Jehova Seerew dɔnnen don ni kalan kɛli ye tuma bɛɛ. U ye kalankɛyɔrɔ Kɛrɛnkɛrɛnnenw dilan mɔgɔw ye minnu b’a fɛ ka u ka waati bɛɛ di Masaya baara waajuli kɛli la walasa u ka se ka ‘baara kɛ ka dafa’.—2 Timote 4:5.

Tutigɛbagaw ka lakɔli. Tutigɛbaga basigilen ka san fɔlɔ laban na, a bɛ tile wɔɔrɔ lakɔli kɛ, o min bɛ se ka kɛ yɔrɔ la min ka surun Masaya So la. O kun ye ka tutigɛbaga dɛmɛ a k’a gɛrɛ Jehova la ani ka nɔ ɲuman bɔ waajuli baara bɛɛ la ani fana ka taa ɲɛ kantigiya la a ka baara kɔnɔna na.

Masaya Kibaru duman fɔbagaw ka lakɔli. O ye kalo fila lakɔli ye min dabɔra tutigɛbagaw kama minnu mɛna o baara la, ani a ka di minnu ye ka bɔ u ka so ka taa yɔrɔ wɛrɛ la, mago bɛ yɔrɔ min na, o kun ye ka olu kalan koɲuman. A bɛ i ko u b’a fɔ “ne, i ka ne ci”. O fɛ u bɛ weleweledala bɛɛ la belebeleba de ladege min ka baara kɛlen ɲɔgɔn ma kɛ dugukolo kan ni o ye Yesu Krisita ye. (Esayi 6:8; Yuhana 7:29) Ka taa i sigi yɔrɔ wɛrɛ la, walasa ka se k’o kɛ fo i ka se ɲɛnamaya kɛcogo nɔgɔnma na. A bɛ se ka kɛ, i ka ladalakow ani waati kɛcogoyaw ani i ka duntaw ni i taa yɔrɔ taw tɛ kɛ kelen hali dɔɔnin. Balimakɛw ni balimamuso minnu kelen don ani furuɲɔgɔnmaw minnu si bɛ san 23 la fo ka taa se san 65 la, o lakɔli bɛ olu dɛmɛ ka jɔgɔ ɲumanw sɛnɛ u yɛrɛ la u mago bɛ minnu na u ka alako baara la ani ka jɔgɔw bɔ u yɛrɛ la minnu b’a to Jehova ani a ka jɛkulu tɛ se ka baara kɛ ni u ye koɲuman.

École biblique de Guiléad. Heburu kan na “Guilead ” daɲɛ kɔrɔ ye “Seere”. Kabini san 1943 ni o ye École biblique de Guiléad sigi san ye, misiyɔnɛri 8 000 ni kɔ minnu kalan na lakɔli in fɛ, olu cira ka seereya kɛ “dugukolo yɔrɔ bɛɛ la” wa o ye nɔ ɲuman bɔ. (Kɛwalew 13:47) Misali la, Peru jamana na waati min na misiyɔnɛriw sera yen, jɛkulu foyi tun tɛ yen nka sisan 1 000 ni kɔ de bɛ yen. Zapɔn fana na hali Jehova Seere tan tun tɛ yen, bi bi in na 200 000 ni kɔ de bɛ yen. Kalan min bɛ kɛ kalo duuru kɔnɔ, École biblique de Guiléad  la Ala ka kuma kalani sen bɛ o la. Tutigɛbaga basigilenw ani misiyɔnɛri minnu ma lakɔli in kɛ, mɔgɔ minnu bɛ baara kɛ filialiw ka komitew kɔnɔ walima minnu bɛ baara kɛ kafo kɔnɔna na jɛkuluw ni ɲɔgɔn cɛ, olu de bɛ wele lakɔli in na walasa ka kalanba sɔrɔ min bɛ u dɛmɛ u ka basigi ani ka fangaba sɔrɔ u ka baara la min bɛ kɛ diɲɛ bɛɛ kɔnɔ.

• Tutigɛbagaw ka lakɔli in kuntilenan ye mun ye?

• Jɔni de bɛ se ka Masaya Kibaru duman fɔbagaw ka lakɔli kɛ?