Maana 51nan

Ruti ni Naomi

I BƐNA kitabu dɔ sɔrɔ Bibulu kɔnɔ, min tɔgɔ ye ko Ruti. O kitabu bɛ denbaya dɔ de ka maana ɲɛfɔ. O denbaya ka ko kɛra tuma min na Kiritigɛlaw tun bɛ Israɛl kunna. Ruti tun ye muso denmisɛn ye min tun bɛ bɔ Moab jamana na. Ala ka jamakulu mɔgɔ dɔ tun tɛ. Nka Ruti ye Ala lakika dɔn tuma min na, n’o ye Jehova ye, a kɛra Jehova fɛ kosɛbɛ. Musokɔrɔba min y’a dɛmɛ ka Jehova dɔn, o ye Naomi ye.

Naomi ye Israɛlka ye. Dumuni gɛlɛya tun bɛ Israɛl jamana na tuma min na, ale ni a cɛ ni u denkɛ fila taara sigi Moab jamana na. Nka, don dɔ la, Naomi cɛ sara. O kɔfɛ, Naomi denkɛw ye Moabmuso fila furu minnu tun tɔgɔ ye ko Ruti ani Oripa. Nka, san 10 ɲɔgɔn o kɔfɛ, Naomi denkɛ fila fana sara. O kɛra dusukasiba ye Naomi ni Ruti ni Oripa bolo. Naomi tun bɛna mun kɛ sisan?

Don dɔ la, Naomi wulila ka taamajan daminɛ walisa ka segin a ka dugu la. Ruti ni Oripa tun t’a fɛ u ni Naomi ka  fara. O kosɔn, u tugura a kɔ ka taa. Nka, u kɛlen kɔ ka waati dɔ kɛ sira kan, Naomi y’a ɲɛsin u ma, k’a fɔ u ye ko: ‘Aw ka segin aw ka so, ka to aw baw fɛ.’

Naomi ye musow dasusu u ka fara ɲɔgɔn na. Ruti ni Oripa ye kulekanba daminɛ, bawo u tun bɛ Naomi fɛ kosɛbɛ. U ko: ‘Ayi, an bɛ taa i nɔfɛ i ka jamana na.’ Nka, Naomi ye u jaabi ko: ‘Aw ka segin, ne denmusow. Ni aw tora aw ka so, o de ka fisa aw ma kosɛbɛ.’ O kuma fɔlen, Oripa ye a ka so sira minɛ ka segin. Nka, Ruti ma sɔn ka segin.

Naomi y’a ɲɛsin a ma, k’a fɔ a ye ko: ‘A filɛ, Oripa taara. E fana ka tugu a kɔ ka taa i ka so.’ Nka Ruti y’a jaabi ko: ‘I kana a ɲini ka ne labɔ i kɔ. A to ne ka tugu i kɔ. I mana taa yɔrɔ min na, ne na taa yen. I mana sigi yɔrɔ min na, ne na sigi yen. I ka mɔgɔw na kɛ ne ka mɔgɔw ye, i ka Ala na kɛ ne ka Ala ye. I mana sa yɔrɔ min na, ne na sa yen. Ne su na don o yɔrɔ la fana.’ Ruti ye o fɔ minkɛ, Naomi m’a fɔ Ruti ye tun ko a ka segin a ka so.

Naomi ni Ruti sera Israɛl jamana na. U sigira yen. Ruti ye baara daminɛ o yɔrɔnin bɛɛ la forow la, bawo sumankisɛ dɔ tigɛ waati tun don, n’o ye orje ye. Cɛ dɔ tun bɛ yen min tɔgɔ ye ko Boaz. Orje min tora sumantigɛlaw kɔ a ka forow la, a y’a to Ruti ka olu fara ɲɔgɔn kan ka taa ni o ye. I bɛ Boaz woloba dɔn wa? Boaz woloba ye Rahab ye min tun bɛ bɔ Jeriko dugu la.

Don dɔ la, Boaz y’a fɔ Ruti ye ko: ‘I ye koɲuman minnu kɛ, ne ye olu bɛɛ mɛn. I ye i mago don Naomi na cogo min na, ne ye o fana mɛn. I ye i fa ani i ba ani i ka jamana bila cogo min na ka na sigi mɔgɔw cɛma, i tun tɛ minnu dɔn, ne bɛ o bɛɛ kala ma fana. Jehova ka hɛrɛ kɛ i ye.’

Ruti y’a jaabi ko: ‘I ka ɲi ne ma kosɛbɛ, ne matigi. I ye ne dusu saalo ka kuma duman fɔ ne ye.’ Boaz tun bɛ Ruti fɛ kosɛbɛ. A ma mɛn, Boaz ye Ruti furu. O diyara Naomi ye kosɛbɛ. Nka, dɔ farala Naomi ka nisɔndiya kan tuma min na Ruti ni Boaz ye u denkɛ fɔlɔ sɔrɔ, min tɔgɔ dara ko Obɛd. Kɔfɛ, Obɛd kɛra Dawuda mɔkɛ ye. An bɛna fɛn caman kalan Dawuda kan kɔfɛ.

Bibulu kitabu min tɔgɔ ye ko Ruti.