Bibulu b’a fɔ ko Ala sago ye mɔgɔw “kana jatɔya kɛ.” (1 Tesalonikekaw 4:3) Bibulu kɔnɔ, daɲɛ min ye ko “jatɔya”, nin fɛn ninnu sen b’o la: Jɛnɛya, cɛɲɔgɔn ɲini ni musoɲɔgɔn ɲini walew ani cɛnimusoya cɛ ni muso cɛ minnu furulen tɛ ɲɔgɔn ma.

•  Ni cɛ ni muso sigira ɲɔgɔn kun k’a sɔrɔ u ma furu kɛ walima furu hukumu kɔnɔ, mun na nafa b’o la Ala bolo?

•  Cɛ ni muso ka sigi ɲɔgɔn kun k’a sɔrɔ u ma furu kɛ fɔlɔ walasa k’a lajɛ ni u bɛ taa ni ɲɔgɔn ye, o dun?

•  Furuɲɔgɔnmaw bɛ se ka u ka furu barika bonya cogo di?

• Ala de ye furu ko sigi sen kan. A y’o kɛ tuma min na a ye mɔgɔ fɔlɔw furu siri. (Jenɛse 2:22-24) A kuntilenna tun tɛ ko cɛ ni muso ka sigi ɲɔgɔn kun k’a sɔrɔ u ma u kandi ɲɔgɔn ma furu kama.

• Ala b’a dɔn min ka ɲi mɔgɔw ma. Ala ye furu labɛn walasa a ka kɛ badaa jɛ ye cɛ kelen ni muso kelen cɛ. O jɛ bɛ denbaya kɔnɔmɔgɔw bɛɛ nafa ani ka u lakana. An ka misali dɔ lajɛ. Ni mɔgɔ ye fɛn dilan, o fɛn bɛ don ɲɔgɔn na ka ɲɛ cogo min na, a bɛ o sɛbɛn fara a kan. O cogo kelen na, Ala ka ɲɛminɛliw b’a fɔ an ye an ka denbaya kɔnɔmɔgɔw bɛ se ka ɲɛnamaya kɛ kelenya kɔnɔ cogo min na. Mɔgɔ minnu bɛ tugu Ala ka sariyaw kɔ, o sariyaw bɛ olu nafa tuma bɛɛ.—Esayi 48:17, 18.

• Ka cɛnimusoya kɛ k’a sɔrɔ i ma furu, o bɛ se ka na ni kɔlɔlɔ juguw ye. Misali la, i bɛ se ka kɔnɔ ta k’a sɔrɔ i ma sigi n’o ye, i bɛ se ka dilanna bana sɔrɔ ani dusukasiba bɛ se k’i sɔrɔ. *

• Ala ye denw sɔrɔli se di cɛw ni musow ma cɛnimusoya sababu fɛ. Ɲɛnamaya ye fɛn nafamaba ye Ala bolo, wa denw sɔrɔli se min dira mɔgɔw ma, o ye nilifɛn ɲumanba ye. Ala b’a fɛ an ka bonya da o nilifɛn kan an kɛtɔ ka cɛnimusoya kɛ furu hukumu dɔrɔn de kɔnɔ iko Ala b’a fɛ cogo min na, ni an b’o kɛ an bɛ nɔɔrɔ da furu kan.—Heburuw 13:4.

Ka waati kɛ ɲɔgɔn fɛ walasa k’a “ɲini k’a dɔn ni aw bɛ taa ni ɲɔgɔn ye” ani ka dan bila o la waati min mana aw diya, o tɛ furu duman gundo ye. Nka furuɲɔgɔnmaw ye u kandili min kɛ, ni u fila bɛɛ b’u jija kosɛbɛ ka to o kan ani ka gɛlɛyaw ɲɛnabɔ ɲɔgɔn fɛ, o b’a to jɛɲɔgɔnya min bɛ u ni ɲɔgɔn cɛ, o barika bɛ bonya. * Furuɲɔgɔnmaw b’u kandili min kɛ, o bɛ furu barika bonya ka ta’a fɛ.—Matiyu 19:6.

Furu si tɛ yen min dafalen don. O bɛɛ n’a ta, furuɲɔgɔnmaw bɛ se k’u ka furu kɛ furu duman ye u kɛtɔ ka Bibulu laadilikanw waleya. O misali dɔw filɛ nin ye:

• I mago don i furuɲɔgɔn na ka tɛmɛn i yɛrɛ kan.—1 Kɔrɛntekaw 7:3-5; Filipekaw 2:3, 4.

• A’ye kanuya ni bonya jira ɲɔgɔn na.—Efesekaw 5:25, 33.

• A’y’a ɲini ka aw ka kuma fɔtaw jateminɛ.—Ntalenw 12:18

• A’ye muɲu ɲɔgɔn kɔrɔ ani ka yafa ɲɔgɔn ma joona.—Kolosekaw 3:13, 14