1. Jé ja liti bia na Mejô me Zambe ma bo ésaé? (Fombô’ô fôtô ya atata’a ya ayé’é di.)

MBÔLE bi ne bebo bisaé be Yéhôva, bia yeme na, Mejô mé, nge na, foé a nga ve bone be bôt ‘é ne vevee a je abo ésaé.’ (Beh. 4:12) Abui ya be bia da yen aval avé ngule ya Kalate Zambe ja tyendé binyiñ. Bobejañe béziñ be mbe miñwuwup, benyoñe banga, a bebo mame ya bisôk. Bevo’o be mbe be bu’ubane mame ya émo ji, ve be wô’ôtan ane jôm éziñe ja jembane be. (Ec. 2:3-11) Ve mbamba jam a ne na, abui bôt e mbe teke ndi nlem, e mbili ndi nlem éyoñe ji. Minkañete ya avale bôt ete mi wô’ô kui Nkume mmombô a bete, nlô ajô ô ne na, “La Bible transforme des vies.” Éko éziñ ô lañeya mie. Ye ô yeneya na, to’o éyoñe môt a nto Kristen, a yiane ke ôsu a yaé nsisim a zene ya ayé’é ya Kalate Zambe?

2. Aval avé Mejô me Zambe me nga bo ésaé ntete mimbu ôsu?

² Ye bia yiane bo fe’e ne vema na, abui bôte ya melu ma da tyendé éyoñe da yé’é Kalate Zambe? Momo! Avale bôt ete da bo na, bi simesane jam e nga kui bobejañe be mbe be bili ndi nleme ya nyiñe yôp, ntete mimbu ôsu. (Lañe’e 1 Becorinthien 6:9-11.) Éyoñ a maneya lañe bôte  b’aye ke bo benyoñe ngabe ya Éjôé Zambe, nlômane Paul ô nga beta jô na: “Bevo’o ya be mia be mbe aval ete.” Ve Kalate Zambe a mbamba nsisim be nga volô be na be tyendé. To’o éyoñe be kañeseya benya mejôô, Bekristen béziñe be nga bo minseme mi nga bo na, be tyam élate jap a Yéhôva. Kalate Zambe a kobô ajô ñwo’one wua ya ntete mimbu ôsu, be nga telé feñ; ve mvuse ya valé, nde a nga bulan ékôane Yéhôva. (1 Bec. 5:1-5; 2 Bec. 2:5-8) Ye bi nji bi ngule nyul, éyoñe bia fase minju’u bobejañ be nga tôbane mie, a avale be nga kui na, be dañe mie a ngule ya Mejô me Zambe?

3. Jé bia zu yen ayé’é di?

³ Mbôle Kalate Zambe a ne ngul ékpwelé, a na, môt ase ya be bia a bili nye, bia yiane yeme belane nye. (2 Tim. 2:15) Ayé’é di, bia zu yen aval avé bi ne kañese na Mejô me Zambe me bo ésaé (1) ényiñe jangan, (2) éyoñe bi ne nkañete, a (3) éyoñe bia ye’ele bôte pôspôden. Mimba’alane mite mia ye volô bia na, bi liti Ésa wongane a ne yôp été na, bia nye’e nye a na, bia ve nye akéva amu nnye a ye’ele bia asu mfi wongan.​—És. 48:17.

4. (a) Jé bia yiane bo nge bia yi na Mejô me Zambe me bo ésaé ényiñe jangan? (b) Aval avé wo tak éyoñe jôé asu ya na, ô lañe Kalate Zambe?

⁴ Nge bia yi na Mejô me Zambe me bo ésaé ényiñe jangan, bia yiane bo mbane ya lañe Kalate Zambe, nalé a tinane na, bi lañe nye môs ôse nge nalé a ne boban. (Jos. 1:8) E ne été na, abui ya be bia e bili abui mame ya bo. Ve bi nji yiane jô’é na jôm éziñ, to’o mimbe’e miangan, é kamane bia na bi lañe Kalate Zambe. (Lañe’e Beéphésien 5:15, 16.) Bi ne lañe Kalate Zambe mame tyé, a môs, nge mame ngô’é. Nge bia bo nalé, bia ye wô’ôtan ane ntili Besam, nnye ate a nga jô na: “Ngo’o aka’a nye’an m’anye’e metiñe môé! Me ne jôm m’asimesan nlem ngum nté môs.”​—Bs. 119:97.

5, 6. (a) Amu jé é ne mfi ya bindi mame bia lañ? (b) Jé é ne volô bia na, bi bindi avale da yian? (c) Mfi ôvé ô yeneya éyoñe wo lañ, a bindi Kalate Zambe?

⁵ Ane ô vaa nlañane Kalate Zambe, e ne fe mfi na bi bindi mame bia lañ. (Bs. 1:1-3) Nge bia bo nalé, bia ye kui na bi belane miñye’elan, a fe’e ya Kalate Zambe ényiñe jangan. To’o bia lañe Kalate Zambe a zene ya minsini, nge ke afep, nsôñane bi bili ô ne ve na, bi nyoñe miñye’elane ya été, a futi mie minleme miangan.

 ⁶ Jé é ne volô bia na, bi bindi avale da yian? Abui bôt da nyoñ éyoñe ya tebe mone nté, a fase mam ba te lañe bifuse biziñ. Ba sili bebien avale minsili di: ‘Jé mame ma lañe ma, ma ye’ele ma a lat a Yéhôva? Ye ma tôñe mame ma lañe bifuse bi? Bevôme bevé ma yiane beta tyendé?’ Nge bia bindi mame bia lañ, a ye’elane Zambe, bia ye bo ntindane ya bo avale Kalate Zambe a jô. Bia ye fe kañese na Mejô me Zambe me bo ésaé binyiñe biangan.​—2 Bec. 10:4, 5.

7. Aval avé bia yiane belane Kalate Zambe éyoñe bi ne nkañete?

⁷ Jé é ne volô bia na, bi yeme belane Kalate Zambe éyoñe bi ne nkañete? Jam ôsu e ne na, bia yiane yoé nye éyoñ ése, a lañe nye bôt. Mojañ éziñ a nga liti mfi ya jam ete éyoñ a nga jô na: “Nge wo kañete nsamba a Yéhôva, ye wo ye kobô étam, teke ve nye fane ya kobô?” A mbe a kômbô’ô jô na: Éyoñe bia lañe môte Kalate Zambe, bia jô’é Yéhôva émien a kobô môt ate. E yeme top bifuse ya Kalate Zambe a ne bo mfi abui, a lôte jam ese bi ne jô. (1 Bet. 2:13) Sili’i womiene na, ‘Éyoñe me ne nkañete, ye ma jeñe na me lañe Kalate Zambe, éyoñ ése me bili fane ya bo de?’

8. Jé éfe bi ne bo asu ya na, môt a kôme wôk éfuse bia lañe nye?

⁸ E ne été na, bi nji yiane su’u ve na, bia lañe bôte bifuse ya Kalate Zambe. Amu jé bia jô nalé? Amu na, abui bôt da yeme Kalate Zambe abim éziñ, bevo’o ke be nji yeme jôm. Abui bôt e mbe nalé ntete mimbu ôsu, abui bôt e ne fe nalé melu ma. (Bero. 10:2) Ajô te, bi nji yiane buni na, môt é wô’ô éfuse bia lañe nye été été. Bia yiane nyoñ éyoñe ya ngôné bevôme ba dañe mfi bifuse bia  lañ. Nalé a ne sili na, bi beta lañe bifia bia kômbô ngôné, a timine bie. Mboon ôte ô ne volô na, foé ya Mejô me Zambe é nyiin asimesan, a minleme mi bôte ba vô’ôlô bia.​—Lañe’e Luc 24:32.

9. Ôsusua na bia lañ éfus éziñ, aval avé bi ne bo na, bôte be semé Kalate Zambe? Va’a éve’an.

⁹ Ôsusua na bia lañe môt éfus éziñ, bia yiane bo na, a semé Kalate Zambe. Bi ne taté jô na, “Bi tame yene jam Nté biôm a jô mfa’a ôte.” Nge bia laan a môt a nji bo Kristen, bi ne jô na, “Yene’e jame Mimfufube Mintilan mia kate bia.” Nge bia koone môt a simesane na, ñyebe ô nji bo mfi éziñ, bi ne sili nye na,“Ye ô wô’ôya nkana wu?” Ôwé, bia yiane nyoñe ngap a môt ase, bia yiane fe bo na, nkañete wongan ô lu’an a été jé.​—1 Bec. 9:22, 23.

10. (a) Kañete’e jam e nga kui mojañ éziñ. (b) Aval avé ô nga yen ane Mejô me Zambe ma bo ésaé éyoñ ô mbe nkañete?

¹⁰ Abui bôte da yene na, éyoñe ba belane Kalate Zambe nkañete, ba nambe bôte minlem. Tame yen éve’ane ji. Mojañ éziñ a nga ke jome nnôme môt éziñ ô jaéya lañe bekalate mefoé bangan. Mojañ ate a nji ve nye fo’o ve Nkume mmombô a bete, ve a nga taté lañe nye éfuse ya nlô ajô ya ékô’ôla. A nga lañe nye 2 Becorinthien 1:3, 4, a jô na: “Ésa ya mvam a Zambe ya mvolane minlem ôse . . . nnye a volô bia minlem nju’u wongan ôse.” Éfus éte é nga nambe môt ate angôndô ya abui, nde a nga jô mojañ ate na, a beta je lañ. Môt ate a nga kate mojañe na, ba ngale ba yi mvolane minlem. Éfus éte é nga ve nye évé asu mame ya nsisim. Ye ô nji yene na, Mejô me Zambe ma bo ésaé éyoñ ô ne nkañete?​—Mam. 19:20.

11. Mbe’e ôvé bobejañe ba ye’ele pôspôden be be’e?

¹¹ Bia bese bia nye’e bia tabe bisulan, bitôkan, a beta bitôkan. Bia bo de asu ya na bi kañe Yéhôva. Bia yene fe mfi ya mam bia yé’é. Bobejañe ba kobô pôspôden bitôkane bite be bili beta mvom, ba yeme fe na, a ne beta mbe’e. (Jc. 3:1) Ba yiane jeñ éyoñ ése na, miñye’elane ba ve, mi bo mi mia so Kalate Zambe. Nge ba te ve wo ésaé wo yiane ke bo ô tele pôspôden, aval avé ô ne bo na, Mejô me Zambe me bo ésaé éyoñe wo ye’ele?

12. Aval avé môt a bo nkañete a ne tabe ndi na, mam a ye’ele ma so Kalate Zambe?

¹² Tabe’e ndi na, mam wo ye’ele éyoñe wo bo nkañete, ma so Kalate Zambe. (Jn. 7:16) Jé nalé a tinan? Éyoñe wo nyoñe bive’an, bive’ela, nge ke éyoñe wo kañete nlañ éziñ, jeñe’e na, bôte be dañe bem asimesane dap Kalate Zambe, sa ke mame mete. Wo yiane fe yeme na, e ye’ele a zene ya Kalate Zambe a nji tinane ve na ô lañe bifus. Nde fe, nge ô dañe lañ abui bifus, bôte b’aye ke mane ba’ale bie. Nyoñek éyoñe ya tobe bifuse bia ngôné ñye’elane wo kômbô ve. Nyoñek éyoñe ya lañe bie, timi’ine bie, va’a bive’an, a liti’i bôte ba vô’ôlô wo, avale be ne tôñe miñye’elane ba wôk. (Néh. 8:8) Éyoñe nkpwase ya nkañete wôé wo so Tin Ékôan, wo yiane nyoñ éyoñe ya tu’a kômesan, a lañe bifuse bi ne été. Jeñe’e na ô yeme nkañ ô ne zañe mam wo lañ, a bifuse bi ne ntilane nkpwase wôé été. Bela’ane bifuse biziñe ya été na, ô ngôné mam me ne mfi. (Kalate Tirez profit de l’École du ministère  théocratique ataté kabetôlô 21 akekui kabetôlô 23, a bili mbamba melep mfa’a ôte.) Jame da dañe mfi e ne na, ô ye’elane Yéhôva na, a volô wo na ô ye’ele bôte Mejô mé.​—Lañek Esdras 7:10; Minkana 3:13, 14.

13. (a) Aval avé éfus éziñe ya Kalate Zambe é nga nambe sita ésulan? (b) Kate’e bia, éfus évé é nga nambe wo ésulan amu môt a nga lañe je a nga yeme belane Kalate Zambe?

¹³ Avale be nga belan éfus éziñe ya Kalate Zambe ésulan, é nga nambe Sita éziñe ya Australie. A nga yé’é Kalate Zambe, a ve émiene ngumba be Yéhôva, akusa bo beta minjuk a nga tôbane mie. A mbe a juan ôsimesan a mbe a bili na, Yéhôva a nji nye’e nye. Ve a nga su’ulane bi ndi nleme na, Yéhôva a nye’e nye. Jé é nga volô nye na, a yeme nalé? A nga tyendé ôsimesane wé, éyoñ a nga bindi éfus éziñe be nga lañ ésulan. A nga jeñe fe bifuse bife bi tii a éfus éte. * Ye avale ba belane Kalate Zambe bisulan, bitôkan, a beta bitôkan e nambeya fe wo?​—Néh. 8:12.

14. Aval avé bi ne liti na, bia nye’e Kalate Zambe, a yene na a ne mfi?

¹⁴ Nga bia kômbô ve Yéhôva akéva amu a nga ve bia Mejô mé, Kalate Zambe? Yéhôva a nji su’u ve na a ve bia nye, a nga tôé fe ngaka’a jé é mbe na, Mejô mé ma ye tabe nnôm éto. (1 P. 1:24, 25) Ajô te, bia yiane bo mbane ya lañe Kalate Zambe, bia yiane tôñe mam bia yé’é. Bia yiane fe belane Kalate Zambe éyoñe bi ne nkañete. Éyoñe bia bo de, bia liti na, bia nye’e Kalate Zambe, édima dase da so bia be Zambe, a na, bia yene na a ne mfi. Bia liti fe na, bia nye’e Yéhôva Zambe, nnye a ne Mbôndé wé.