Momo. Satan a nji jô Ève na nge a di ébuma Zambe a nga tyili be, nyule jé nje ja ye wu, ve nsisime wé wo ye ke ôsu a nyiñe vôma mfe. Nyo Satan a nga belane je na a kobô a Ève é nga kôme nye jô na, nge a di ébuma ‘a ye ke tu’a wu.’ A mbe a kômbô’ô jô nye na a ye ke ôsu a bu’uban ényiñ afub Éden, a bo’o mam mé aval a yi, teke bisi Zambe.​—Met. 2:17; 3:3-5.

Nge do’otene ya nsisim ô ne te wu a nji téé afube ya Éden, nne ñhe a nga so vé? Bi vo’o kôme taa ndoñe ya été. Bia yeme na bivuse bedo’oten bise bi nga jañ éyoñe Ndône mendim é nga kui melu me Noé. Mbôle si é nga li’i ve a bebo bisaé be Yéhôva (Noé ba nda bôte jé), bi ne simesane na, bivuse bedo’oten bi nji be ve beta bo éyoñ éte.

Bi ne ñhe jô na évuse do’oten éte é nga so mvuse Ndône mendim. Nde aval avé é nga mane yametane si abime di? Éyoñe Zambe a nga zametane minkobô Babel, bôte be nga mane ke ba mialane “si se,” a éko éziñ na môt ase ya be be a nga kee do’oten ate vôm a nga ke tabe. (Met. 11:8, 9) Ve do’oten ate a kusa so vé, bia yeme na, Satan Diable, “ésaa minsos” nnye a bo na a mialan émo aval di.​—Jean 8:44.