Mun na i ka kan k’a to ka i kɔnɔna kow fɔ i bangebagaw ye? (Ntalenw 23:26) I ka kan ka to k’o kɛ ka d’a kan Jehova ye i kalifa olu de la walasa u k’u janto i la ani ka i ɲɛminɛ. (Zaburu 127:3, 4) I mago bɛ fɛn minnu na ani i jɔrɔnankow, ni i bɛ olu bɛɛ dogo u la, i dɛmɛni bɛ gɛlɛya u bolo. Ani fana, i bangebagaw ye dɔnniya jɔnjɔn min sɔrɔ u ka ɲɛnamaya kɔnɔ, i tɛna se ka nafa sɔrɔ o dɔnniya la. Yala ko jugu don ka hakilina dɔw to i yɛrɛ kɔnɔ wa? O tɛ ko jugu ye tuma bɛɛ, nka i janto a la i kana i bangebagaw bila fili la, k’u bila u ka da fɛn dɔ la min tɛ tiɲɛ ye. (Ntalenw 3:32)

I bɛ se ka kuma ni i bangebagaw ye cogo di? Waati dɔ ɲini min bɛ bɛn i yɛrɛ ani olu fana ma. Ni o waati sɔrɔli ka gɛlɛn, i bɛ se ka i kɔnɔna kow sɛbɛn lɛtɛrɛ dɔ kɔnɔ ka o di i bangebagaw dɔ la kelen ma. Ni u b’a fɛ aw ka kuma fɛn dɔ kan k’a sɔrɔ a man di i ye aw ka kuma o kan dun? I hakili to a la ko u b’a fɛ ka i dɛmɛ tiɲɛ yɛrɛ la. I ka i bangebagaw ye i n’a fɔ i jɛɲɔgɔnw, kana u ye i n’a fɔ i juguw. I bɛ cɛsiri min kɛ walasa ka i kɔnɔna kow bɛɛ fɔ i bangebagaw ye, o bɛna i nafa i ka ɲɛnamaya tɔ bɛɛ la, fo ka taa se ɲɛnamaya banbali ma!—Ntalenw 4:10-12.

WIDEYO LAJƐ MIN TƆGƆ YE KO, NE KA FUNANKƐYA KƆNƆNA NA—NE BƐ SE KA KUMA NI NE BANGEBAGAW YE COGO DI? O KƆ AW KA NIN ƝININKALI NINNU JAABI:

• Esther ani Partik labanna ka mun de jateminɛ u yɛrɛw ko la?

• I bɛ se ka kalan jumɛn sɔrɔ Yesu ka misali la?

• I bangebagaw y’a jira cogo di ko u bɛ u mago don i la?

• Bibulu sariyakolo jumɛnw bɛ se ka i dɛmɛ i ka se ka kuma ni i bangebagaw ye?