Maana 39nan

Aron ka bere ye filɛruw kɛ

E KA filɛruw ni amandedenw lajɛ minnu bɔra bere la. Aron ka bere don. Aron ka bere ye nin filɛruw ni amande kɔgɔlenw kɛ su kelen dɔrɔn kɔnɔ. I b’a dɔn mun na wa? An ka o lajɛ ɲɔgɔn fɛ.

Israɛlkaw yaala-yaalala kungokolon kɔnɔ a bɛ waati bɔ sisan. U dɔw bolo, Musa man kan ka kɛ u ɲɛminɛbaga ye, ani Aron man kan ka kɛ sarakalasebaga kuntigi ye. Mɔgɔ minnu tun bɛ miiri o cogo la, olu dɔ la kelen tun ye Korɛ ye. Datan ni Abiram ni kuntigi 250 wɛrɛw fana tun bɛ o mɔgɔw la. O mɔgɔw bɛɛ jɛra ka na Musa fɛ, k’a fɔ a ye ko: ‘Mun na i bɛ i yɛrɛ kɔrɔta an tɔw kunna?’

Musa y’a fɔ Korɛ ni a nɔfɛmɔgɔw ye ko: ‘Sini sɔgɔma, aw ka wusulandagaw ta, ka wusulan kɛ u kɔnɔ. O kɔfɛ, aw ka na Jehova ka finiso la. An bɛna a ye Jehova bɛna mɔgɔ min sugandi.’

O dugujɛ, Korɛ ni a nɔfɛmɔgɔ cɛ 250 nana finiso la. Mɔgɔ caman wɛrɛw fana tugura u kɔ ka u dɛmɛ. Jehova diminna kosɛbɛ. Musa y’a fɔ jama ye ko: ‘Aw ka aw mabɔ nin mɔgɔjuguw ka finisow la. Aw kana maga u bolofɛn si la.’ Jama ye Musa ka kuma mɛn, k’a mabɔ Korɛ, Datan ni Abiram ka finisow la.

Musa tilala k’a fɔ ko: ‘Jehova ye mɔgɔ min sugandi, aw na o dɔn nin fɛ. Dugukolo bɛna dayɛlɛ ka nin mɔgɔjugu ninnu kunun.’

Musa tilala o fɔli la dɔrɔn, dugukolo sinna ka dayɛlɛ ten, ka Korɛ ka finiso, a bolofɛnw, ani Datan ni Abiram ni u nɔfɛmɔgɔw bɛɛ kunun o yɔrɔnin bɛɛ la. Dugukolo tilala ka datugu u da la. O mɔgɔjuguw jigintɔla dugukolo kɔnɔ, u kulela. Jama ye u kulekan mɛn tuma min na, a kulela k’a fɔ ko: ‘An ka boli ka bɔ yan, walisa dugukolo kana an fana kunun.’

Korɛ ni a nɔfɛmɔgɔ 250 tun bɛ Jehova ka finiso kɛrɛfɛ halisa. Jehova ye tasuma dɔ bɔ sanfɛ ka Korɛ ni a nɔfɛmɔgɔw 250 bɛɛ jeni. O kɔfɛ sa, Jehova y’a fɔ Aron denkɛ Eleazar ye a ka cɛ salenw ka wusulandagaw ta, ka olu kɛ nɛgɛ falafala ye, k’o nɔrɔ sarakabɔlan na.  O nɛgɛ falafala minnu bɛna kɛ sarakabɔlan kan, olu bɛna a jira Israɛlkaw la ko Aron ni a denkɛw dɔrɔn de ka kan ka kɛ Jehova ka sarakalasebagaw ye, ko mɔgɔ wɛrɛ si man kan k’o baara kɛ.

Nka, Jehova tun b’a fɛ k’a jira Israɛlkaw la k’a jɛya kosɛbɛ, ko ale ye Aron ni a denkɛw de ta ka kɛ sarakalasebagaw ye. O la sa, a y’a fɔ Musa ye ko: ‘Israɛl kabila kelen-kelen bɛɛ kuntigi ka na ni a ka bere ye. Aron ka na ni a ka bere ye, Levi ka kabila tɔgɔ la. O kɔfɛ, i ka o berew bɛɛ bila Jehova ka finiso kɔnɔ, layidu wagande ɲɛfɛ. Ne bɛna cɛ min ta ka kɛ sarakalasebaga ye, o tigi ka bere na filɛruw kɛ.’

O dugujɛ sɔgɔma, Musa nana berew lajɛ tuma min na, Aron ka bere ye nin filɛruw ni nin amandeden kɔgɔlenw kɛ. Yala i b’a dɔn sisan, mun na Jehova y’a kɛ Aron ka bere ka filɛruw kɛ wa?

Nɔnburuw 16:​1-49; 17:​1-11; 26:⁠10.