Ni teri dɔ b’i bolo min ko ka di i ye, n’i bɛ bonya da a kan fana, a ka c’a la i b’a ɲini ka kɛ a ɲɔgɔn ye. Bibulu ko: “Jehowa ka ɲi, a tilennen bɛ.” (Zaburu 25:8) An ka kan ka ko ɲuman ni ko tilennen kɛ walasa an ka kɛ Ala teriw ye. Bibulu b’a fɔ ko: “Aw ka kɛ Ala ladegebagaw ye iko den kanulenw, ka taama kanuya la.” (Efesekaw 5:1, 2) A cogo dɔw ye ninnu ye:

I ka kɛ tɔw dɛmɛbaga ye. “An ka ko ɲuman kɛ mɔgɔw bɛɛ ye.”—Galasikaw 6:10.

I k’i cɛsiri baara la. “Min tun bɛ sonyɛni kɛ, o kana sonyɛni kɛ tun, nka a ka jija ka baara bɛnnen kɛ ni a yɛrɛ bolow ye.” —Efesekaw 4:28.

I saniyalen ka to i farikolo n’i jogo la. “An ka an yɛrɛw saniya farisogo nɔgɔlenya ani dusukun nɔgɔlenya bɛɛ la, ka saniya dafa Ala ɲɛsiran na.” —2 Kɔrɛntekaw 7:1.

 I k’i ka denbaya kɔnɔmɔgɔw minɛ ni kanuya ni bonya ye. “Aw bɛɛ kelen-kelen ka aw musow kanu iko aw yɛrɛ kunw. Muso fana ka a cɛ bonya. Denmisɛnw, a’ ye aw bangebagaw kanminɛ.”—Efesekaw 5:33–6:1.

I k’a jira tɔw la k’i b’u kanu. “Aw ka ɲɔgɔn kanu, katuguni kanuya bɔra Ala de la.”— 1 Yuhana 4:7.

I ka jamana ka sariyaw sirataama. “Mɔgɔ bɛɛ ka kolo an kunna fangaw [gɔfɛrɛnamanw] ye . . . Mɔgɔ bɛɛ ka kan ni min ye, aw ka o di u ma. Aw ka nisɔngɔ sara nisɔngɔ minɛlaw ye.”— Romɛkaw 13:1, 7.