Ala bɛ bonya da an kan a kɛtɔ ka se di an ma min b’a to an ka kow sugandi an yɛrɛ ye, ni o ye ka latigɛliw kɛ an yɛrɛ ye k’a sɔrɔ Ala walima dakan ma kɔn k’a latigɛ an ka kan ka ko minnu kɛ. An k’a lajɛ Bibulu bɛ min fɔ.

• Ala ye mɔgɔw da a yɛrɛ ja la. (Jenɛse 1:26) Baganw danfara la, olu minnu tɛ se ka miiri k’a sɔrɔ ka wale kɛ, an bɔlen bɛ an dabaga fɛ jogow jirali la i n’a fɔ kanuya ani tilennenya. Wa iko an dabaga cogo, se b’an ye ka kow sugandi an yɛrɛ ye.

• Sira caman fɛ, an bɛ se k’a latigɛ an ka siniɲɛsigi bɛna kɛ min ye. Bibulu bɛ dusu don an kɔnɔ an ka ‘ɲɛnamaya ɲɛnatɔmɔ ani ka Ala kan minɛ’, an bɛ o kɛ an kɛtɔ k’a sugandi ka Ala ka sariyaw kan minɛ. (Dutɛrɔnɔmɛ 30:19, 20) Kɔrɔ tun tɛna kɛ nin kuma in na walima yɛrɛ o tun bɛna kɛ nijuguya kuma ye ni o y’a sɔrɔ se tun tɛ an bolo ka kow sugandi an yɛrɛ ye. Sani a ka an waajibiya k’a ka kuma fɔlenw kɛ, Ala b’a fɔ an ye ni kanuya ye ko: “Ni i tun ye i janto ne ka ci fɔlenw na, i ka hɛrɛ tun na woyo i ko baji”—Esayi 48:18.

• An ka sesɔrɔ ni an ka sesɔrɔbaliya latigɛlen tɛ an dakan fɛ. Ni an b’a fɛ ka se sɔrɔ an ka ko kɛtaw la, an ka kan ka baaraba kɛ. Bibulu b’a fɔ an ye ko “I bolo bɛ baara fɛn o fɛn sɔrɔ, i ka o kɛ ka kɛɲɛ ni i se ko ye”. (Waajulikɛla 9:10) A b’a fɔ fana ko: “Min timinan ka di baara la, o ka ko latigɛlenw bɛ a kɛ fɛntigi ye”—Ntalenw 21:5.

Ka se ka kow sugandi an yɛrɛ ye o ye nilifɛn ɲumanba de ye min bɔra Ala yɔrɔ, o de kama an ka a kanu ‘ni an dusukun bɛɛ ye’—ka d’a kan o de ka di an ye.—Matiyu 22:37.

Bibulu b’a fɔ ko Ala ye Sebaayabɛɛtigi ye, wa ko mɔgɔ si tɛ se ka dan bila a ka se la ni a yɛrɛ tɛ. (Job 37:23; Esayi 40:26) Nka o n’a ta bɛɛ, a tɛ baara kɛ ni a ka sebaaya ye walasa ka kow bɛɛ ɲɛminɛ. Misali la, Bibulu b’a fɔ ko Ala ma “a yɛrɛ jira” ka ɲɛsin Babilonɛ kɔrɔ ma, o min tun ye a ka mɔgɔw jugu ye. (Esayi 42:14) O cogo kelen na bi fana, minnu b’a bɔ u yɛrɛ la ka baara kɛ ni kow sugandili se ye, min dira u ma walasa ka mɔgɔ wɛrɛw tɔɔrɔ, Ala b’a to olu ka o kɛ. Nka Ala tɛna a to olu ka o kɛ fo abada.—Zaburu 37:10, 11.