BATƐMU Mɔgɔ minnu bɛna batise Sibiridon sɔgɔma, olu ka kan ka sigi yɔrɔ la min bilala olu kama, sani batɛmu jɛmu ka daminɛ. U bɛ don ji la ni fini min ye, o ka kan ka kɛ fini ɲɛnama ye min bɛ u sutura, ani u b’u yɛrɛ susa ni fini min ye n’u bɔra ji la, u kelen-kelen bɛɛ ka kan ka na ni o fɛnw ye. Sigiyɔrɔ minnu bɛna bila batɛmu talaw kama, olu bɛna bila ka ɲɛsin banbali ma.

BOLOMAFARAW Wariba de bɔra walisa sigiyɔrɔw ka sɔrɔ minnu bɛ bɔli kɛ, kumakɛlaw ka kuma ka mɛn ka ɲɛ, wideyow ka lajɛ ani baara wɛrɛw ka se ka kɛ. O kow bɛɛ kɛra walisa tile saba lajɛba ka diya ani ka an dɛmɛ an ka gɛrɛ Jehova la. Aw b’a bɔ aw yɛrɛ la ka bolomafara minnu di, olu bɛ dɛmɛ don walisa ka o musakaw kɛ ani an ka baara min bɛ kɛ diɲɛ bɛɛ kɔnɔ, ka o kɔkɔrɔdon. Walisa ka o kow nɔgɔya aw bolo, taamasyɛn jɛlen kɛra buwatiw la, ka u bila yɔrɔw ɲɛfɛ tile saba lajɛba kɛyɔrɔ la. Aw bɛ se ka bolomafaraw di intɛrinɛti kan fana aw kɛtɔ ka taa donate.dan124.com kan. Bolomafaraw bɛɛ nafa ka bon an bolo kosɛbɛ. Wa, Ɲɛmɔgɔ kulu b’a fɛ ka aw fo aw ka fɛn dilenw na Masaya baara kɔkɔrɔdonni ko la.

DƐMƐ KUN FƆLƆ An b’aw deli, aw k’a to aw hakili la ko o baaradaw bɛ yen kɔrɔtɔkow dɔrɔn de kama.

FƐN TUNUNENW SƆRƆYƆRƆ Fɛn o fɛn yera mɔgɔw kɔ, o fɛnw ka kan ka ta ka taa di Fɛn tununnenw Sɔrɔyɔrɔ la. N’aw ka fɛn o fɛn tununna, aw ka taa o baarada la k’a lajɛ n’aw ka fɛn tununnen bɛ yen. N’aw ye den tununnen dɔ ye, aw bɛ se ka taa ni o ye o yɔrɔ la. Nka, walasa ka mɔgɔw bɛɛ tanga jɔrɔnanko nafantan ma, an b’aw deli aw k’aw denw kɔlɔsi ani ka u to aw kɛrɛfɛ.

MINNU B’A FƐ KA BAARA DƆ KƐ Baara minnu bɛ kɛ tile saba lajɛba la, n’aw b’a fɛ k’a bɔ aw yɛrɛ la ka baara dɔ kɛ, an b’a ɲini aw fɛ aw ka taa kunnafoniw diyɔrɔ la ani baarada la, min dabɔlen bɛ mɔgɔw kama minnu b’a fɛ ka baara dɔ kɛ.

MƆGƆ KUNBƐNBAGAW Mɔgɔ kunbɛnbagaw ka baara ye ka aw dɛmɛ. U bɛ fɛn minnu fɔ aw ye mobiliw jɔyɔrɔ ko la, sigiyɔrɔ minɛni ko la, aw ka kan ka don da min fɛ ani ka bɔ da min fɛ, o ko la ani ko wɛrɛw ko la, an b’aw deli aw ka olu kɛ.

SIGIYƆRƆW An b’aw deli, aw ka tɔw gasi sigi. A’ye aw hakili to a la ko, aw bɛ se ka sigiyɔrɔw mara nin mɔgɔw dɔrɔn de ye: Aw ka denbaya kɔnɔmɔgɔw, mɔgɔ minnu ni aw nana ɲɔgɔn fɛ tile saba lajɛba in na mobili kelen na, aw ni minnu bɛ so kelen kɔnɔ walima aw bɛ ka Bibulukalan kɛ minnu kun. An b’aw deli, aw ma sigilan minnu mara, aw kana fɛn fosi bila olu kan.

Masaya Kibaru duman fɔbagaw ka lakɔli Tutigɛbaga minnu si bɛ san 23 la ka taa san 65 la ni u b’a fɛ ka dɔ fara u ka tutigɛbagaya baara kan, olu welelen don ka na lajɛ la Sibiridon tilegan fɛ min ɲɛsinnen bɛ mɔgɔw ma minnu b’a fɛ ka taa Masaya Kibaru duman fɔbagaw ka lakɔli la. O lajɛ kɛyɔrɔ ni a kɛwaati bɛna kɔn ka fɔ aw ye.