Éyoñe Yésus a mbe yôp, a nga yé’é mefulu me nga volô nye na a bo mbamba ébe mbo ésaé. Jôme te nje, éyoñ a mbe si va, a mbe a yeme’e saé a bôte bevok. Aval avé mbamba éve’ela Yésus a ne volô bia. Nge bi kôme bindi éve’ela jé, bi ne bi miñye’elane milal mi ne volô bia na bi bo mbamba beébe bebo bisaé. Miñye’elane mite mii volô bia na bi saé a bôte bevo’o mvo’é été.

Mbamba ébe mbo ésaé a ne éjote nyul. A semé bôte ba be nye ba saé. A telé ki émien ôsu. Yésus a nga yé’é fulu éjote nyul éte be Ésaa wé. Akusa bo na Yéhôva étam nnye a yiane be’e éyôlé Nté biôm, ve a nga yi na bôte be yeme na Mone wé fe a nga nyoñe ngab ésaé éte nya abuii. A nga liti de éyoñ a nga jô na: “Bi tame bo môt éve’ela’a jangan.” (Met. 1:26) Mejô mete me nga liti Yésus na Ésaa wé a ne nyaa éjote nyulu.​—Bs. 18:35.

Éyoñ a mbe si va, Yésus fe a nga liti fulu éjote nyul. Éyoñe bôte be mbe be se’e nye amu mam a mbe a bo’o, Yéhôva nnye Yésus a mbe a va’a duma. (Marc 10:17, 18; Jean 7:15, 16) Yésus a nga ve ngul ése na a nyiñe mvo’é a beyé’é bé. A mbe a nyoñe’e be ane bemvôé bé, sake ane alo. (Jean 15:15) A nga sôbe be mebo asu na a ye’ele be fulu éjote nyul. (Jean 13:5, 12-14) Bia fe bia yiane semene bôte bia be be bia saé, a lôte na  bi telé miñyiane miangan ôsu. Ésaé ja boban angôndô ya mvo’é éyoñe ‘môt ase a semé nyô mbok,’ teke jeñe na a wumulu émien.​—Bero. 12:10.

Môt a ne éjote nyul a yeme na mam “ma teléban ngu be abui bebôndé mefek.” (Min. 15:22) To’o môt a ne atyeñ aya, a yiane yeme na teke môt éziñ a ne yeme bo mam mese. To’o Yésus émien a nga meme na a nji be a bili ñyeman ôse. (Mt. 24:36) Akusa bo beyé’é bé be mbe be be’e metyi ya abé, a mbe a jeñe’e na a yeme ôsimesane wop. (Mt. 16:13-16) Bia kôme ñhe wôk amu jé beyé’é bé be mbe be nye’e be too a nye! Avale te da da, éyoñe bi ne éjote nyul, bia yeme minné miangan, bia vô’ôlô ôsimesane bôte bevok, bia jeñe mvo’é zañe bia be bôte bevok, a nalé a bo na mam me “teléban ngu.”

Bemvendé ba dañe yiane vu Yésus éyoñe ba saé nsamba. Ba yiane yeme na mbamba nsisime Yéhôva a ne tindi mvendé ése na é jô jam e ne bo na be nyoñe mbamba mintyi’an. Ajô te, éyoñe ba bo bikôane biap, nge ba bo na mvendé ése é bo fili ya ve ôsimesane wé teke ko woñ, nalé é bo na mintyi’an bé nyoñ mi bo mfi asu akônda ese.

Mbamba ébe mbo ésaé a yeme tebe été bôte ba be nye ba saé. A nji bo avale môt e ne na, nge a beme sen, teke môt a ne té je. Yésus a nga yiane yen ane Ésaa wé a yeme tebe été bôte bevok abui biyoñ. Éve’an é ne na, Yéhôva a nga lôme nye na a zu kôté bôt a too ke na be mbe be yian awu.​—Jean 3:16.

Yésus a mbe a kañese’e tyendé mam méziñ éyoñ e mbe e sili’i na a bo de. Tame simesan aval a nga volô minga ya Phénicie, a too ke na Zambe a nga lôme nye asu nda bôte ya Israël. (Mt. 15:22-28) Nde fe na, a nji be a sili’i beyé’é bé mam me mbe me lôte’e be nkôñ. Éyoñe mvôé jé, Pierre, é nga sôane nye bôt été, Yésus a mbe nkômesane ya jamé nye. Mvuse ya valé, a nga ve Pierre beta mimbe’e. (Luc 22:32; Jean 21:17; Mam. 2:14; 8:14-17; 10:44, 45) Éve’ela Yésus ja liti na é ne mfi na “évôvoé [jangan] é yené’é be bôte bese.”​—Beph. 4:5.

Éyoñe bia yeme tebe été bôte bevok, nalé a bo na bi saé a avale bôt ese e mvo’é été. Yésus a mbe a nyiñi’i mvo’é a avale bôt ese. Ajô te, besiñe bé be nga jô na “a ne mvôé  benyoñe taxe, a bôt be ne abé,” mbe bete ki be nga kañese benya mejôô. (Mt. 11:19) Ye bia fe bi ne vu Yésus mfa’a ya saé mvo’é été a avale bôt ese? Mojañ Louis a nga saé ayab éyoñe Béthel a bôte ba so bevôme bevôm. A jô na: “Me nga ve’e bôte bete a mfin ô ne nlôñan a meko’o mevale meval. Éyoñe ba telé ako’o ese afôla da yian, nalé a bo na mfin a bo ne tiññ. Ajô te, me nga jeñe na me sôane mamien bevôm béziñ asu na mfin ôte ô bo tetele.” Mojañ ate a nga bili fo’o angôndô ya mbamba ñyenane mam!

Biyoñe bivé bia yiane liti na bia yeme tebe été bôte ya akônda dangan? Bi bili fane ya liti de éyoñe bia kañete a bobejañe ya angôse nkañete dangan. E ne kui na bi kañete a bobejañ be bili adite mimbe’e menda me bôte map, nge ba bia be be bi nji bo ôkala. Ye bii fo’o tu’a yeme tebe été bobejañe bete a sôane biabebien asu na bi volô be na be tu’a bu’uban ésaé nkañete?

Mbamba ébe mbo ésaé a ne “nkômane ya volô.” (1 Tim. 6:18) Nté ôse Yésus a nga saé ba Ésaa wé, a nga yene na A nji be a solé’é nye mam. Éyoñe Yéhôva “a nga telé yôp,” Yésus “a mbe,” nalé a nga volô nye na a yé’é abui mam. (Min. 8:27) Mvuse ya valé, Yésus fe a nga kate beyé’é bé “mam mese [a] nga wô’ô” be Ésaa wé. (Jean 15:15) Bia fe bi ne vu Yéhôva éyoñe bia kate bobejañ a besita mam bia yem. Mbamba ébe mbo ésaé a ne ôjeja’a ya liti bôte bevo’o mam a yem, a koo ke woñe na bé dañe nye nge ke be’e mimbe’e mife a lôte nye. A ne meva’a ya kate bôte bevo’o mbamba be mam a te yé’é.

Bia yiane fe kobô mam ma ve bobejañe ngule nyul. Éyoñe môt a se’e bia asu mbamba jam bia te bo, nga jam ete da ve bia nlem avak? Yésus a mbe a nyoñe’ éyoñe ya kate beyé’é bé mbamba be mam be mbe be bo’o. (Fombô’ô fe Matthieu 25:19-23; Luc 10:17-20) Yésus a nga jô na bé “bo fe mam ma dañ” émmé. (Jean 14:12) Alu a nga kandane lôt a minlômane mié, a nga jô mie na: “Mia mi ne ba be nga tabe be ma meve’ele mam été.” (Luc 22:28) Mejô mete me nga yiane ve beyé’é bé ngule nyul. Nge bia fe bia se’e bôte bia be be bia saé, bé bo mevak a tu’a saé a ngul ése.

Mojañ Kayode a jô na: “E nji sili na mbamba ébé mbo ésaé a bo zôsôô ne tiññ. Ve a soo bôte bevo’o mevak, a bo fe na ésaé jap é bo tyi’ibi.” Ye nne ô ne aval ébe mbo ésaé ete? Ô ne sili bôte mia be be mia saé nge ba simesane na ô ne mbamba ébe mbo ésaé. Nge be ne meva’a ya saé a wo avale beyé’é be Yésus be mbe meva’a ya saé a nye, wônaa ô ne jô ane nlômane Paul na: “Bi ne bevolô ya meva’a menan.”​—2 Bec. 1:24.