Éfus éte ja jô na: “Nge wo yen nkpwe’elan b’akpwe’ele minzôzoé, a mvaane ba vaa nya ntyi’ane mejôô a zôsô a évô si éziñ, te semé jam ete: amu môte wua a dañe ba be ne mimbetane yôp a fombô; a bôte be ne mimbetane yôp a dañe be.”​—Éc 5:8.

Bôte be ne buni na éfus éte ja kobô ve ajô bôte be bili éjôé émo ji. Ve éyoñe bia tu’a fombô, bia yene na éfus éte ja ye’ele fe bia jam éziñ a lat a Yéhôva, a jam ete da yiane ve bia ngule nyul a bôé bia nleme si.

Ecclésiaste 5:8 a kobô ajô ntebe ôsu éziñ a tibili minzôzoé, a too fe ékotekot a ôbangam. Ve a vuane na môte mfe a bili éto ja dañ énjé, a na môt ate a ne yeme mam mese a bo. Sa ke ve abim ete, bôte befe be ne bi bi beta bito adañe balé bete bebaane. Ve éngôngole jam é ne na, bôte bese be bili éjôé émo Satan ji, be ne mane bo bikotekot, a tibili bingôngole bi bôte bi ne éjôé jabe si.

Ve to’o bia yen aya, bi ne bi ngule nyul éyoñ bia yeme na Yéhôva a ‘fombô bôte be ne mimbetane yôp’ émo Satan. Bi ne bete mise yôp, a kee nye mimbe’e miangane mise. (Bs. 55:22; Beph. 4:6, 7) Bia kôme yeme na “mise me Yéhôva ma ke ma wulu mimfa’a mise si nyô ése, zene ya liti na a ne ngu mfa’a ngame ya ba minlem miap mi ne nya zôsôô be nye.”​—2 Mka. 16:9.

Bi ne ñhe jô tyi’ibi na, a tu’a liti bia aval émo bia nyiñe ji é né. Éfus éte ja liti fe na môt ase a bili éjôé a yiane yeme na môte mfe a lôte nye nkôñ. Ve sa ke abim ete, ja tu’a fe ye’ele bia na Yéhôva nnye a bili Éjôé ja dañe bijôé bise. A teléya fe Mone wé Njôô ya Éjôé jé. Ôwé, Zambe wongane ya Ngul ése, nyô a lôô mam mese ma bobane si va, ba Mone wé Yésus Krist, be ne nya zôsôô!