Zambe a nga té nyule jangan a ngule ya saé ébien. Éyoñe nyôle ja te balé aveñ, ébien ja taté na ja bo mam ma volô na aveñ ete e yet.

BI TAME FAS: Nge Nté biôm a nga kôme nyule jangan a ngule ya saéban étam, ye bi nji yiane tabe ndi a ngaka’a a nga bo na a ye fe saé meveñe ya minleme miangan? Ntili besam a nga jô na: “A saé ba be ne minlem ntya’an, a sôp meveñ map.” (Besam 147:3, Mfefé Nkôñelan) Ve nge nlem wo taé wo amu jam e nga boban melu ya mvus, nge di wo tôbane de den, aval avé ô ne tabe ndi na Yéhôva a ye saé meveñe môé: ataté éyoñe ji akekui melu ma zu?

Zambe a ka’ale na: “Te ko woñ, amu me ne be wo; te fombô beyéye, amu me ne Zambe wôé; m’aye ve wo ngu; ya, m’aye volô wo.” (Ésaïe 41:10) Éyoñe môt a yeme na Yéhôva a nyoñe nye ngap, nlem ô bôô nye si, a bili fe ngule ya dañ avale meve’ele ese. Nlômane Paul ô nga loen mvo’é ya nsisim éte na “mvo’é Zambe, nje éte je adañe fe’ ése.” Paul a nga beta fe jô na: “Me ne ngule ya bo mam mese be nyô a ve ma ngu.”​—Bephilippien 4:4-7, 9, 13.

Mintilane mia volô bia na bi yemete mbunan wongan bengaka’a be Yéhôva a lat a ényiñe ya melu ma zu asu bone be bôt. Éve’an é ne na, kalate Nlitan 21:4, 5 a kate bia jam a ye bo, a amu jé bi ne tabe ndi na a ye bo de:

• “A ye fimi mili’i mese” mise me bôt. Yéhôva a ye vaa minju’u miangan mise a mam ma tyelé bia minleme yôp, ja’a éyoñe bôte bevo’o ba biasé mie.

• “Nyô a to éto njôan” e yôb été a étôto’o ése, nyô a ne Ngul Ése a Njô ya biôm bise a ye belane ngule jé a éjôé jé asu na, a kômesane bia mfa’a ya minjuk, a na a ve fe bia mvolane bia yi.

• Yéhôva a ve bia ndi nleme na, bengaka’a bé be ne “été a benya mejôô.” Nalé a tinane na éyôlé nya Zambe ébien ja kôme yemete na, mejô mé ma ye fo’o tôéban.

“A ye fimi mili’i mese mise map; a awu de aye fe bo; nalé fe ôlun vi aye fe bo, nge ñyôn, nge mintaé: mame ya ôsu me lôteya. A nyô a to éto njôan éte a nga jô na, ô lô, me abo mam mese mimfefé. A a nga jô na, tili’i: amu mejô ma me ne été a benya mejôô.”​—Nlitan 21:4, 5.

Bitétéa a Bible bia liti avale môt Ésa wongan a ne yôb été a ne. Mbôle bi vo’o ji’a yemelane na Zambe a yi na bi yeme nye a bo benya Bemvoé bé a zene ya biôm a nga té, Bible a volô bia mfa’a ôte; a jô na: “Suba’ane Zambe bebé, ndemben a ye subu mia bebé.” (Jacques 4:8, Mfefé Nkôñelan) Mam Minlôman 17:27 a jô na: “A nji bo môt ase ya be bia ôyap.” (Mfefé Nkôñelan)

Avale wo ye ke ôsu a yé’é yeme Zambe, wo ye su’ulane bi beamu ya tabe ndi na “a nyoñe wo ngap.” (1 Pierre 5:7, NW) Nya mfii ya avale ndi nlem ete be Yéhôva, a ne mbé?

Bi tame kobô ajô Toru, a nyiñe Japon. Nyia a nga yalé nye a to Kristen, ve a nga viane nyiin nsamba bewôé bôte ya Japon ba loone na yakuza. A jô na: “Me mbe me buni’i na Zambe a vini ma, a na a foñesô ma a zene ya awu ya bôte be mbe ma fefel, e dañe dañe ba ma to me nye’e.” Toru a meme na, mbia vôm ate a mbia nsisime ya été a nga bo na a bo avale môt e ne “njet a teke nkoon éngôngol.” A lat a nsôñane wé, a jô na, “Me mbe me kômbô wu me to ésoé mvuse ya na, me wôéya môt be mbe be wumulu a dañe ma asu na ma fe me bi beta éyolé.”

Ve, éyoñe Toru ba ngal be nga yé’é Bible, Toru a nga bo beta mintyendan ényiñe jé. Hannah a jô na, “Me nga yen ane nnôme wom a tyendé ma e mis été.” Éyoñe ji, Toru a jô teke bisô nleme na: “Zambe a ne fo’o vevee a a nyoñe môt ase ya be bia ngap. A nji yi na môt éziñ a wu, a a ne ôjeja’a ya  jamé bôte ba kôme jôbane bikobe biap. A vô’ôlô jam ese bi vo’o jô môte mfe, ve nye; a wô’ô fe mam bôte bevo’o be vo’o kui na be wôk. Ana’ana, Yéhôva a zu vaa minju’u mise, mejô a mintaé mise. Ja’a éyoñe ji, a volô bia a abui mezen avale bia vo’o buni. A nyoñe bia ngap, a nyii fe bia éyoñe bi ne nte’an.”​—Besam 136:23.

Avale nlañe Toru wo liti, e yeme na Zambe a ne bo na minju’u mi man, a na, ana’ana, a zu mane vaa mie, a fimi fe mili’i mese, a ve ke bia ve ndi nlem asu ényiñe ya melu ma zu, a volô fe bia na, bi bi mbamba ényiñe den. Ôwé, ja’a émo é ne njalan a minjuk, bi ne ngule ya bu’uban nyoñane ngap Zambe a nyoñe bia ngap.