ASU AYÉ’É 42
Avale bi ne volô bôte bia be be bia yé’é na be duban: Ngabe baa
“Ba’ale’e womien a ñye’elane wôé.”—1 TIM. 4:16.
JIA 77 Éfufube ja faé émo
ÔBALEBAS *
1. Amu jé bia jô na ésaé beye’ele bia bo ja nyii bôt?
ÉSAÉ beye’ele bia bo ja nyii bôt. Bi ne bo’olô de amu éyoñ Yésus a nga ve abendé bia koone de kalate Matthieu 28:19, 20, a nga jô na: “Kelan, mi bo . . . beyé’é, a baptizô be.” Mbaptizô ô ne ne mfi ôvé? Jame bia yiane taté yem é ne na, môt a yi na Yéhôva a nyii nye a yiane duban. Ñyé’é Bible a yiane kôme buni na a ne bi ényiñe ya melu mese fo’o ve amu Yésus a nga wu asu dañ a beta wômô. Bi ne ñhe wôk amu jé nlômane Pierre ô nga kate Bekristene na mbaptizô wo nyii bia “amu ñwômane Yésus Krist.” (1 P. 3:21) Jôm ete nje bi ne jô na ñyé’é Bible a duban a ntele nya zene, zene ya ényiñ.
2. Kalate 2 Timothée 4:1, 2 a liti na bia yiane bo avale beye’ele avé?
2 Asu na bi bo bôte beyé’é, da sili na bi kôme yeme kalane be “ñye’elan ôse.” (Lañe’e 2 Timothée 4:1, 2.) Amu jé? Amu Yésus a nga jô na: “Kelan, mi bo . . . beyé’é . . . a ye’ele be.” Paul ki a nga jô bia na bi bo mban ésaé éte, amu ‘vôm bia bo nalé, bia ye nyii biabebien, a ba ba wô’ô bia.’ Bia tu’a ñhe wôk amu jé a nga beté melebe ma yôp: “Ba’ale womien a ñye’elane wôé.” (1 Tim. 4:16) Teke fo’o aval afe, bia yiane jeñe na bi tu’a yeme ye’ele. Sa nalé?
3. Jé bia zu yen ayé’é di?
3 E si se meku’u menyin, bia bo bemillion be bôte meyé’é. Ve avale bi nga yen ayé’é ya mvus, bia yiane yem avale bi ne volô abui ya be be na e baptizôban a bo beyé’é be Krist. Ayé’é di, bia zu yene mam mefe metan bi ne bo asu na bi volô beyé’é Bible bangane na be yaé nsisim a baptizôban.
JÔ’É NA BIBLE NNYE A BO ÉSAÉ
Sili’i mojañ a yeme ye’ele na a liti wo aval ô ne jô’é na Bible nnye a bo ésaé be môte wo ye’ele (Fombô’ô abeñ 4-6) *
4. Amu jé ñye’ele Bible a yiane kôme jôé émien éyoñ a bo môt ayé’é? (Fombô’ô fe aton.)
4 Bia nye’e mam bia ye’ele bôt angôndô. Nalé a ne bo na bi kômbô kobô abui éyoñe bia bo môt ayé’é. Ve bia yiane kôme ba’ale na, môt a bo ayé’é ya Nkume mmombô a bete, nge Ayé’é Bible ya akônda, nge ke ayé’é ya nda bôt, a nji yiane kobô abui. Bia yiane jô’é na Bible nnye a bo ésaé be môt; jôm ete nje e ne mfi na bi yeme jôé biabebien, bi za teme bi nga mane kate môte mam mese bia yem a lat a éfuse ya Bible nge ke a lat a nlô ajô éziñ. * (Jean 16:12) Womien ô mbe ô yeme’e yeme mame tañ aya Bible éyoñ ô duba’an? Bia sia ko na ô mbe ô dañe yeme ve mbôka’a ya miñye’elane ya Kalate Zambe. (Beh. 6:1) E nga sili wo mimbu tañ aya asu na ô yem abim mam mese wo yeme den? Nde ñhe, amu jé wé mane kate me ñyé’é Bible ve môse wua?
5. (a) Bela’ane 1 Bethessalonicien 2:13 na ô timine jame bia yi na ñyé’é Bible a yem. (b) Aval avé ô ne volô môte mia nye mia yé’é na a bo a kobô’ ajô ya mam a yé’é?
5 Bia yi na ñyé’é Bible a yeme na mame bia ye’ele nye ma so Kalate Zambe été. (Lañe’e 1 Bethessalonicien 2:13.) Nne bi ne bo jam ete aya? Volô’ô ñyé’é Bible wôé na émien a bo a kobô’ ajô ya mam a yé’é. A lôte na ô bo ô timi’ine nye bifuse ya Bible éyoñ ése, môs éziñ ô ne jô nye na émien a tame timine wo bifuse biziñ. Volô’ô nye na a yen aval avé mam a yé’é Bible ma nambe ényiñe jé. Sili’i nye minsili mi ne volô wo na ô yem ôsimesane wé, a aval a wô’ôtane mam a lañe Kalate Zambe. (Luc 10:25-28) Ô ne sili nye na: “Fulu Yéhôva fé éfuse ji ja ngôné?” “Aval avé ñye’elane ya éfuse ji é ne volô wo ényiñe jôé?” “Wo yene jame wo yé’é le aya?” (Min. 20:5) E nji dañe sili ve na ñyé’é Bible a yem abui mam, jame da dañe mfi é ne na, a nye’e mon abim a yem, a na a bo mam a yé’é.
6. Amu jé é ne bo mvo’é na ô bo ô kele’e étôtôlô ñye’ele éyoñe wo ke bo meyé’é môé?
6 Ye ô wô’ô fo’o bo ô kele’e bitôtôlô beye’ele éyoñe wo ke bo meyé’é môé nga? Kate’e be na be tame fombô avale wo ye’ele a kate wo nge mfa’a wop wo yeme belane Bible. Asu na ô tu’a yeme ye’ele, wo yiane bo éjote nyul. (Tame yen ane jam ete da lu’an a Mam Minlôman 18:24-26.) Éyoñ ayé’é e maneya, sili’ étôtôlô ñye’ele mia nye mi né nge a lôô na ñyé’é Bible wôé a tu’a wô’ô mam a yé’é. Ô ne fe jô nye na a fole wo éyoñ ô ne momo. Nalé a ye volô na ayé’é e bo teke tebe amu ô nji bo, ñyé’é Bible a ye fe tu’a wô’ éyoñ éte na ayé’é Bible e ne nya mfii. Te ve’ele simesane môs éziñe na ayé’é ete e ne “endôé,” a na môte mfe a vo’o bo de. Wo yi na ñyé’é Bible a yaé nsisim, jôm ete nje wo ve ngul ése na a ke ôsu a yé’é benya mejôô to’o womien ô ne momo.
LITI’I NA WO NYE’E MAME WO YÉ’É A NA WO BUNI ME
Bo’o na ñyé’é Bible a yem minkañete mi bobejañe béziñ mi ne volô nye na a yene mfi ya tôñe miñye’elane ya Bible ényiñe jé (Fombô’ô abeñ 7-9) *
7. Jé é ne volô ñyé’é Bible na a nye’e mam a yé’é?
7 Ñyé’é Bible a yiane kôme yene na womiene wo nye’e mame wo ye’ele nye a na wo buni me a nlem ôse. (1 Bet. 1:5) Nalé a ne volô nye na nye’e fe a nye’e mam a yé’é. Ô ne fe kate nye avale miñye’elane ya Bible mi nga volô wo ényiñe jôé. Nalé a ne bo na a yeme na Bible a ne fe volô nye.
8. Jé ô ne beta bo asu na ô volô ñyé’é Bible wôé, a amu jé wo yiane bo de?
8 Nté mia yé’é, kate’e ñyé’é Bible avale Yéhôva a nga volô bobejañe béziñe be nga tôban avale minju’ a tôbane de. Ô ne fe soo mojañ a nga tebe été jé ayé’é dé, amu éve’ela mojañ ate é ne volô nye. Ô ne koone minkañete miziñe nlô ajô ô ne na “Benya mejôô ba tyendé binyiñ” e jw.org. * Bevidéo a minlô mejô mite mia ye liti ñyé’é Bible wôé abim avé e ne mfi na a tôñe miñye’elane ya Bible ényiñe jé.
9. Aval avé ô ne volô ñyé’é Bible na a kate bôte ya nda bôte jé a bemvôé bé mam a yé’é?
9 Ye ñyé’é Bible wôé a ne nlu’an? Nge môte ba nye be ne nlu’an a ngenane teke taté na a yé’é Bible, ô ne bañete nye ayé’é. Volô’ô môte mia nye mia yé’é na a kate bemvôé bé a bôte ya nda bôte jé mam a yé’é. (Jean 1:40-45) Ô ne sili nye na: “Aval avé ô ne timine bôte ya nda bôte jôé ôsimesane wu?” nge ke na “Ô ne belan éfus évé na ô liti mvôé jôé jôme Bible a jô a lat a jam ete?” Mboan ôte wo volô na ô yañele ñyé’é Bible na a bo fe mbamba ñye’ele. Mvuse ya valé, éyoñ a boya mintyendane miziñ ényiñe jé, nye’e fe a ne taté na a kañete a akônda. Ô ne sili nye nge a yeme môte mfe a yi na a yé’é Bible. Nge a jô na ôwé, ji’a jeñe na ô yeme môt ate, a taté ayé’é dé. Liti’i nye vidéo a ne nlô ajô na Nne ba bo ayé’é ya Kalate Zambe aya? *
VOLÔ’Ô ÑYÉ’É BIBLE NA A BI BEMVÔÉ AKÔNDA
Volô’ô nye na a bi bemvôé akônda (Fombô’ô abeñ 10-11) *
10. Aval avé ñye’ele Bible a ne vu éve’ela Paul bia koone je kalate 1 Bethessalonicien 2:7, 8?
10 Ñye’ele Bible a yiane liti môte ba nye ba yé’é na a wô’ô nye mintaé. Yene’e nye ane môt a ye su’ulane bo monyoñe ya nsisim. (Lañe’e 1 Bethessalonicien 2:7, 8.) E nji ve’ele bo tyi’ibi na môt a jô’é mewoso mé ya émo a bo mintyendane mise mia sili asu na a bo Ngaa Yéhôva. Bia yiane volô beyé’é Bible na be bi benya bemvôé akônda. Bo’o mvôé môte mia nye mia yé’é. Te lôt éyoñ a nye ve mimôs mi bili na mia yé’é. Ô ne loone nye téléfôn, ô ne tili nye mone kalate, nge ke jome nye ôsusua na mia yenan asu ayé’é. Bone be mam bete mbe ba ye bo na a yeme na wo nye’e nye.
11. Bia yi na beyé’é Bible bangane be bi jé akônda, a amu jé?
11 Bi wô’ô wô’ô bôte be jô’ô na: “Mon a ne mone ya nlam.” Bi ne fe jô avale da na: “Ñyé’é Bible a ne ñyé’é ya akônda.” Jôm ete nje mbamba beye’ele ba volô beyé’é Bible bap na be yembane bobejañe befe be ne liti be mbamba éve’ela akônda. Bobejañe bete be ne volô beyé’é Bible bôé na be tu’a yemete élate jap a Yéhôva, a ve be ngule nyul éyoñe ba tôbane minjuk. Bi nji yi na ñyé’é Bible éziñ a buni na a ne nneñ akônda, nge ke na a yene ve ane a nji bo môte ya nda bôte jangane ya nsisim. Bia yi na a kôme wô’ôtane nye’an ô ne zañe jangan. Jam ete da volô nye na a bo te dañe yen ayaé ya tyi’i minkañ a bôte be vo’o volô nye na a kôme nye’e Yéhôva. (Min. 13:20) Nalé a ye fe bo na, nge bemvôé ya émo ba taté na ba sa’ale nye, jam ete da ye ke dañe jô nye jôm amu a yeme na a bili benya bemvôé ékôane Yéhôva.—Marc 10:29, 30; 1 P. 4:4.
LITI’I NYE MFI YA VE ÉMIENE NGUMBA A DUBAN
Ñyé’é Bible a kôme nye’e mam a yé’é a ne su’ulane duban! (Fombô’ô abeñ 12-13)
12. Amu jé bia yiane bo bi kobô’ô ñyé’é Bible ajô ya ve émiene ngumba be Yéhôva a duban?
12 Bo’o ô kobô’ô nye ajô ya mvean émiene ngumba a mbaptizô. Te bia vuane na nsôñane wongan éyoñe bia yé’é a môt ô ne na bi volô nye na a ve émiene ngumba be Yéhôva a duban. Éyoñ ayé’é e boya bone bengon, e dañe dañe nge a tatéya na a tabe bisulan, ñyé’é Bible a yiane kôme yeme na a yé’é asu na a su’ulane bo Ngaa Yéhôva.
13. Mam mevé ñyé’é Bible a yiane bo ôsusua na a duban?
13 Ñyé’é Bible a kômbô duban a yiane taté bo bone be mam béziñ. Di ôsu, a yiane nye’e Yéhôva a tabe Nye mebun. (Jean 3:16; 17:3) Wônaa a yiane fe bi ngul élat a Yéhôva a bobejañe ya akônda. (Beh. 10:24, 25; Jc. 4:8) A yiane jôbane mbia be mam a nga bo, a tyendé. (Mam. 3:19) Zañe va ki, mbunane wé wo yiane tindi nye na a kañete bôte bevok mam a yé’é. (2 Bec. 4:13) Mvuse ya valé nje a zu ve émiene ngumba be Yéhôva a duban. (1 P. 3:21; 4:2) Ngo’o abim meva’a bi wô’ô wôk môse ba jô wu! Nté ñyé’é Bible a bo mam mete mese, bo’o ô se’e nye a ayôñ ese, a ve nye ngule nyul, asu na a kee ve nalé ôsu!
BO’O Ô FOMBÔ’Ô ANE A YAÉ NSISIM
14. Minsili mivé mi ne volô ñye’ele Bible na a yeme nge môte ba nye ba yé’é a kômbô bo Yéhôva ésaé nge momo?
14 Da sili fulu ôjibi éyoñe bia volô ñyé’é Bible na a su’ulane ve émiene ngumba be Yéhôva a duban. Ve da sili fe na bi bo bi tebe’e mone jôm a fas asu na bi tu’a yemelane nge môte bia be nye bia yé’é a bili nkômbane ya bo Yéhôva ésaé. Ye mam méziñe ma liti wo na ñyé’é Bible wôé a bibane na a bo Yésus mewôk? Ye e ne ve ane a yé’é fo’o ve asu na a yeme mam me ne Bible été?
15. Mam mevé me ne volô wo na ô yeme nge môte mia nye mia yé’é a nto ve duban?
15 Bo’o ô fombô’ô meyaé ya nsisim me môte mia nye mia yé’é. Ye ô wô’ô wôk a jô’ô na a nye’e Yéhôva? Ye a wô’ô ye’elan a tote’e jôé Dé? (Bs. 116:1, 2) Ye a nye’e a lañe’ Bible? (Bs. 119:97) Ye a tabe bisulan? (Bs. 22:22) Ye a tyendéya mam méziñ ényiñe jé? (Bs. 119:112) Ye a kate bemvôé bé a bôte ya nda bôte jé mam a yé’é? (Bs. 9:1) Ye a kômbô fo’o bo Ngaa Yéhôva? (Bs. 40:8) Nge môte mia nye mia yé’é a bo ki ve jame da ya mam mete, jeñe’e na ô yem amu jé. Da sili fe na ô kôme laan ajô te a nye, ve bo’o de évôvoé été, ô bela’ane mbamba bifia. *
16. Mam mevé me ne bo na bi telé ayé’é môt?
16 E ne fe mfi na ô bo ô fase’e nge wo yiane kee môt éziñ ayé’é ôsu. Sili’i womiene na: ‘Ye a ne étyi teke kômesan ayé’é? Ye a nji bisi tabe bisulan? Ye a ngenan a bili mbia mefulu? Ye a bene kôlô évuse ñyebe?’ E kee avale môt ete ayé’é ôsu é viane bo ve ane wo kômbô ye’ele môt avale ba jok, a too ke na a vi-vini na atoé mendim e boté nye! Mfi ôvé fo’o na bi ke ôsu a jañele éyoñe na bia yé’é Bible a môt éyoñ mam mese ma kôme liti na a nji bisi mam bia ye’ele nye nge kômbô bo bo me?
17. Bela’ane 1 Timothée 4:16 na ô liti jame ñye’ele Bible ase a yiane bo.
17 Ésaé ya bo beyé’é e ne nya mfii asu dangan. Amu bia yi na bôte bia be be bia yé’é be yaé nsisim a duban, bia jô’é na Bible émiene nnye a bo ésaé be be, a bia ye’ele be a ôsesa a ayôñ ese, fulu ya liti na biabebiene bia buni mam bia kañete be. Bia volô be na be bi bemvôé akônda. Bia liti fe be mfi ya ve bebiene ngumba be Yéhôva a duban, bia bo fe bi fombô’ô meyaé maba ya nsisim éyoñ ése. (Fombô’ô nka’ale ya afep 13, ô ne nlô ajô na “ Mame ñye’ele a yiane bo asu na a volô ñyé’é Bible na a duban.”) Ngo’o abim meva’a ete na bi ne benyoñe ngabe ya ésaé ja nyii bôt! Ajô te, emva’ane ngule ya volô bôte bia be bia yé’é na be ve bebiene ngumba be Yéhôva a duban!
JIA 79 Volô’ô be na be wôn
^ É.N. 5 Éyoñ bia bo meyé’é, Yéhôva a ve bia fane ya volô beyé’é Bible bangan na be yen a bo mam aval a yi. Sa ke beta mvome nnye bi bili le nga? Ayé’é di da zu liti bia mam bi ne bo asu na bi tu’a yeme ye’ele.
^ É.N. 4 Lañe’e nlô ajô ô ne na “Sa’ale bikobe bi éyoñe wo bo môt ayé’é ya Bible” nsoé kalate Ényiñe Kristen a ésaé nkañete ya Ngon ébulu ya mbu 2016.
^ É.N. 8 Kele’e vôm a ne na, BI NE BEZA? > MINLAÑ.
^ É.N. 9 E JW Library®, kele’e vôm a ne na MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.
^ É.N. 15 Fombô’ô fe nlô ajô ô ne na “Nye’ane môt a nye’e Yéhôva wo yiane tindi nye na a duban,” a wu ô ne na “Ye ô nto fo’o ngule ya duban?” Nkume mmombô a bete ya Ngone lale ya mbu 2020.
^ É.N. 77 FÔTÔ: Éyoñ ayé’é e maneya, sita a jaéya bo ésaé ñye’ele a liti sita a te bo ayé’é mfi ya bo te dañe kobô éyoñ a ye’ele môt.
^ É.N. 79 FÔTÔ: Ñyé’é Bible a yé’é aval avé a ne bo mbamba minga nda alu’u jé. Mvuse ya valé, a kate nnôme wé mam a te yé’é.
^ É.N. 81 FÔTÔ: Ñyé’é Bible a nga bi mimfefé bemvôé éyoñ a nga tabe ésulan, bemvôé bete ba te bañete ba nnôme nda jap, bi lôô ane ba be be ba lôte mbamba biyoñ.
