FURUƝƆGƆNMAW
1: Ka furu layidu bato
O KƆRƆ YE MUN YE?
Furuɲɔgɔnma minnu bɛ furu layidu bato, olu bɛ furu jate fɛn ye min ka kan ka mɛn, o b’a to u hakili bɛ sigi ka ɲɛsin u ka furu ma. Furuɲɔgɔnma fila bɛɛ b’a dɔn ko hali ni gɛlɛyaw nana, u fila bɛɛ bɛna furu layidu bato.
Dɔw bɛ waajibiya ka to u ka furu kɔnɔ bawo u b’a dɔn ko ni u ye u furu sa, o tɛna diya u sɔmɔgɔw walima sigida mɔgɔw ye. Nka furuɲɔgɔnma minnu bɛ u ka furu layidu bato k’a sababu kɛ kanuya ni bonya ye, o de ɲɔgɔn tɛ.
BIBULU SARIYAKOLO: “Cɛ fana kana a muso bila.”—1 Kɔrɛntekaw 7:11.
“Furuɲɔgɔnma min bɛ a ka furu layidu bato, o bɛ ko caman muɲu. A bɛ yafa ɲini joona wa a bɛ yafa joona a furuɲɔgɔn ma. A tɛ gɛlɛyaw kɛ furusa sababu ye nka a bɛ ko bɛɛ kɛ walasa ka o gɛlɛyaw ɲɛnabɔ.”—Micah.
MUN NA O NAFA KA BON?
Furu layidu batoli nafa man bon minnu bolo kosɛbɛ olu mana gɛlɛyaw sɔrɔ, u ka telin ka nin kuma sugu fɔ: ‘An tun mankan ka furu ɲɔgɔn ma’ wa u bɛ cogoya ɲini fana walasa ka u ka furu sa.
“Mɔgɔ caman bɛ furu ɲɔgɔn ma ani k’a bila u hakili la ko ni u ma bɛn, u bɛ se ka u furu sa. Minnu bɛ furu ɲɔgɔn ma, ni o hakilina sugu bɛ u la kabini furu daminɛ na, o b’a jira ko furu layidu batoli nafa man bon u bolo.”—Jean.
I BƐ SE KA MIN KƐ
I YƐRƐ SƐGƐSƐGƐ
Ni kɛlɛ donna aw ni ɲɔgɔn cɛ . . .
Yala i bɛ to ka nimisa i ka furu la wa?
Yala i bɛ miiri mɔgɔ wɛrɛ la min tɛ i furuɲɔgɔn ye wa?
Yala i bɛ kuma sugu dɔw fɔ i n’a fɔ: “M’bɛna i bila” walima “M’bɛna mɔgɔ wɛrɛ sɔrɔ min bɛ n’nafa dɔn”?
Ni i ka jaabi kɛra ɔwɔ ye ka ɲɛsin nin ɲininkali ninnu dɔw ma, o la a ka kan i ka i ka furu layidu batoli kolo sinsin.
KUMA NI I FURUƝƆGƆN YE
Yala an ka furu layidu batoli fanga dɔgɔyara wa? Ni a fanga dɔgɔyara, mun na o kɛra?
An bɛ se ka fɛɛrɛ jumɛnw de tigɛ walasa ka an ka furu layidu batoli kolo sinsin?
LAADILIKANW
To ka kumakan dumanw fɔ i furuɲɔgɔn ye
I bɛ se ka i furuɲɔgɔn foto dɔw bila i ka biro la baarayɔrɔ la, o b’a jira ko i bɛ nafaba don i ka furu layidu batoli la
N’i bɛ baarayɔrɔ la walima yɔrɔ wɛrɛ la, to ka i furuɲɔgɔn wele telefɔni na walasa ka a kibaruya dɔn
BIBULU SARIYAKOLO: “Ala ye min kɛ kelen ye, mɔgɔ kana o fara”—Matiyu 19:6.
