Sitanɛ ye ko jugu min bɛɛ kɛ, Jehowa bɛna o bɔ yen pewu. Jehowa ye Yesu kɛ Masakɛ ye dugukolo bɛɛ kunna. Ale ka mara kɔrɔ, dugukolo bɛna yɛlɛma ka kɛ alijinɛ ye.—Daniɛl 7:13, 14; Luka 23:43.

Jehowa ye nin kow layidu ta:

• SUMAN CAYALI: “Dugukolo sɛnɛ ɲɛna, Ala, an yɛrɛw ka Ala, o na duba an ye.” “Sɛnɛfɛn ka caya o jamana kɔnɔ fo ka se kuluw san fɛ.”—Zaburu 67:7; 72:16.

• KƐLƐ TƐNA KƐ TUN: “A’ ye na Jehowa ka kɛwalew filɛ. A ye tiɲɛni kobaw kɛ dugukolo kan. A bɛ kɛlɛ ban fo dugukolo dan yɔrɔ la.”—Zaburu 46:9, 10.

• KOJUGUKƐLAW TƐNA KƐ YEN TUN: “Katuguni kojugukɛlaw na halaki ka ban . . .  Tuma dɔɔnin mɔgɔ jugu tɛna ye tun. I na a yɔrɔ lajɛ, k’a sɔrɔ a tɛ yen tun.”—Zaburu 37:9, 10.

•  BANA NI DUSUKASI NI SAYA TƐNA KƐ TUN: “O tuma la fiyentɔ ɲɛw na yɛlɛ, tulo gerenw tulow na yɛlɛ. O tuma la segelentɔw na panpan i n’a fɔ mina. Bobo nɛnkun na dɔnkili da.”—Esayi 35:5, 6.

  “Ala yɛrɛ na kɛ u fɛ yen, ka kɛ u ka Ala ye. A na ɲɛji bɛɛ cɛ ka bɔ u ɲɛw la. Saya tɛna kɛ tun, ɲɛnasisi fana tɛna kɛ tun, wala kasi, wala dimi, katuguni fɛn fɔlɔw tɛmɛna.”—Jirali 21:3, 4.

Danfara min bɛ Jehowa ni Sitanɛ ni jinɛw cɛ, o ye k’a tɛ nkalon tigɛ abada. A bɛ fɛn o fɛn layidu ta, a b’o bɛɛ timɛ. (Luka 1:36, 37) Jehowa b’i kanu ani a b’a fɛ i ka balo alijinɛ kɔnɔ, a bɛna min sigi. O la sa, i magɛrɛ Jehowa Seerew la walasa i ka fɛn wɛrɛ caman kalan tiɲɛ kuma kabakomaw ko la, o minnu bɛ sɔrɔ Ala ka Kuma kɔnɔ. N’i bɛ tiɲɛ waleya i ka ɲɛnamaya kɔnɔ, i bɛna hɔrɔnya ka bɔ nkalon ni dannako kunntan ni kodɔnbaliya ka jɔnya la. A laban na, i na hɔrɔnya hali jurumu ni saya la. I n’a fɔ Yesu y’a fɔ cogo min na: “Aw na tiɲɛ dɔn, tiɲɛ na aw hɔrɔnya.”—Yuhana 8:32.