Nsôñane ya nkañete ya kalate Deutéronome 22:25-27 ô nji beta bo na be ke ba yemelane nge fam nje é bili mekua nge momo, amu é ne mebôme na fam é mbe’e mekua. Nkañete wo kômbô volô na bi yem nge minga fe a yiane be’e mekua. Entame yenané bifuse bife ya nkañete ôte.

Éfuse 23 a 24 ja kobô ajô fam ja jô’ôbô a minga “nlam” a too ke na minga ate a bili atiñ aluk. Fam éte ja jian éza minga amu atiñe Moïse si, minga a mbe a bili atiñ aluk a mbe a ntoo ane minga a ne nlu’an. Minga ate ki? Éfuse ja jô na ‘a nji bôé ñyôn a too ke na ba te jô’ôbô nye nlam été.’ Nge a nga ye bôé ñyôn, bôte ya nlam be mbe ve wô’ô ntate wé a zu volô nye. Ve a nji yôn. Ajô te nye’e fe a be’e mekua ya mejian, bese bebaane ba te sem.​—Dt. 22:23, 24.

Bifuse bia tôñe valé bi bia kobô ajô afe, bia jô na: “Nge fam ja koé ngon é ne ntiñetane na ja lu’u fam afup, a fam éte ja bi je a ngu, a jô’ôbô je; . . . fam é nga jô’ôbô je nje étam ja ye wu: ve wo ye bo te bo ngon éte jôm, amu ngon é nji bi abé ja yiane wu de: amu jam ete e ne aval ane éyoñ môt a kôlô si, a wôé môt ba nye be too; amu a nga koé je afup, ngon é ne ntiñetane na ja lu’u fam é nga [bôé ñyôn] ve môte ya nyii je momo.”​—Dt. 22:25-27.

Betyi’i mejô be mbe be kañese’e mejô me minga ate. Amu jé? Amu a nga [bôé ñyôn] ve môte ya nyii [nye] momo.” Minga ate a nji bo mejian. Ve fam nje é mbe é be’e mekua mese, amu é nga “bi [éza minga] a ngu, a jô’ôbô [nye].”

Nkañete ôte wo liti na minga a nji bi mekua méziñ, ve wo kôme bo’olô na fam ja te jô’ôbô éza minga a ngul a bo mejian. Bi ne tabe ndi na ôsusua na ba ve fam mekua, betyi’i mejô be mbe be taté’é “fas a fak, a sili bido’o minsili,” asu na be nyoñe ntyi’ane wo lu’an a miñye’elane mi Yéhôva a mbe a jaéya zu a ve be.​—Dt. 13:15, Mfefé Nkôñelan; 17:4; Nk. 20:14.