1-3. (a) Aval avé bia yiane yene benya mejôô ya Bible? Va’a éve’an. (Fombô’ô befôtô ya atata’a.) (b) Bia zu bi biyalane ya minsili mivé ayé’é di?

E WÔ’Ô jaé kui na, môt a maneya kuse jôm, éyoñ éte a beta bulane je éfatyele. Befase mam ba jô na, mesi méziñ, nge môt a kuse biôme ntet, a ne bulane biôm ébul be môt a te kuane nye bie. Ba ki ba kuse biôme nkol, be wô’ô bulan a lôte biôm 30 ntet ôse. Nalé a kui amu na, éyoñ môt a maneya kuse jôm, a ne viane teme na é nji bo aval a too a buni’, na é ne ndaman, nge ke na a vini vini je. Éyoñ éte a wô’ô bulane je éfatyele na be tyendé nye je, nge ke na be bulane nye moné wé.

² Nge nalé a ne boban a biôm bia kuse makit, bi nji yiane ve’ele bo de a“benya mejôô;” éyoñ bi kuseya me, bi nji yiane beta “kuane” me. (Lañe’e Minkana 23:23; 1 Tim. 2:4) Avale bi nga yen ayé’é ya mvus, e nga sili bia abui éyoñ na bi yé’é benya mejôô. Éko éziñ bi nga li’i fe mfañ asu ésaé, nge na bi nga yiane jibi mewosane me bibu’a ya nda bôte jangan a bemvôé bangan, nge ke na bi nga jô’é  metum méziñ. Ve biôm bite bi se jôme fefele bibotan benya mejôô me nga soo bia.

³ Éyoñ jam da nambe benya mejôô, bi wô’ô wô’ôtan ane môte Yésus a nga kobôô nye éve’an éziñ. Asu na a liti abim avé benya mejôô me ne dia, Yésus a nga kobô ajô nkuan akum a jeñe señ é ne édima. Mbôle señ éte é ne tañ anen abui, môt ate a ji’a ke kuane biôm bié bise na a kuse je. (Mt. 13:45, 46) Nne fe benya mejôô ya Éjôé, a benya mejôô mese mevo’o ya Bible me ne nalé, bia yene me tene dia, a bia wô’ô mvaé ya nyume biabebiene mam méziñ na bi kuse me. Môt a yeme mfi ya benya mejôô a vo’o “kuane me” môs éziñ. Ve étua jam é ne na, bebo bisaé be Zambe béziñ be nga bele beta kuane benya mejôô! Te bia ve’ele kañese na avale jam ete e kui bia! Nge bia nye’e benya mejôô, bia ye ke kuane me môs éziñ, ve bia ye ke ôsu ‘a wulu benya mejôô été.’ (Lañe’e 3 Jean 2-4.) E wulu benya mejôô a tinane na, mme bia telé ôsu ényiñe jangan, a na, bia bo mam mese bia yé’é Bible. Bi tame ñhe zu jeñe biyalane ya minsili milale mi: Amu jé a aval avé môt a ne “kuane” benya mejôô? Aval avé bi ne sa’ale mbia jam ate? Aval avé bi ne yemete ntyi’ane wongane ya ‘ke ôsu a wulu benya mejôô été’?

4. Amu jé bôte béziñe ya ntete mimbu ôsu be nga kuane benya mejôô?

⁴ Ntete mimbu ôsu, bôte béziñ be nji ke ôsu a wulu benya mejôô été, a too ke na be mbe be tatéya yebe mejô me Yésus. Môs éziñ, éyoñ a maneya ve beta nsamba bôte bidi, bôte bete be nga tôñe nye akekui Mañe ya Galilée yat. Éyoñ éte nje Yésus a zu kate be jam e nga kolé be ôbak: “Nge mi teke di minsône mi Mone môt, a nyu fe metyi mé, ényiñ é se ngule ya bo be mia.” Éyoñ be nga yiane sili nye jôm mejô mete ma tinan, be nga viane wô’ô nye ôlun a jô na: “Nkobô wu ô ne ayet; za a ne wô’ô wô?” Ane “beyé’é bé . . . . abui be nga lume nye mvus, teke fe beta wuluu nye nsamba.”​—Jean 6:53-66, Mfefé Nkôñelan.

5, 6. (a) Amu jé bôte béziñe ya melu ma be nga kôlô benya mejôô? (b) Aval avé môt a ne taté na a kôlô benya mejôô ôte’ete’ ôte’etek?

⁵ To’o den, bôte béziñe be nji ke ôsu a wulu benya mejôô été. Abui bôt e nga kôlô benya mejôô amu ékôane Yéhôva é nga sôan ôsimesane wongan a lat a éfus éziñe ya Bible, nge ke amu mojañ éziñ a be’e beta mimbe’e a nga jô, nge ke bo jam e nga kolé be ôbak. Bevo’o be nga wô’ô ôlun amu be nga ve be melep, nge ke amu be nga bi ajô a môt akônda. Bevo’o ki be nga nyiine ngame b’apostat a besiñe bangan befe. Ane bebien be nga taté ñhe na ba kandane Yéhôva ba akônda dé. (Beh. 3:12-14) Ngo’o asu’u mboan! Éyoñ be nga yiane jibi vu mbunane Pierre, a futi ndi nleme jabe be Yésus. Éyoñ Yésus a nga sili minlôman nge mi’i fe mia kômbô ke, Pierre a nga yalane nye été été na: “A Tat, bi aye ke be za mfe? Wo ô bili mejô ya ényiñe ya melu mese.”​—Jean 6:67-69.

⁶ Bobejañ béziñ ki be nga tem be kôlôya benya mejôô teke tu’a wô’ avale  jam ete e nga boban. Môt a kandane benya mejôô ôtete’ete’ ôte’etek, a ne ane sitima a kôlô kindi’ ôsôé ôte’ete’e ôte’etek. Bible a belan éfia “tindiban” éyoñ a kobô ajô avale môt ete. (Beh. 2:1) Môt ate ba nyô a vañe kôlô benya mejôô ba selan, amu nye a vañe ki, a tindiban. Ve to’o nalé, nye fe a te’e nsisim, a jañele fe élate jé a Yéhôva. Aval avé bi ne sa’ale mbia jam ate?

7. Jam ôsu é ne volô bia na bi bo te kuane benya mejôô é ne avé?

⁷ Nge bia kômbô wulu benya mejôô été, bia yiane yebe mejô me Yéhôva mese ne meñ a bo nye mewôk. Bia yiane telé Yéhôva ôsu ényiñe jangan, a tôñe miñye’elane ya Bible. Njôô bôte David a nga jô Yéhôva na: “M’aye wulu benya mejôô môé été.” (Bs. 86:11) Da kôme yené na a nga nyoñe ntyi’an ôte nlem été. Bia fe bia yiane nyoñe ntyi’ane ya ke ôsu a wulu benya mejôô été. Nge sa nalé, bi ne taté na bia jôban biôm bi nga li’i mvus, a bi ne tem bi nga bulane ke jeñe bie. Jôm ete nje bia yiane kôme kabetane benya mejôô. Bi nji yiane nye’e mingum miñye’elan, bi vini’i ki mi mivok. Bia yiane tôñe “mejô mese” me ne Bible été. (Jean 16:13) Bi tame beta zu kobô ajô biôm bitan bi nga yiane kuse bie benya mejôô. Nalé a ye yemete ntyi’ane wongane ya bo te kuane me.​—Mt. 6:19.

8. Aval avé môt a dimi belan éyoñe jé a ne kandane benya mejôô? Va’a éve’an.

⁸ Éyoñ jangan. Nge bia kômbô ke ôsu a wulu benya mejôô été, bia yiane yeme belan éyoñ jangan. Nge bi bo fianga, mimvôman, internet, télé, akeke, bi ne mane di bia éyoñ bia yiane bo je ayé’é étam a mam mevo’o ya nsisim. Jam ete e nga kui Sita Emma. * Emma a nye’e bikabela aso mongô. A mbe a bete’ ékabela éyoñ ése a mbe a bili fane ya bo de. Nde a nga su’ulane yemelane na bivôé bite bia di nye abui éyoñ, jam ete ve zu ndeñele nye. Ane a nga ta’a ényiñe jé a telé bivôé bite été ja yian. Sita éziñ a nga volô fe nye abui; sita ate a mbe jôé na Cori Wells, ôsusua, nye’e fe a mbe a vôé a bikabela. * Den Emma a dañe lôt éyoñ a nda bôte jé ya nsisim a bemvôé bé, a telé fe mame ya nsisim ôsu. A wô’ôtane na Yéhôva a ne nye bebé, a na a ve nye mvo’é jé, amu a yeme belan éyoñe jé.

9. Aval avé ôzañ akum wo bo na bôte béziñe be lume Yéhôva mvus?

⁹ Akum. Nge bia kômbô ke ôsu a wulu benya mejôô été, bia yiane telé akum été ja yiane de. Éyoñ bi nga yé’é benya mejôô, bi nga tu’a wô’ô na, Zambe nnye bia yiane telé ôsu ényiñe jangan, sa ke akum. Bi nga wô’ô mvaé ya nyume biabebiene mam méziñ asu na bi ke ôsu a wulu benya mejôô été. Ve ane éyoñ ja lôt, bi ne taté na bia kômbô bôte ba kuse beta betéléfôn a betablette, beécran plat, nge ke ba ba tôñesan aval akum afe. Bi nga taté na bia buni na bi bi loseya fo’o. Jam ete e ne bo na bi bo te beta vak a abime Zambe a ve bia, a na bi viane lume mame ya nsisime mvus amu bia tôñesan akum. Jam ete e nga kui Démas.  Nnye ate a nga li’i ésaé a mbe a bo’o a nlômane Paul, amu a nga dañe nye’e émo ji. (2 Tim. 4:10) Jé é nga bo na Démas a li’i Paul étam? Bi nji tu’a yem, éko éziñ a mbe a nye’e akum a dañe mame ya nsisim, nge ke na a mbe a te’eya a éto a mbe a too a Paul, amu é mbe é bo’o na a kate bu’uban ényiñ. Mfa’a wongan, bi nji yi na ôzañ akum ô jaé bia nlem, a bo bia na bi taté na bia biasé benya mejôô.

10. Nté bia ke ôsu a wulu benya mejôô été, ôlam ôvé bia yiane sa’ale?

¹⁰ Bilate biangan. Nge bia kômbô ke ôsu a wulu benya mejôô été, bi nji yiane jô’é na môt éziñ a wone bia. Éyoñ bia taté na bia yé’é benya mejôô, nda bôte jangan a bemvôé bangan be ne taté na ba yene bia aval afe. Bevo’o ba jibi fo’o bia nalé, ve ba bevo’o ba wosane bia. (1 P. 4:4) Bia jeñe fo’o na bi ba’ale mbamba élat a bibu’a ya menda me bôte mangan, ve bi nji yiane tyam atiñe Yéhôva amu bia kômbô ve be nlem avak. Bia ke ôsu a ba’ale mvo’é zañe bia be be. Ve avale 1 Becorinthien 15:33 a liti, benya bemvôé bangan be ne ba ba nye’e Yéhôva.

11. Jé é ne volô bia na bi sa’ale mvite mimboan?

¹¹ Mbia b’asimesan a mbia ntaban. Môt ase a wulu benya mejôô été a yiane bo mfuban. (És. 35:8; lañe’e 1 Pierre 1:14-16.) Bôte béziñe ba yiane tyendé bone be mam méziñ ényiñe jab na be tôñe miñye’elane ya Bible. Ba bevo’o ki ba yiane bo beta mintyéndan. Ve jam é ne été é ne na, bi nji yiane beta ve biabebiene mvit éyoñ Mejô me Zambe me maneya fubu bia. Jé é ne volô bia na bi ba’ale biabebiene mfuban? Bia yiane simesane tañe Yéhôva a nga ya’ane na a fubu bia: metyi me Yésus Krist, Mone wé a nye’e. (1 P. 1:18, 19) Môt a kôme yem mfi ya ntañ a ve ngul ése na a ba’ale émien mfuban nté a bo Yéhôva ésaé.

12, 13. (a) Amu jé bia yiane yem avale Yéhôva a yene mebô’ô ya émo? (b) Jé bia zu yen éyoñe ji?

¹² Metum a mefulu Zambe a vini. Bivuvumane biangan, bemvôé bangan, nge ke bôte bia be be bia saé be ne bañete bia mebô’ô map méziñ. Jé é ne volô bia na bi sa’ale metum a mebô’ô Zambe a vini? Bia yiane jeñe na bi tu’a yem avale Yéhôva a yene me. Bi ne yem vôm mebô’ô méziñ ma so éyoñe bia lañe bekalate bangan. Éyoñ bia jeñe beamu ya sa’ale mebô’ô mete Bible été, nalé a ve bia ndi nleme na bia tôñe ve “mam me ne mvaé mfa’a Tate.” (Beép. 5:10) Nge bi too Yéhôva a Mejô mé ndi, bia ye ke ‘koo bôte woñ.’​—Min. 29:25.

¹³ Bia kômbô wulu benya mejôô été akekui nnôm éto. Jé é ne yemete nkômbane wongan ôte? Mam mela.

14. (a) Aval avé bi ne yemete ntyi’ane wongane ya bo te kuane benya mejôô? (b) Amu jé ñyemane mam, nleban, a fek bi ne nya mfii?

¹⁴ Jam ôsu, bia yiane ke ôsu a yé’é benya mejôô me ne Bible été a bindi me. Ôwé, da sili na bi bo bi nyoñe’ éyoñe ya di bidi ya nsisim. Mboan ôte wo bo na bi tu’a nye’e benya mejôô, wo yemete fe ntyi’ane wongane ya bo te kuane me. Ve kalate Minkana 23:23 a jô na bi kuse fe “ñyemane mam, a  nleban, a fek.” Bi nji yiane su’u ve na bia yé’é. Bia yiane fe bo mam bia yé’é ényiñe jangane ya môs ôse. Ñyemane mam wo volô bia na bi tu’a wô’ô mame Yéhôva a yi na bi bo. Fe’e ki ja tindi bia na bi bo mam bia yé’é. Ve benya mejôô ma bo fe na bi bi melep, amu ma volô bia na bi yene mefulu bia yiane tyendé ényiñe jangan. Ngo’o nge bia bese bia bo mbane ya tôñe benya mejôô ényiñe jangan! Me ne mfi adañ argent.​—Min. 8:10.

15. Aval avé asese ya benya mejôô da ba’ale bia?

¹⁵ Jame baa, kôme’e nyoñe ntyi’ane ya bo mame wo yé’é môs ôse ya yôp. Tiñeti’i benya mejôô angeteñ ane ases. (Beép. 6:14) Melu mvus, asese mone bezimbi é mbe é kama’ane na akoñ é ji nye angeteñ a tube nye miñya a biôme ya abum été. Ve asu na asese dé é volô nye, a mbe a yiane kôme yemete de. E nji be ve tu’a kamane nye nge da ndeñ. Aval avé ases dangane ya nsisime fe da ba’ale bia? Nge bia tiñeti benya mejôô angeteñ ane ases, nalé a ye volô bia na bi bo te du’uban, a na bi nyoñ mbamba mintyi’an. Benya mejôô ma ye fe volô bia na bi bo te sem éyoñ bi tele meve’ele été. Aval ane mone bezimbi ya melu mvus, nnye ate a nji be ve ke bita teke taté yemete asese dé, bia fe bi nji yiane tiin asese ya benyaa mejôô nge vaa de. Ve bia li’i de é tii bia angeteñ a zene nyina na, bia tôñe benya mejôô ényiñe jangan. Ases é mbe fe vôme mone bezimbi ya melu mvus a mbe a fane’e nkpwaté mekône wé. Nalé a kee bia jame lale bia yiane bo na bi yemete ntyi’ane wongane ya bo te kuane benya mejôô.

16. Aval avé bia yemete ntyi’ane wongane ya ke ôsu a wulu benya mejôô été éyoñ bia ye’ele me bôte bevok?

¹⁶ Jame lale, bo’o mbane ya ye’ele bôte bevo’o benya mejôô ya Bible. Nalé a ye volô wo na ô yeme bi nkpwaté mekône ya nsisim, ñwô ôte ô ne “mejô me Zambe.” (Beép. 6:17) Bia bese bia yiane jeñe na bi bo mintyetyeñe beye’ele, avale bôte da “ye’ele bôt benya mejôô zôsôô.” (2 Tim. 2:15, Mfefé Nkôñelan) Éyoñ bia liti bôte bevo’o mfi ya sa’ale bivuse miñye’elan a kabetane benya mejôô, biabebiene bia kôme fe nyiñili me minleme miañ été. Nalé ki a yemete ntyi’ane wongane ya ke ôsu a wulu benya mejôô été.

17. Amu jé benya mejôô me ne dia mise môé?

¹⁷ Benya mejôô me ne édima dase Yéhôva. Ma bo na bi bi akume da dañe mfi ényiñ: élate jangan a Yéhôva. Ve mame Yéhôva a ye’eleya bia azukui den me ne ve ane atoé mendim e mañ. Yéhôva a ka’a bia na bia ye ke ôsu a kuse benya mejôô akekui nnôm éto. Ajô te, yene’e benya mejôô dia ane señ é ne édima. Kele’ ôsu a kuse me, a te kuane me môs éziñ. Nge ô bo de, wônaa, ane David, wo fe wo ye bo ngule ya bo Yéhôva ngaka’a nyi: “M’aye wulu benya mejôô môé été.”​—Bs. 86:11.