Maana 93nan

Yesu ye dumuni di jamaba ma

KOJUGUBA dɔ de kɛra sisan. U ye Yuhana batiselikɛla faga. Hɛrɔdiyas ye Masakɛ muso ye. A tun tɛ Yuhana Batiselikɛla fɛ. Ale de ye masakɛ bila ka Yuhana kun tigɛ.

Yesu ye o mɛn tuma min na, a dusu kasira kosɛbɛ. A kelen taara yɔrɔ lankolon dɔ la. Nka, mɔgɔw taara a nɔfɛ yen. Yesu ye mɔgɔw ye tuma min na, u hinɛ donna a la. A ye Ala ka masaya kuma fɔ u ye. O kɔfɛ, a ye u ka banabagatɔw kɛnɛya.

Wuladanin selen, a ka kalandenw nana a nɔfɛ, k’a fɔ a ye ko: ‘Su kora kaban. An bɛ yɔrɔ lankolon de la. Mɔgɔw labila u ka taa dumuni san dafɛ duguninw na.’

Yesu y’u jaabi ko: ‘U man kan ka taa yɔrɔ si. Aw yɛrɛw ka dumuni di u ma.’ Yesu ye a ɲɛsin Filipe ma, k’a ɲininka ko: ‘An bɛ se ka dumuni san yɔrɔ jumɛn na, min bɛna nin mɔgɔw bɛɛ bɔ?’

Filipe y’a jaabi ko: ‘Ni an ko an bɛ dumuni san, bɛɛ bɛna dɔɔnin sɔrɔ min na, o wari bɛna caya kosɛbɛ. Andre y’a fɔ ko: ‘Nburukun duuru ni jɛgɛ fila bɛ cɛnin dɔ bolo yan. Nka, o bɛ mun ɲɛ nin mɔgɔw bɛɛ ka dumuni ko la?’

Yesu ko: ‘Aw k’a fɔ mɔgɔw ye u k’u sigi bin na.’ Yesu ye barika da Ala ye dumuni ko la, ka nburu kari-kari. O kɔfɛ, kalandenw ye nburu ni jɛgɛ di mɔgɔw bɛɛ ma. Cɛ 5 000 ani musow ni denmisɛnninw ba caman tun bɛ mɔgɔw la. U bɛɛ ye dumuni kɛ ka u fa. Dumuni min tɔ tora, kalandenw ye o fara ɲɔgɔn kan tuma min na, u ye segi 12 fa.

Yesu ye a ka kalandenw don kurun kɔnɔ sisan walisa ka Galile ba tigɛ. Fiɲɛba dɔ wulila sufɛ. Jikuruw tora ka kurun lamaga fan bɛɛ fɛ ni fangaba ye. Kalandenw siranna kosɛbɛ. Dugutila fɛ, u ye mɔgɔ dɔ taamatɔ ye ji kan ka na u fan fɛ. U kulela siranya bolo, bawo u tun t’a dɔn mɔgɔ sugu min don.

Yesu ko: ‘Aw kana siran. Ne de don.’ U tun ma da o la halisa. O  kama Piɛrɛ ko: ‘Matigi, ni e don tigitigi, a fɔ ne ka taama ka taa i fan fɛ ji kan.’ Yesu y’a jaabi ko: ‘Na!’ Piɛrɛ bɔra kurun kɔnɔ ka taama a fan fɛ ji kan. Nka a tilala ka siran, o yɔrɔnin bɛɛ la, a ye jiginni daminɛ ji la, nka Yesu y’a tila.

Kɔfɛ, Yesu ye dumuni di mɔgɔ ba caman ma tuguni. Nin sen in na, a ye o kɛ ni nburukun wolonwula ani jɛgɛ misɛnnin damadɔw ye. O la fana, dumuni caman sɔrɔla ka di bɛɛ ma. Yesu tun b’a mago don mɔgɔ la cogo min na, yala o tɛ koɲumanba ye wa? Yesu bɛna dugukolo mara tuma min na, an tɛna jɔrɔ fɛn fosi ko la tun.

Matiyu 14:​1-32; 15:​29-38; Yuhana 6:​1-21.