E tebe été môte mbok a tinane na, “e bo ngule ya wô’ôtane mintaé mié nge na, ô ne ve’ele fas aval womien ô ne wô’ôtane nge wo ô bili nju’u ôte.” Rick Hanson, Dokita a yem ajô akone ya nlô a jô na, “bi nga bialé a fulu ya wô’ô été bôte bevo’o be tele.”

BI TAME FAS: Amu jé bia yeme tebe été bôte bevok, fulu é nji yené be bitétéa bivok? Bible a liti na Zambe a nga té bone be bôt éve’ela jé. (Metata’a 1: 26) Bi nga tééban éve’ela Zambe avale di na, bi ne ngule ya bi mefulu mé a liti bôte bevo’o mbamba mefulu mé abim éziñ. Nde ñhe, éyoñe ñwô’ane mintaé wo tindi bôte na be volô bôte bevok, ba vu fulu Nté wop, Yéhôva Zambe nnye a yeme wô’ô bôte mintaé.​—Minkana 14:31.

Zambe a yeme tebe été jangan, a vini fe éyoñe bi tele minju’u été. Bible a jô a lat a ayoñ Israël ya melu mvus, nje te e nga jibi ngul étibela’a Égypte a ayet ényiñe tañe mimbu 40 nkôte si, na: “Nju’ ôse be nga yen, nnye fe a nga yen nju’ été.” (Ésaïe 63:9) Ba’ale na, Zambe a nji su’u ve na a yemelane nju’u wop. A mbe ngule ya wô’ôtane mintaé be mbe be bili. A nga jô na: “Me yeneya fo’o e beta njuk ayoñ dam da tôbane de.” (Nkôlan 3:7, Mfefé Nkôñelan) Zambe a jô fe na: ‘Nyô a nambe mia, nnye a nambe nyia dise wom.’ (Zacharie 2:8) Éyoñe bôte bevo’o ba bo na bi juk, nnye fe a wô’ô mintaé.

Bible a ve bia ndi nleme na, to’o mone môte ya nlem a ve bia mekua, a na bi nji yiane na Zambe a wô’ô bia mintaé, “Zambe a dañe minlem miangan, a nnye a yeme mam mese.” (1 Jean 3:19, 20) Zambe a yeme bia a dañ abim bia yeme biabebien. A kôme yeme bité bise bi ne tebe, asimesane dangan, a avale bia wô’ôtan. A wô’ô fe bia mintaé.

 Mintilane mia ve bia ndi nleme na

• “W’aye loen, a Yéhôva a ye yalan; w’aye yôn; wôna a ye jô na, Me nyô.”​—ÉSAÏE 58:9.

• “Amu m’ ayem asimesan m’asimesan ajô denan, nalé Yéhôva a jô, asimesane ya mvo’é, sa di ya abé, a ve mia ndi minlem ajô asu’ulane denan. Mi aye loene ma, a mi aye ke a ye’elane ma, a m’aye vô’ôlô mia.”​—JÉRÉMIE 29:11, 12.

• “Futi’i mili’i mam nde’e jôé été; ye mili’i mete me nji bo ntilan kalate wôé été?”​—BESAM 56:8.

Ye e yeme na Zambe a yeme tebe été jangan a ne volô bia na bi dañe meve’ele bia tôbane me? Tame yen éve’ane Maria:

“Me mbe me wô’ôtane na ényiñ é ne ayet a ékotekot amu beta mintaé me nga bi éyoñe mone wom a nga wu a bili mimbu 18, e koone na, a juaneya a cancer tañe mimbu mibaé. Me nga wô’ô Yéhôva ôlun amu a nji bo jôm éziñ asu na a bo mvo’é.

“Mvuse mimbu misaman, mvôé jam ja nye’e ma, e wô’ô fe ma mintaé akônda été, e nga wô’ô ma me jô’ô na, ma yene na Yéhôva a vini ma. A nga vô’ôlô ma, teke tyi’i ma nkobô tañ abui mewolo; mvuse ya valé a nga lañe ma éfus é nga nambe ma abui. Éfuse éte é mbe kalate 1 Jean 3:19, 20 a ja jô na: ‘Zambe a dañe minlem miangan, a nnye a yeme mam mese.’ A nga kate ma na Yéhôva a yeme minju’u miangan.

“Akusa bo nalé, e mbe ayaé na ôlune wom ô man! Ane me nga lañe kalate Besam 94:19, vôme Bible a jô na: ‘Éyoñe nleme wom ô nga jaé a minsimesan, ô nga volô ma, ô nga ve ma avak.’ (Mfefé Nkôñelan) Me nga wô’ôtane ve ane éfus éte e nga tiliban fo’o ve asu dam! Me nga su’ulan bi meva’a ya kate Yéhôva mam ma ndeñele ma, me yeme’e na a vô’ôlô ma, a wô’ô fe ma.”

Abime ngule nyule bia bi éyoñe bia yeme na, Zambe a wô’ô bia, a na a wô’ô fe bia mintaé! Ve, amu jé bia tôban abim abui minju’u di? Ye Zambe nnye a foñesô bia amu mbia mimboane miangan? Ye Zambe a ye ke bo jôm éziñ asu na minju’u mise mi man? Nlô ajô wo zu tôñe valé wo zu ve bia biyalane ya minsili mite.