Yala Ala bɛ yen wa?

A BILA A LA

Yala Ala bɛ yen wa?

Bibulu bɛ jaabi min di

Ɔwɔ Bibulu bɛ dalilu caman di minnu b’a jira ko Ala bɛ yen tiɲɛ yɛrɛ la. A bɛ dusu don an kɔnɔ an ka, an ka dannaya kɔgɔ ka ɲɛsin Ala ma, an ɲɛw tugulen kana da diinɛw ka kumaw la ten. Bibulu b’a ɲini an fɛ an ka baara kɛ ni an “hakili” ni an ka keguya ye. (Romɛkaw 12:1; 1 Yuhana 5:20) An ka dalilu damadɔw lajɛ minnu sinsinnen bɛ Bibulu kan:

Ni an ye diɲɛ kɛcogo jateminɛ k’a ye ko, kow bɛɛ sigilen don cogo ɲuman na ani ko ɲɛnamaya bɛ yen, o b’a jira an na ko dabaga bɛ yen. Bibulu b’a fɔ ko: “Sow bɛɛ bɛ jɔ mɔgɔ dɔ fɛ, nka fɛn bɛɛ jɔbaa ye Ala de ye.”(Heburuw 3:4) Hali ni o hakilina faamuyali ka nɔgɔn, mɔgɔ kalannen caman sɔnnen b’a ma ko a kuma ka girin kosɛbɛ. *
An bɛ ɲɛnamaya la kun min na ani an ka ɲɛnamaya kuntilenna ye min ye, an dara ni o kow faamuyali nege ye. O nege ye fɛn sugu dɔ ye min tɛ se ka da hali ni an wasalen don fɛn wɛrɛw ko la. Bibulu b’a jira ko o ye an magola fɛn dɔ ye alako ta fan fɛ ni olu dɔw ye Ala dɔnni ni a sago kɛli nege ye. (Matiyu 5:3; Jirali 4:11) O nege min bɛ an na alako ta fan fɛ, o t’a jira dɔrɔn ko Ala bɛ yen nka o b’a jira fana ko Ala ye dabaga ye min bɛ an kanu ani min b’a fɛ an ka o nege wasa.—Matiyu 4:4.
Kiraya kuma kɛrɛnkɛrɛnnenw bɛ Bibulu kɔnɔ minnu waleyara cogo jɛlen na, san kɛmɛ caman u sɛbɛnnen kɔfɛ. O kiraya kumaw jɛya cogo ni u tilen cogo b’a jira ko u ma bɔ hadamaden na.—2 Piɛrɛ 1:21.
Dɔnniya min tun bɛ Bibulu sɛbɛnbagaw la siyansi ta fan fɛ, o tun ka bon ni mɔgɔ tɔw ta ye minnu ye ɲɛnamaya kɛ u ka waati la. Misali la, mɔgɔ caman tun b’a miiri lawale la ko dugukolo sigilen bɛ bagan dɔ de kɔ kan i n’a fɔ sama, kungo kɔnɔ lɛ walima misi. K’a sɔrɔ, Bibulu b’a fɔ ko Ala ‘ma dugukolo dulon fɛn na.’(Job 26:7) Bibulu b’a fɔ fana ko dugukolo yecogo ye ‘fɛn koorilen’ ye (Esayi 40:22). Mɔgɔ caman bolo, nin kow b’a jira ka jɛya ko Bibulu sɛbɛnbagaw ye fɛn minnu sɛbɛn, ko Ala de ye o kunnafoniw di u ma.
Bibulu bɛ ɲininkali gɛlɛn caman jaabi, o ye ɲininkaliw ye minnu jaabi sɔrɔbaliya bɛ se ka mɔgɔ bila ka ban alako ma. Misali la, ni Ala bɛ an kanu ani ni se bɛ a ye, mun na tɔɔrɔw ni ko jugu bɛ diɲɛ kɔnɔ? Mun na diinɛw bɛ mɔgɔw bila ka ko jugu kɛ tuma caman na sani ka u bila ka ko ɲuman kɛ?—Tite 1:16.

^ dak. 2 Misali la, sani Allan Sandage ka sa, ale tun bɛ ɲininiw kɛ sankolola fɛnw kan, a y’a fɔ diɲɛ ko la ko: “Diɲɛ fɛnw sigilen bɛ cogo min na ka ɲɛ, o b’a jira ne la ko, a ma bɔ fɛnw na minnu ɲagamina ten ka fara ɲɔgɔn kan. Sariya sigicogo ɲuman dɔ de y’a to o kow sera ka kɛ. Ne bolo, Ala ka kow tɛ se ka faamu nka a jɛlen don ko ale de ye danni kɛ. Ni ɲɛnamaya bɛ yen, o bɔra ale de la n’o tɛ fosi tun tɛ na kɛ yen.”