Ka yafa, o kɔrɔ ye ko, kojugu min kɛra i la, i tɛ o jate bilen ani o ko nana ni diminya min ye, ka o bɔ i dusukun na. Ka yafa, o kɔrɔ tɛ ko, k’a kɛ iko, ko min kɛra i la o tɛ kojugu ye walima k’a kɛ iko fosi ma kɛ.

BIBULU SARIYAKOLO: “A’ ye ɲɔgɔn ka kow muɲu. Ni a bɛ mɔgɔ dɔ kɔnɔ ko dɔ y’a hakɛ ta, aw ka yafa ɲɔgɔn ma.”—Kolosekaw 3:13.

“Ni i bɛ mɔgɔ fɛ, i tɛ a ka dafabaliyakow jate nka a tigi bɛ k’a jija ka kɛ mɔgɔ sugu min ye, i bɛ o de jate.”—Aaron.

N’i ye dimin mara i kɔnɔ, o bɛ se ka tɔɔrɔ lase i ma farikolo tan fa fɛ ani hakili ta fan fɛ—wa o bɛ se ka kɛ sababu ye ka i ka furu fana tiɲɛ.

“Don dɔ la, ne cɛ ye yafa deli ne fɛ ko dɔ kama min digira ne la kosɛbɛ. Hali ni yafali gɛlɛyara ne ma, ne labanna ka yafa a ma. Nka ikomi ne ma yafa a ma joona, ne nimisara o la bawo o ye bɛnbaliya fuw don an ni ɲɔgɔn cɛ.”—Julia.

I YƐRƐ SƐGƐSƐGƐ

Siɲɛ wɛrɛ, ni i furuɲɔgɔn ye kuma dɔ fɔ walima ni a ye fɛn dɔ kɛ min bɛ digi i la, i bɛ se ka i yɛrɛ ɲininka:

• ‘Yala ne dimin ka di kojugu wa?’

• ‘A ko digi kojugu ne la, yala ne tɛna yafa fɔ ne furuɲɔgɔn ka yafa deli ne fɛ fɔlɔ wa, walima yala ne bɛ se ka tɛmɛn a ko kan ten wa?’

KUMA NI I FURUƝƆGƆN YE

• An bɛ waati joli ta tuma caman na sani an ka yafa ɲɔgɔn ma?

• An bɛ se ka mun kɛ walasa ka to ka yafa ɲɔgɔn ma joona?

LAADILIKANW

• N’i furuɲɔgɔn ye ko dɔ k’i la min digira i la, i kana a bila i hakili la ko a y’a dabɔ a kama.

• A ɲini ka a faamu ani k’a to i hakili la ko “an bɛɛ bɛ fili cogo caman na.”—Yakuba 3:2.

“A ka nɔgɔn ka yafa ɲɔgɔn ma ni jalaki bɛ an fila bɛɛ fan fɛ, nka yafali bɛ gɛlɛya ni jalaki bɛ mɔgɔ kelen dɔrɔn de fan fɛ. Walasa ka yafa deli mɔgɔ fɛ ani ka yafa mɔgɔ ma, fɔ i ka kɛ mɔgɔ majigilen ye.”—Kimberly.

BIBULU SARIYAKOLO: “I k’i teliya ka i ni ale cɛ bɛn.”—Matiyu 5:25.