Éyoñ mon a so abume be nyia, minute 60 mi ôsu mi ne nya mfii asu na mon ate a bi mam ma sili na a yaé mvo’é. Amu jé? Amu benyia ba belane minute mite na be ji’a late ngule minkañ a minkeñelé mi bone miap, nalé a volô be na be yaé avale da yian. *

Jé ja tindi nyia na a ji’a nyoñe ngap a mone wé a te bialé? Ñye’ele Jeannette Crenshaw a liti e kalate The Journal of Perinatal Education na, hormone ba loone fulasi na ocytocine “a volô nyia na, a ji’a wô’ôtan abui mam nleme wé été éyoñ a nambe mone wé a ndôme bialé, éyoñ a fombô nye, a éyoñ a nyaa nye.” Hormone mfe “a volô fe nyia éyoñ éte ébiene na a ji’a jalé miñyiane mi nkeñelé mone wé,” a nalé a ji’a fe yemete élate jap. Amu jé jam ete e ne mfi?

Yéhôva Zambe, Nté wongan a nye’e bia, nnye a nga té ngul élat é ne zañe nkeñelé mon a nyia. * Njô bôte David a nga meme na Zambe a nga ‘vaa nye abum été’ a bo na, a bo te ko woñ e mo me nyia été. A nga ye’elan a jô’ô na: “Be nga kee wo ma me so’ abum; ô ne Zambe wom ataté éyoñ nyia wom a nga biaé ma.”​—Besam 22:9, 10.

BI TAME FAS: Nge Zambe a nga kôme nta’ane mam ô ne abim édo’o di, asu ya na nyia a nyoñe ngap a mone wé a nye’an ôse, a jalé’é miñyiane mi mone wé, ye nalé a nji yiane na bi simesane na, Zambe a nyoñe fe môt ase ya be bia ngap, bia bi ne “bone be Zambe”?​—Mam Minlôman 17:29.

Yésus Krist, môt a yeme Nté wongan a dañe môt ase, a nga ye’ele na: “Ye be nji kuane bemvokuma bebaé frank jia? Ve da, teke wua ya be be a ne ku si, ésoo wônan teke yem. Mfa’a wônan, to’o ésile jenan ése, é ne nlañan. Ajô te ñhe te koone woñ: mia mi ne beta tañ a dañe ézu’u bemvôkuma.”​—Matthieu 10:29-31, Mfefé Nkôñelan.

Abui ya be bia é nji dañe fas ajô bone b’anon bia yen, bia ke jôô éyoñe “wua ya be be a ne ku si.” Ve Ésa wongane ya yôp a yene wua ase ya be be! A anon ébien, ja’a na é ne abui é vo’o bo dia e mise mé a dañe mone môte wua. Ñye’elane wo so valé  ne sañesañ: Ô nji ‘yiane ko woñ’ na Zambe a nji yene wo. Nya ajôô a ne na, a wô’ô wo nya mintaé!

Mintilane mia ve bia ndi nleme na

• “Mise me Yéhôva me ne vôm ase, m’anonô ba be ne abé a ba be ne mvaé.”​—MINKANA 15:3.

• “Mise me Yéhôva m’afombô bôt be ne zôsô, a melo mé me yoo mfa’a ya ñyône wop.”​—BESAM 34:15.

• “M’aye yen mvaé a vak amu mvame jôé; amu ô yeneya ékpwe’ele jam: ô yemeya nleme wom biyoñe ya njuk.”​—BESAM 31:7.

Ye bi ne yene mam aval afe nge bia yeme na Zambe a yi fo’o na bi nyiñe meva’a été a na, a volô bia a nye’an ôse? Teke bisô, fo’o ve avale Hannah, * minga ya Angleterre a jô:

“Abui biyoñ, me mbe me wô’ôtane ve ane Yéhôva a nji nye’e ma a na, a nji yalane meye’elane mam. Me mbe me simesane na, a ne amu me nji bi mbunan. Me mbe me wô’ôtane ve ane ma tôbane fonos nge na, a nji bisi ma amu me nji bo mfi. Me mbe fo’o me wô’ôtane ve ane a nji nyoñe ma ngap.”

Ve éyoñe ji, Hannah a nji beta sili nge Yéhôva a nyoñe nye ngap a nge a nye’e nye. Jé e nga volô nye na a tyendé ôsimesane wé? A jô na: “Ntyendan ô nga so ôte’ete’ ôte’etek. Ma beta simesane nkañete ya mengana bôt ô nga bobane den a nto abui mimbu, ô kobô’ô ajô ntañ Yésus a nga ve, a jam ete e nga nambe ma nya abui a volô ma na, me wô’ôtane na Yéhôva a nye’e ma. A nde fe, éyoñe me nga yene biyalane ya meye’elane mam, me nga taté na ma yôn amu me nga yene na, Yéhôva a nye’e fo’o ma. A zene ya Bible a ntabane bisulane Bekristen, ma te yé’é abui mam a lat a Yéhôva, mefulu mé, a aval a yene bia. Éyoñe ji me nga yene mvolan a nye’ane Yéhôva ne ngeññ, a nkômban a bili na a nyoñe ngap a môt ase ya be bia.”

Mejô me Hannah ma ve ngule nyul. Ve aval avé ô ne tabe ndi na Zambe a wô’ô wo, a na, a wô’ô fe avale wo wô’ôtan? Nlô ajô wo tôñe valé wo zu yalane nsili ôte.