1-2. Minju’u mivé abui bebo bisaé be Yéhôva da tôbane mie, a mi ne bo na be bo aya?

TAME ve’ele fase bité bilale bi: Ba bi ésoé mojañe ngul ôkone nda biañ. Ba vañe vaa mojañ bisaé a too ke na a lôteya mimbu 50; ataté éyoñ éte a jeñeya bisaé bife a te’eya, ve teke ndoñ. Nnôme sita ô ntoo ntutuñ a teke fe ngule ya bo Yéhôva ésaé aval a yi.

² Nge ô tele été jia ya bité bilale bite, éko éziñ ô ne buni na ô nji beta volô jôm. Avale minju’u ete e ne bo na ô jañele ava’a dôé, na ô yene womiene zezé, nge ke na ô vañe wô’ô bôte bevo’o ôlune zezé.

3. Aval avé Satan a bôte bé ba yen ényiñe mona môt?

³ Da kôme yené na ôsimesane Satan a lat a ényiñe mona môt ñwô wo jôé émo ji. Aso kôa, Satan a biasé bôt angôndô. A nga bele du’u Ève na a ye ve nye éto fili, a too ke na a mbe a yeme’e na Ève a ye wu nge a bo Zambe melo. Satan nnye fe a jôé minta’ane mi mame mise ya émo ji: wu ya makit, wu ya pôlitik a wu ya ñyebe. Jôm ete nje bia yen abui bebo makit, bepoliticien, a betebe ôsu ya miñyebe be biasé’é bôt a kpwe’ele be éyoñe ya éyoñ ése.

4. Jé bia zu yen ayé’é di?

⁴ Yéhôva nye a yi na bi yeme na bi ne mfi, a su’u fe bia éyoñe bia tôbane minju’u mia bo na bi yene biabebiene zezé. (Bs. 136:23; Bero. 12:3) Ayé’é di, bia zu yen aval avé Yéhôva a volô bia bité bilale bi: (1) Éyoñ bia kon,  (2) éyoñ bia wu azoé, a (3) éyoñe minju’u ya nnôm mia bo na bi simesane na bi vo’o beta volô Yéhôva jôm. Ve ôsusua na bia la’ase mam mete, entame taté yenané amu jé bi ne tabe ndi na bi ne édima mise me Yéhôva.

5. Jé fe ja liti wo na môta binam a ne nya dia mise me Yéhôva?

⁵ Akusa bo bi nga téban a metek, bi ne mfi a dañe zezé mbulu’u môt a fimin éyoñe bikôndé bi maneya nye ke mvit. (Met. 2:7) Bi tame zu yene mam méziñe ma bo na bi yeme na bi ne nya dia mise me Yéhôva. A nga té môt a ngule ya vu mefulu mé, nalé a liti’i na môta binam a ne mfi adañe bitétea bivo’o bise ya si. (Met. 1:27) A nga ve ve fe môta biname mbe’e ya jôé si a betite be ne été.​—Bs. 8:4-8.

6. Jé éfe ja liti na Yéhôva a nye’e bia akusa bo bi be’e metyi ya abé?

⁶ To’o mvuse nsem Adam, Yéhôva a nga ke ôsu a nyane môta binam. A nga nye’e bia aval é ne na, a nga lôme Mone wé a dañe nye’e si va na a zu wu a butan a bia. (1 Jean 4:9, 10) A zene ya ntañ ôte, Yéhôva a ye wômôlô bôte nsem Adam ô nga wôé, “bezôsôô, a . . .  bikotekot” bebaane. (Mam. 24:15) Mejô me Zambe ma liti na bi kusa kon, nge bo azoé nge ke minnôm, Yéhôva a yene bia anen.​—Mam. 10:34, 35.

7. Mam mevé mefe ma liti na Yéhôva a nyane bebo bisaé bé?

⁷ Mam mefe ma liti na bi ne édima mise me Yéhôva. A nga dutu bia be nye, a yene fe aval avé bi nga nyoñe benya mejôô. (Jean 6:44) Ataté môse bi nga taté na bia subu nye bebé, Yéhôva fe a subu bia bebé. (Jc. 4:8) Yéhôva a nyoñe fe éyoñe ya ye’ele bia, fulu ya liti na a nyoñe ngab a bia. A yem aval bôte bi né, a yeme fe mintyéndane bi ne ngule ya bo ényiñ jangan. Nye’ane wo tindi fe nye na a lebe bia biyoñ biziñ. (Min. 3:11, 12) Nga mam mete ma liti na Yéhôva a nyane bia étua abui!

8. Mejô ya kalate Besam 18:27-29 ma bo na bi yene minju’u bia tôbane mie aya?

⁸ Akusa bo na bôte beziñ be mbe be biasé’ nye, David nye a mbe a yeme’e na Yéhôva a nye’e nye a na a su’u nye. Ôsimesan ôte ô nga bo na a jibi meve’ele a mbamba été nsisim. (2 Sa. 16:5-7) Éyoñ minju’u mia tya’a bia nlem, Yéhôva a ne volô bia na bi jibi mie a mbamba été nsisim a na bi dañe dañe mie. (Lañe’e Besam 18:27-29.) Éyoñe Yéhôva émien a su’u bia, teke nju’u éziñ ô ne kamane bia na bi ke ôsu a bo nye ésaé a mevak. (Bero. 8:31) Éyoñe ji, bi tame zu yene bité bilale bi ne bo na bi vuane na Yéhôva a nye’e bia a na bi ne nya mfii mise mé.

9. Ôkon ô ne bo na bi yene biabebien aya?

⁹ Ôkon ô ne te’e bia a bo na bi yene biabebiene zezé. Bi ne wô’ ôson éyoñe bôte bevo’o ba yemelane na bia ya’a, nge ke éyoñe môte mfe nnye a yiane tuñulu bia. To’o môte mfe a nji yeme yem ôkone bia kon, bi ne kusa wô’ ôson amu bi nto mintutuñ. Ve éyoñe bi tele aval été éte, Yéhôva a su’u bia. A bo de aval avé?

10. Minkana 12:25 a liti na jé é ne volô bia éyoñ bia kon?

¹⁰ Éyoñ bia kon, “mbamba éfia” a ne  ve bia ngule nyul. (Lañe’e Minkana 12:25.) Yéhôva a nga futi mbamba bifia Bible été, bifia bia liti na bi ne mfi mise mé to’o éyoñe bia kon. (Bs. 31:19; 41:3) Nge bia lañ mejô ya Bible mete biyoñe biyoñ, Yéhôva a ye volô bia na bi dañ asimesane da te’elane bia éyoñ bia kon.

11. Aval avé mojañ éziñ a nga wô’ôtane mvolane Yéhôva ényiñe jé?

¹¹ Bi tame yene jam e nga kui Jorge. Éyoñ a mbe ésoé, be nga bi nye étua ôkon, ôkon ôte wo ya’a angôndô ya avôl, a ô nga bo na a yen émiene zezé. A jô na: “Me nga kam aval ôkone wom ô nga tu’ulane ma aval avôl ete, me same fe nya abuii amu bôte be mbe be fombô’ô ma aval étam. Nté ôkon ô mbe ve ya’a yak, nlem ô mbe ô tyele me yôb ajô ya ényiñe jam. Me nga wô’ô mamien aval éngôngol é ne na, me nga ye’elane Yéhôva na a volô ma.” Nde aval avé Yéhôva a nga volô nye? Émien a yalane na: “Mbôle me nji be ngule ya yé’é ayap, be nga lebe ma na me lañe bone bifuse ya Besam bia liti na Yéhôva a wô’ô bebo bisaé bé mintaé. Ma bo me lañe’e bifuse bite môs ôse, a bia ve ma ngule nyul angôndô. Bôte be nga teme ve na me nji dañe beta bo éyôé. Be nga jô fe jô na ba bi ngule nyul éyoñe ba yene ma me ba’ale’ ava’a dame nalé. Ane me nga yeme na Yéhôva a nga vô’ôlô meye’elane mam! A nga volô na me yene mamien avale da yian. Nne me nga taté na ma bindi mame Bible a jô a lat a avale Yéhôva a yene ma akusa bo me ne nkôkon.”

12. Nge wo jibi mintaé ya ôkon, jé ô ne bo asu na ô bi mvolane wo so be Yéhôva?

¹² Nge ô ne nkôkon, tabe’e ndi na Yéhôva a kôme yeme mintaé miôé.  Ye’elane nye na a ve wo ngule ya bi mbamba ñyenane mam a lat a été jôé. Éyoñ ô maneya ye’elan, jeñe’ asimesane ya Bible Yéhôva a nga bo na be tili asu dôé. Tebe’ éyoñe wo kui bifuse bia liti na Yéhôva a nyane bebo bisaé bé. Nge ô kele ôsu a bo nalé, wo ye tu’a yene na Yéhôva a mvamane bôte bese ba kañe nye a nlem ôse.​—Bs. 84:11.

13. Ntebe ôsu ya nda bôt a ne wô’ôtan aya éyoñ a jañele ésaé jé?

¹³ Ntebe ôsu ya nda bôt ése a yi na a bo ngule ya jalé miñyiane ya nda bôte jé. Tame ñhe simesane na ba vañe vaa mojañ bisaé a too ke na a nji bo mbia jam éziñ. A jeñ a ngul ése na a yene bisaé bife, ve teke ndoñ. Nga ô lôô na été éte é ne bo na a wô’ô émien éngôngol a buni na a se ke fe mfi éziñ? Aval avé a ne bi mvolane nge a bem ôsimesane bengaka’a be Yéhôva?

14. Jé ja tindi Yéhôva na a tôé bengaka’a bé?

¹⁴ Yéhôva a ne étyi teke ka’ale jôm éyoñ éte a bo aval afe. (Jos. 21:45; 23:14) Amu jé? Fok, amu jôé dé. Yéhôva émien a nga kobô a anyu dé na, a ye nyoñe ngab a ba bese ba bo nye ésaé a nlem ôse, ajô te a bili ve na a bo aval a nga jô. (Bs. 31:1-3) Yéhôva a yeme fe abim éngôngol bi ne wô’ô biabebien nge a bo teke nyoñe ngab a bia a too ke na nnye a ne bia Ésaa. A nga ve anyu na a ye ve bia mam ma sili bia mfa’a ya minsôn a mfa’a ya nsisim, a teke jôm é ne bo na a bo te tôé ngaka’a éte!​—Mt. 6:30-33; 24:45.

15. (a) Bekristene ya ntete mimbu ôsu be nga tôbane nju’u ôvé? (b) Ndi nleme fé bia koone je kalate Besam 37:18, 19?

¹⁵ Éyoñ bia yen ane Yéhôva a tôé  bengaka’a bé, nalé a ve bia ngule nyul, to’o bia wu azoé, bia yeme na é volô bia. A nga bo de melu mvus a Bekristene ya ntete mimbu ôsu. Éyoñ akônda ya Jérusalem é nga tôban étibela’a, bobejañ bese be nga tup, ô vaa ve minlôman. (Mam. 8:1) Tame ve’ele bo ane wo simesan été bobejañe bete be mbe ve tebe. Azoé! Be nga yiane li’i menda a mesu m’ésaé map. Ve Yéhôva a nji li’i be ve mo ve ke mebo; be’efe be nji telé ésaé jap. (Mam. 8:4; Beh. 13:5, 6; Jc. 1:2, 3) Bi too ndi na Yéhôva a ye fe su’u bia aval a nga su’u bebo bisaé bé bete.​—Lañe’e Besam 37:18, 19.

16. Jé é ne bo na bi buni na bi nji volô Yéhôva jôm?

¹⁶ Ane bia ke nnôm, bi ne wô’ôtane ve ane bi nji beta dañe bo mfi asu Yéhôva. Jam ete e nga kui David éyoñ a mbe a yômbô’ô. (Bs. 71:9) Aval avé Yéhôva a ne volô bia?

17. Jé nkañete Noomi ô ne ye’ele bia?

¹⁷ Tame yene jam é nga kui Sita Noomi. Be nga bañete nye ékôan éziñ Aba Éjôé, mfa’a ya yañele ba be bobejañe befe asu ésaé ya yeme nyoñe ngab a menda ékôane Yéhôva ja belane me. Ve a nji kômbô ke, a nga jô na: “Me ne nnôm, nkus a asuk! Me vo’o volô Yéhôva jôm.” Ve alu éziñ, sikôlô a ye’e boban ane akiti, Sita Noomi a nga yooé Yéhôva nlem a kate nye aval a wô’ôtan. Tyé kpwa, a nga kame na nnye a tele Aba Éjôé le. Nté sikôlô a mbe a boba’an, mojañ wua a nga jô na, môt a dañe mfi mo me Yéhôva a ne nyô a kañese na A ye’ele nye. Noomi a jô na: “Me nga jô mamiene nlem été na: ‘Nne ma te bo  nalé! Me ve taté na ma yôn amu me nga yemelane na Yéhôva le a yalane meye’elane mam. A mbe ve ane a jô ma na me bili ngume jôm a ne belane wô, jôm ete nje a kômbô yañele ma!” Noomi a kee nkañete ôsu a jô’ô na: “Éyoñ me kele’e Aba Éjôé môs ôte, me mbe me ko woñ, me wô’ô nyul adit, me too fo’o teke ngul. Ve éyoñ me bula’an, me mbe me mbili ngule nyul, teke fe ko jôme woñ, me yeme’e fe na me ne nya mfii mise me Yéhôva.”

18. Aval avé Bible a liti na Yéhôva a ke ôsu a nyan ésaé jangan to’o éyoñ bi nto minnôm?

¹⁸ To’o bi nga yômbô, bia yiane yeme na Yéhôva a ke ôsu a belane bia. (Bs. 92:12-15) Yésus a nga jô na Yéhôva a nyane mon ésaé ase bi ne bo asu dé, to’o sa ke abim ete nde biabebien bia too bi kômbô’ô bo. (Luc 21:2-4) Ajô te fombô’ô ve mam ô ne ngule ya bo. Ô ne ngule ya kañete ajô Yéhôva, ô ne ngule ya ye’elan asu bobejañ a volô be na be tebe ne bip. Yéhôva a loone wo na ébe mbo ésaé wé, sa ke amu abime mame wo bo, ve amu ô bili nkômbane ya bo nye mewôk.​—1 Bec. 3:5-9.

19. Ndi nleme fé bia koone je kalate Beromain 8:38, 39?

¹⁹ Bia wô’ô fo’o mvaé ya bo Yéhôva ésaé, amu a ne Zambe a nyane bebo bisaé bé! A nga té bia asu na bi bo nkômbane wé, biabebiene bia yene fe na nya ékaña’a nnye a bo na bi bi benya meva’a ényiñ. (Nli. 4:11) To’o bôte ya émo be ba biasé fo’o bia, Zambe wongan nye a nji wô’ô bia ôson. (Beh. 11:16, 38) Nde, to’o bia jibi mintaé ya ôkon, to’o bia wu azoé, to’o bia jibi minju’u ya nnôm, bi nji yiane vuane môs éziñe na, Ésaa wongane ya yôb été, nyô jôé é ne na Yéhôva, a ye ke ôsu a nye’e bia nnôm éto a nnôm éto!​—Lañe’e Beromain 8:38, 39.