Bi maneya yen mam bia yiane bo asu ya na, bi bi éyalane nsili wu: Za ane Zambe? Bia te taté yene Bible été na, éyôlé Zambe e ne Yéhôva, a na beta fulu wé a dañe yené a ne nye’an. Bia te fe yen mam a nga bo, a mam a yiane bo asu mfi ya môta binam. Ve sa ke susu’a mam bi ne yé’é a lat a Zambe le, ô ne kômbô yem jôme wo ye bi nge ô boé mam mete.

Yéhôva a nga jô na: ‘nge w’ajeñe ma, me a ye yené be wo; ve nge w’ajô’é ma me a ye wua wo fé.” (1 Minkañete 28:9) Beta das a yange wo, nge wo kui na ô jeñe Zambe a yem avale môt a né a ne na, wo ye bo ‘ngbwa a Yéhôva’! (Besam 25:14) Avale ngbwa ete da tinane jé mfa’a wôé?

Benya meva’a. Kalate Zambe a loene Yéhôva na “Zambe ya mevak.” (1 Timothée 1:11, MN) Nge bia bo amvôé a nye a vu nye, wônaa bi aye fo’o wô’ô benya meva’a, mme mete me ne beta mvolan mfa’a nleme wongan, asimesane dangan, a minsône miangan. (Besam 33:12) Wo ye fe bi ényiñ ja ve wo benya meva’a, nge wo sa’ale mbia be mam, a bi mbamba mefulu a yeme nyiñe a bôte bevok. Wo ye bo tyiñ a ntili besam éyoñ a nga jô na: “Ve a ne mvaé mfa’a wome na, me subu bebé be Zambe.”​—Besam 73:28.

Zambe a nyoñe môt ase ya be bia ngap. Yéhôva a nga jô bebo bisaé bé na: “M’aye bôndé wo fek mise mam me lô wo.” (Besam 32:8) Nalé a tinane na Yéhôva a nyoñe môt ase ya be bia ngap aval e ne na, a jalé miñyiane mié mise. (Besam 139:1, 2) Nné ane ô late ngbwa a Yéhôva, wo ye fe yene na, aye tabe a wo melu mese.

Melu ma zu ma ye bo angôndô ya mvaé. Nge ô vaa na, Yéhôva a liti wo zene ya ényiñ é ne mevak, a volô fe wo na melu ma zu me bo angôndô ya mvaé. (Ésaïe 48:17, 18) Kalate Zambe a jô na: “Ényiñe ya melu mese e ne na, be aye yeme wo wo étam ô ne nya Zambe, be aye yeme fe nyô ô nga lôm, nnye a ne Yésus Krist.” (Jean 17:3) Mbia biyoñe bia nyiñe bi, ndi nleme Zambe a ve bia e ne aval ane étyé ba telé je besitima, nje ete ja bo na bi bo “nya ñyemetane.”​—Behébreu 6:19.

Bana be ne ve bone be mam ba liti mfi ya yeme Zambe a late ngbwa a nye. Ô ne fili ya laane a Ngaa Yéhôva ese ô ne tôbane je, ô ne fe ke fombô jw.org.