Maana 104nan

Yesu kɔseginna sankolo la

IKOMI donw bɛ ka tɛmɛ, Yesu tora ka a yɛrɛ jira a nɔfɛmɔgɔw la siɲɛ caman. Siɲɛ dɔ yɛrɛ la, kalanden 500 lajɛlen ye a ye. Ni a tun y’a yɛrɛ jira a ka kalandenw na tuma o tuma, i b’a dɔn Yesu tun bɛ kuma min kan wa? A tun bɛ kuma Ala ka masaya de kan. Jehova ye Yesu ci ka na dugukolo kan walisa ka mɔgɔw kalan Masaya ko la. Yesu ma o dabila, hali a lakununni kɔfɛ.

I hakili b’a la Ala ka masaya ye min ye wa? Ala ka masaya ye Ala ka gɔfɛrɛnaman yɛrɛ-yɛrɛ de ye. A bɛ sankolo la. Ala ye mɔgɔ Min sugandi ka kɛ o masakɛ ye, o ye Yesu ye. I ko an y’a kalan ka tɛmɛ cogo min na, Yesu kɛlen ka dumuni di kɔngɔtɔw ma, ka banabagatɔw kɛnɛya, ka suw lakunun, a y’a jira ko a bɛna kɛ masakɛ ɲuman ye.

 O la sa, Yesu bɛna masaya kɛ sankolo la san ba kelen kɔnɔ. O waati kɔnɔna na, dugukolo bɛna kɛ mun ye? Dugukolo kuuru bɛɛ bɛna kɛ alijinɛ cɛɲumanba ye. Kɛlɛw tɛna kɛ tun, walima kojugu, walima bana, hali saya tɛna kɛ tun. An b’a dɔn ko o kuma ye tiɲɛ ye, bawo Ala ye dugukolo da walisa a ka kɛ alijinɛ ye hadamadenw ye. O de kosɔn, a daminɛ na, Jehova ye Edɛn nakɔ labɛn. Ala tun b’a fɛ min ka kɛ kabini o tuma na, Yesu bɛna baara kɛ walisa o ka se ka kɛ.

Yesu ka kan ka segin waati min na sankolo la, o sera. Yesu y’a yɛrɛ jira a ka kalandenw na tile 40 kɔnɔ. O de y’a to u dara a la tigitigi ko Yesu ɲɛnama don kokura. Nka, sani Yesu ka a ka kalandenw bila, a y’a fɔ u ye ko: ‘Aw ye to Jerusalɛm dugu kɔnɔ fo aw ka hakili senu sɔrɔ.’ Hakili senu ye Ala ka barika ye min bɛ wale kɛ. A bɛ i ko fiɲɛ min bɛ ci. A bɛ Yesu ka kalandenw dɛmɛ u ka Ala sago kɛ. A laban na, Yesu y’a fɔ a ka kalandenw ye ko: ‘Aw ka waajuli kɛ ne ko la fo ka taa se dugukolo dan bɛɛ ma.’

Yesu ye o fɔ kaban tuma min na, kabako dɔ kɛra. Yesu ye yɛlɛnni daminɛ ka taa sankolo la, i ko i ɲɛ b’a la cogo min na yan. Kabanɔgɔ dɔ tilala ka Yesu dogo. Kalandenw ma a ye tun. Yesu taara sankolo la. O yɔrɔ la yen, Yesu ye kuntigiya daminɛ a ka kalandenw kunna minnu bɛ dugukolo kan.

1 Kɔrɛntekaw 15:​3-8; Jirali 21:​3, 4; Kɛwalew 1:​1-11.