1. Jé Yésus a nga jô a lat a akume ya yôp?

SA KE akum ese nde bi ne yen a mis. Nya ajôô a ne ne na, nya akumu a ne te dañe yené. Nkañete a nga bo nkôle yôp, Yésus a nga kobô ajô akum éziñ e ne mfi a lôte biôm bi mo. Éyoñ éte a nga beté na: “Vôm a nee wo akum, vôm ate fe nleme wôé ô né.” (Mt. 6:19-21) Nlem ô wô’ô bo ô tindi’i bia na bi tôñesane mam bia yene nya mfii. Bia ‘kôan akume yôp’ éyoñ bia jeñe na bi bi mbamba éyôlé mise me Zambe. Aval akum ete e vo’o ndamane môs éziñ.

2. (a) Melebe mevé Paul a ve bia kalate 2 Becorinthien 4:17, 18? (b) Jé bia zu yen ayé’é di?

² Nlômane Paul ô nga lebe bia na bi “lôbô . . . mam me ne te yené.” (Lañe’e 2 Becorinthien 4:17, 18.) Mam méziñe ya été me tii a bibotane bia ye bu’ubane bie mfefé émo. Ayé’é di, bia zu kobô ajô mam menyin me ne te yené bia bu’ubane me den: amvôé dangan a Yéhôva, meye’elan, mbamba nsisim, a avale Yéhôva, Yésus a beéngele ba su’u bia ésaé nkañete. Bia zu fe yen aval avé bi ne liti na bia nyane bidima bi mam bite.

3. Édima das évé bi vo’o kui na bi yen a mis, a bi nga bi je a zene fé?

³ Amvôé dangan a Yéhôva é ne beta édima das bi vo’o yen a mis. (Bs. 25:14) Aval avé Zambe a ne étyi a ne ngule ya lat amvôé a bôte be be’e metyi ya abé? Jam ete  e ne ngule ya boban amu ntañ Yésus ô nga “vaa mam abé” me bôte ya si nyô. (Jean 1:29) Ôsusua na Yésus a wu, Yéhôva a mbe a yeme’e na a ye wulu ba’aba’a a nye akekui awu, ndemben a ye nyii bone be bôt. Jôm ete nje Yéhôva a nga lat amvôé a bone be bôt ayab éyoñ ôsusua na Krist a zu kôté bia.​—Bero. 3:25.

4. Ye ô ne kate bia bôte béziñ be mbe bemvôé be Yéhôva ôsusua na Krist a so si va?

⁴ Bi tame kobô ajô bôte béziñe be nga bo bemvôé be Zambe ôsusua na Krist a zu si va. Abraham a mbe môte wua ya été. A nga bili ngule mbunan aval é ne na, mimbu 1 000 a mvuk mvus awu dé, Yéhôva a nga ke ôsu a loone nye na “mvôé jam.” (És. 41:8) Nalé a liti na, éyoñ môt a ne mvôé Yéhôva, to’o awu ébien é vo’o kandé be. Abraham a ngenan a vee ôsimesane Yéhôva. (Luc 20:37, 38) Job fe a mbe mvôé Yéhôva. Môs éziñ Yéhôva a nga se’e nye beéngele bese be too. A nga jô na Job “a ne nya mvo’é a zôsôô, . . .  a ko Zambe woñ, a lume mbia be mame mvus.” (Job 1:6-8) Aval avé ki Yéhôva a mbe a yene’e Daniel, mbo ésaé wé a nga nyiñe mimbu bebé 80 éza si, vôme bôt be mbe te kañe Zambe? Beéngele be nga kate Daniel biyoñe biyoñ bilale na a ne ‘môte Zambe a nye’e abui.’ (Dn. 9:23; 10:11, 19) Teke bisô na Yéhôva a ne ôjeja’a ya wômôlô bemvôé bé bese be maneya wu.​—Job 14:15.

5. Jé bia yiane bo asu na bi bo bemvôé be Yéhôva?

⁵ Bôte tañ aya be ne bemvôé be Yéhôva den? Bemillion be bôt be ne bemvôé be Yéhôva. Bia yeme de amu, meku’u mesi menyin, abui befam a binga, to’o bobe bongo, ba liti a ntabane wobe na be ne benya bemvôé be Zambe. Bible a jô na Yéhôva “a ñbwaane bôte be ne mvaé.” (Min. 3:32) Amvôé éte é ne ngule ya boban amu bôte bete ba buni ntañe Yésus a nga ya’an. Ntañ ôte ñwô wo bo na Yéhôva a kañese na bi ve biabebiene ngumba be nye a duban. Éyoñ bia bo mam mete mebaé, bia nyiine nsamba bemillion be bôt ba bu’ubane “mbamba élat” a Nyô a dañe bôte bese si a yôp!

6. Aval avé bi ne liti na bia nyan amvôé dangan a Yéhôva?

⁶ Aval avé bi ne liti na bia nyan amvôé dangan a Yéhôva? Fo’o ve aval Abraham ba Job be nga bo Zambe ésaé mban mimbu ntet a mvuk, bia fe bia yiane bo mbane ya bo Yéhôva ésaé to’o bi lôô na mimbu mi ne ve lôt. Ane Daniel, bia yiane nyan amvôé dangan a Yéhôva adañ ényiñe jangan. (Dn. 6:7, 10, 16, 22) Yéhôva a ne volô bia na bi jibi avale nju’u ese, a na bi ba’ale ngul élat a nye.​—Beph. 4:13.

7. (a) Kalate Minkana 15:8 a liti na Yéhôva a wô’ô aya éyoñ bia ye’elane nye? (b) Aval avé Yéhôva a yalane meye’elane mangan?

⁷ Meye’elane me ne jam afe e ne te yené. Benya bemvôé ba nye’e be lôt éyoñ na ba laan. Ye e ne fe nalé asu amvôé dangan a Yéhôva? Ôwé! A zene ya Bible, Yéhôva a kate bia asimesane dé a aval a wô’ôtane mam. Bia fe bia laan a nye éyoñ bia ye’elan, bi kulane nye mam mese me ne bia nlem. Yéhôva a nye’e a vô’ôlô meye’elane mangan. (Lañe’e Minkana 15:8.) Ve mvôé jangan é nji su’u ve na ja vô’ôlô  meye’elane mangan, a yalane fe bia. Biyoñ biziñ a ji’a fo’o yalan. Ve biyoñ bivok, bia yiane sili nye jôme jia biyoñ biyoñ. Ve bia yeme na mbamba éyoñ, a ye yalane bia avale da yian. Yéhôva a ne fe bo bo te ve bia jam bia sili nye. E ne kui na bi sili nye na a vaa bia meve’ele méziñ été, ve nye a nga jibi ve bia fek a “ngule ya jibi me.”​—1 Bec. 10:13.

8. Aval avé bi ne liti na bia nyane mvome bi bili na bia ye’elane Yéhôva?

⁸ Aval avé bi ne liti na bia nyane beta mvome bi bili na bia ye’elane Yéhôva? Jam ôsu é ne na bi bo bi ‘ye’elan éyoñ ése’ aval a jô bia. (1 Bet. 5:17) Yéhôva a yemete ki môte na a ye’elane nye. A semé fili jangane ya nyoñe mintyi’an, ve a lebe bia na bi bo “mbane meye’elan été.” (Bero. 12:12) Ajô te bia liti na bia nye’e das a nga bo bia éyoñe bia ye’elane nye mbane môs ôse ya yôp. Ve meye’elane mete été, bi nji yiane vuane ve nye akiba a duma.​—Bs. 145:2, 3.

9. Mojañ éziñ a wô’ôtan aya éyoñ a ye’elane Yéhôva? Wô’ô ki?

⁹ Nté bia ke ôsu a bo Yéhôva ésaé a yen ane a yalane meye’elane mangan, nne fe bia bo ntindane ya tu’a ve nye akiba nalé. Chris, mojañ éziñ a ne nkpwa’a mefan den a nto mimbu 47 a jô na: “Ma nye’e me kunu’u kôlô si asu na me ye’elane Yéhôva. Ényiñ é ne mbia mvaé éyoñe wo laan a Yéhôva nté tyé ja ke ja lende, éyoñ éte wo kui mis a yen ane môs ô ne abeñ! Jam ete da tindi ma na me ve nye akiba asu mam mese a ve bia, to’o asu mvome ya ye’elane nye. Wônaa éyoñe fe ma ke dibe môs a meye’elan, ma ke ôyo nlem ô bôô ma si ne mieññ.”

10. Amu jé bia yiane nyane mbamba nsisim?

¹⁰ Bia yiane fe nyane das éfe Zambe a nga bo bia: mbamba nsisime wé. Yésus a nga lebe bia na bi ja’é Zambe mbamba nsisime wé. (Luc 11:9, 13) A zene ya  mbamba nsisim, Yéhôva a ve bia ngule jé é ne te ave’an. (2 Bec. 4:7; Mam. 1:8) Mbamba nsisim a ne volô bia na bi jibi minju’u mise bia tôbane mie.

11. Aval avé mbamba nsisim a volô bia?

¹¹ Mbamba nsisim a ne fe volô bia na bi yeme be’e mimbe’e Yéhôva a ve bia. Mbamba nsisim a ne yañele bia asu na bi tu’a bo atyeñ. Jôm ete nje, éyoñ ése bia te yeme bo ésaé éziñ, bi nji yiane simesane na bia te bo je a ngule jangan, ve bia yiane yeme na mbamba nsisime Yéhôva nnye a te volô bia.

12. Kalate Besam 139:23, 24 a liti na mbamba nsisime Yéhôva a ne volô bia na bi bo jé?

¹² Bia liti fe na bia ve Zambe akiba asu mbamba nsisime wé éyoñ bia ye’elane nye na a volô bia na bi ji’a yemelan éyoñ ése mbia b’asimesan, nge ke mbia minkômban ba nyiine bia nlem. (Lañe’e Besam 139:23, 24.) Nge bi sili de Yéhôva, mbamba nsisime wé a ye bo ngule ya volô bia na bi yemelan asimesane dangan a minkômbane miangan mi ne abé. Éyoñe ki bi yemelaneya de, bia yiane sili Yéhôva ngule ya titane mbia b’asimesan a mbia minkômbane mite. Nalé a ye liti na bi bili nkômbane ya bo mam mese ma sili asu na Yéhôva a ke ôsu a volô bia a zene ya mbamba nsisime wé.​—Beép. 4:30.

13. Aval avé bi ne ve Yéhôva akiba asu mbamba nsisime wé?

¹³ Bi ne fe tu’a ve Yéhôva akiba asu mbamba nsisime wé éyoñ bia fase mam mese bi ne ngule ya bo den amu dase dé éte. Ôsusua na Yésus a ke yôp, a nga jô beyé’é bé na: “Mia ye nyoñe ngu éyoñe mbamba nsisim a ye zu be mia: mia ye bo bekañete bam . . . akekui mfa’a si nyô ja dañ ôyap.” (Mam. 1:8) Mejô mete ma kôme tôébane den. Mbamba nsisime Yéhôva a volôya na bôte bemillion mwom a étun, be sulane meku’u mesi menyine na ba kañe Yéhôva. Bia bu’ubane fe paradis ya nsisim amu  mbamba nsisime Yéhôva a volô bia na bi bi mefulu ane nye’an, mevak, mvo’é, njiban, mvam, mbamba nlem, évôvoé, mbunan, a fulu njôane nlem. Fulu ése ya été é ne ngabe jia ya ‘ébuma ya nsisim.’ (Beg. 5:22, 23) Teke fo’o aval afe, mbamba nsisim a boya édima das!

14. Beza ba su’u bia ésaé nkañete?

¹⁴ Jam afe e ne te yené e ne mvome bi bili na “bia be [Yéhôva, Yésus a beéngele] bia bo ésaé” fufulu. (2 Bec. 6:1) Bia saé a bôte bete bese éyoñ bi ne nkañete. Paul a nga kobô ajô ba bekañete mbamba foé bevok a jô’ô na: “Bi ne beébe bebo bisaé be Zambe.” (1 Bec. 3:9) Éyoñ bia nyoñe ngab a ésaé nkañete, bi ne fe beébe bebo bisaé be Krist. Nga ô ngenan ô simesa’ane jam a nga ka’ale beyé’é bé éyoñ a maneya jô be na be “bo [bôte ya] meyoñe mese beyé’é”? A nga bo be ngaka’a nyi: “Ma ye tabe be mia.” (Mt. 28:19, 20) Beéngele ki? A ne beta ébotane na beéngele be wulu bia nté bia kate bôte “be to si” “mbamba foé ya nnôm éto!”​—Nli. 14:6.

15. Va’a éve’an ja liti aval avé Yéhôva a su’u ésaé nkañete?

¹⁵ Jé bia kui na bi bo amu Yéhôva, Yésus a beéngele ba su’u bia? Éyoñ bia miase fese ya Éjôé, fes éte é wô’ô ku be bôte be bili mbamba minlem, a yaé. (Mt. 13:18, 23) Za nnye a bo na benya mejôô bete be yaé a wum bibuma? Yésus a jô na môt a ne bo ñyé’é wé vengevenge ve “Tate . . . a dutu nye.” (Jean 6:44) Kalate Zambe a yemete jam ete. Tame simesan éyoñe Paul a nga kañete nsamba binga tisone ya Philippes. Bible a kobô ajô minga wua ya été (Lydie) a jô’ô na: “[Yéhôva] a nga dutu nye nlem a tu’a wô’ô mejô Paul a nga jô.” (Mam. 16:13-15) Aval ane Lydie, Yéhôva a dutuya bemillion be bôte befe be nye.

16. Za a yiane nyoñe duma éyoñ ésaé nkañete jangan ja wume mbamba bibuma?

¹⁶ Za a yiane nyoñe duma éyoñ ésaé nkañete jangan ja wume mbamba bibuma? Paul a nga ve éyalane ya nsili ôte éyoñ a nga tili akônda ya Corinthe mejô ma: “Ma me nga bé, Apollos a nga sôé mendim; ve Zambe a nga yale. Nalé ate, nyô a bé a se jôm, nalé fe nyô a sôé mendim; ve Zambe, nyô a yale.” (1 Bec. 3:6, 7) Aval ane Paul, bia yiane bi fulu ya ve Yéhôva duma éyoñ ése nkañete wongan wo wume mbamba bibuma.

17. Aval avé bi ne ve Yéhôva akiba asu mvome bi bili na bia saé fufulu a nye, a Mone wé a beéngele?

¹⁷ Aval avé bi ne ve Yéhôva akiba asu mvome bi bili na bia saé fufulu a nye, a Mone wé, a beéngele? Bi ne de bo éyoñ bia jeñe mezene ya kañete bôte bevo’o mbamba foé. Bi ne kañete “vôme bôte be too a menda menda.” (Mam. 20:20) Abui da nye’e da kañete bôte ba tôbane be atemetem. Éyoñ ba tôbane môt aval ete, ba batane nye a ôsesa a jeñe na be taté minlañ. Nge môt ate a kañese laan a be, ba jeñe mezene ya miase fese ya mbamba foé.

18-19. Jé bia yiane bo asu na bi sôé mendime fese bia te bé? (b) Va’a éve’ane ja liti avale Yéhôva a nga volô ñyé’é Bible na a tyendé.

¹⁸ “Beébe bebo bisaé be Zambe” be nji yiane su’u ve na ba bé fese ya benya mejôô, ba yiane fe sôé je mendim. Éyoñ  môt a liti na a nye’e Mejô me Zambe, bia yiane ve ngul ése asu na bi bulane ke yene môt ate, nge kôm a mojañe mfe na a ke yene nye asu na ayé’é é taté. Nté ayé’é da ke ôsu, bia wô’ô mvaé ya yen avale Yéhôva a volô ñyé’é Bible ate na a tyendé mefulu a asimesane dé.

¹⁹ Bi tame zu kobô ajô mojañ éziñ a nga taté be mbo mengañ Afrique du sud. A nga nye’e mam a nga yé’é Bible. Ve e nji be tyi’ibi na a kañese jame Kalate Zambe a ye’ele a lat a ajô ya laan a bewu. (Dt. 18:10-12) Ôte’ete’ ôte’etek, a nga jô’é na Zambe a mé ôsimesane wé. Akusa bo a nji be a bili ésaé éfe, a nga su’ulane jô’é ésaé mbo mengañ. Den a mbili mimbu 60, a jô na: “Ma ve Bengaa be Yéhôva akiba amu be nga su’u ma nya abuii, be nga volô volô fe ma na me bi mfefé ésaé. Ve Yéhôva nnye ma dañe ve akiba, amu a nga volô ma na me bo beta mintyendan ényiñe jam. Den me dubaneya, a ma kañete mbamba foé ya Éjôé.”

20. Ntyi’an ôvé wo nyoñ?

²⁰ Ayé’é di, bia te kobô ajô bidima bi biôm binyin bi ne te yené. Amvôé dangan a Yéhôva nje é tele biôm bite bise ôsu. Éyoñ bi nto mvôé Yéhôva, bi ne fili ya ye’elane nye, mbamba nsisime wé a ne volô bia, a bi ne saé fufulu a Zambe, a Yésus, a beéngele. Ngo’o nge bia ke ôsu a liti Zambe wongane na bia nyane bidima bi biôm bite! Te bia ve’ele vuane ve Yéhôva akiba môs éziñ asu mvom a ve bia na bi bo bemvôé bé!