Sani a ka sa Yesu kumana ni a ka kalanden naani ye, ni o ye — Piɛrɛ, Yakuba, Yuhana ani Andre ye. A kumana ni u ye a ka “nali taamashyɛn” kan, o min bɛna kɛ don labanw na ani a ye ɲininkaliba dɔ kɛ ni o ye: “Jɔnkɛ dannamɔgɔ hakiliman min makɛ bɛ a bila jɔn tɔw kun na ka u ka dumuni ko ɲɛnabɔ a waati latigɛlen na, o ye jɔni ye?” (Matiyu 24:3, 45; Marka 13:3, 4) Nin yɔrɔ in na, dumuni ka kan ka faamu i ko dumuni hakili ta fan fɛ, ni o ye Ala ka dɔnniya ye. Yesu ni o ye “makɛ” ye, ale ye layidu ta a ka kalandenw ye ko mɔgɔ minnu bɛna o dɔnniyaba in di don labanw na, a bɛna olu sigi. Jɔnkɛ in bɛna kɛ jɔni ye?

O ye krecɛn mulen kulu fitinin dɔ ye min tugulen bɛ Yesu kɔ. Mulen o kɔrɔ ko mɔgɔ min sugandira Ala ka hakili senu fɛ. “Jɔnkɛ” in de bɛ dumuni di Jehova batobaga tɔw ma hakili ta fan fɛ. An sirilen bɛ o jɔnkɛ dannamɔgɔ de la walasa k’an ka “dumuni ko ɲɛnabɔ a waati latigɛlen na.”—Luka 12:42.

Ale de bɛ Ala ka so kow ɲɛnabɔ. (1 Timote 3:15) Yesu ye jɔyɔrɔba kalifa “jɔnkɛ” in na, ni o ye ka Jehova ka jɛkulu min bɛ dugukolo kan ka nafolo kow ani a ka baara kow ɲɛnabɔ ni o bɛ waajuli ani jɛkulu kalanni kan. An mago bɛ min na walasa ka o di an ma, an mago bɛ o la waati min na “jɔnkɛ dannamɔgɔ hakiliman” bɛ dumuni jɛnsɛn hakili ta fan fɛ gafew sababu fɛ an bɛ baara kɛ ni minnu ye ka waajuli kɛ ani o dumuni bɛ di an ma kalan sababu fɛ an bɛ minnu sɔrɔ an ka lajɛw ni an ka lajɛbaw la.

Nin jɔnkɛ ye dannamɔgɔ ye ka kɛɲɛ ni Bibulu tiɲɛw ye ani a ka baara ye ni o ye ka kibaru duman waajuli kɛ, a ye hakiliman ye ka kɛɲɛ ni a bɛ Krisita ka dugukolo kan koɲɛw ɲɛnabɔ cogo min na. (Kɛwalew 10:42) Jehova bɛ duba u ye a kɛtɔ ka dumuniba di u ma hakili ta fan fɛ.—Esayi 60:22; 65:13.

• Yesu ye jɔni de sigi walasa u ka dumuni di a ka kalandenw ma hakili ta fan fɛ?

• Mun na an bɛ se k’a fɔ ko “jɔnkɛ” ye dannamɔgɔ ani hakiliman ye?