nka, sani o ci ka fɔ, o y’a sɔrɔ Jehova y’a fɔ Yusufu ye sugo la ko a ni a ka denbaya ka taa sigi Misira jamana na. Yusufu y’a mɛn tuma min na ko Hɛrɔde sara, a ye Mariyama ni Yesu ta ka segin Nazarɛti. Yesu lamɔna o dugu de la.

E fɛ, jɔni de ye dolo kura lamɛnɛ-mɛnɛ? I hakili jigin ko cɛw ye dolo ye tuma min na, u fɔlɔla ka taa Jerusalɛm. Sitanɛ-Sendonbaga tun b’a fɛ ka Ala Denkɛ faga. A tun b’a dɔn ko masakɛ Hɛrɔde min bɛ Jerusalɛm, o tun bɛna a ɲini ka Yesu faga. O kosɔn, Sitanɛ y’a kɛ dolo ka yeelenba bɔ.

Matiyu 2:​1-23; Mise 5:⁠2.