1. Jé bebiaé be wô’ô taté yemelan ôsusua na bone bap ba duban?

BLOSSOM BRANDT a jô na: “Me nga bo bengon, me jô’ô Pepa ba Mema na ma kômbô duban, ve be nga taté nyoñ éyoñe ya laan a ma. Be mbe be kômbô’ô yemelane nge ma yeme jôm ma bo. Ane me nga su’ulane duban Ngon awôm a baa é too melu 31, mbu 1934; me vo’o vuane môs ôte.” Dene fe, bebiaé be bili nkômbane ya volô bone bap na be nyoñe mbamba mintyi’an. E vañe jañele bongô éyoñ a ne telé be mbia été mfa’a ya nsisim. (Jc. 4:17) Ve bebiaé be ne fek, be wô’ô taté jeñe na be yemelan nge bone bap be nto ngule ya nyiñ ane Bekristen.

2. (a) Jam avé bejome mekônda béziñ ba kate wôk? (b) Jé bia zu yen ayé’é di?

² Bejome mekônda béziñ ba jô na, ba kate wô’ô amu jé bongô be nga yaé benya mejôô été, ba kui mimbu  bebé 20 teke duban. Abui ya été da tabe bisulan a kañete, a da yene bebien ane Bengaa be Yéhôva. Ve mam méziñ ma bo na be bo teke ji’a ve bebiene ngumba be Yéhôva, a duban. Mam mevé? Bebiaé béziñ be wô’ô jô bone na, be tame taté yange. Ayé’é di, bia ye yene mam menyin me nga kamane bebiaé béziñ na be volô bone bap na be duban.

3. Bebiaé be Blossom be mbe be kômbô’ô yemelane jé?

³ Bi ne wô’ô amu jé bebiaé be Blossom bia te jôô be atata’a, be mbe be kômbô’ô taté yemelan nge mone wop a nto ôkala ya kôme wô’ô jam a bo. Aval avé bebiaé be ne yem nge mone wop a nto ngule ya nyoñe ntyi’ane ya duban?

4. Aval avé melebe me Yésus ya kalate Matthieu 28:19, 20 me ne volô bebiaé nté ba ye’ele bone bap?

⁴ Lañe’e Matthieu 28:19, 20. Aval bi nga yen ayé’é ya sondô a nga man, Bible a nji tyi’ ôkala môt a yiane dubane wô. Ve bebiaé ba yiane jeñe na be yem jôme ja tinane na e bo môte ñyé’é. Éfia ya nkobô Grek be nga kôñelane kalate Matthieu 28:19 na ‘e bo beyé’é,’ ja tinane na e ye’ele môt a nsôñane ya bo na, a bo mongô sikôlô, nge ke ñyé’é. Ñyé’é a ne môt a yé’é mejô me Yésus a wô’ô me, éyoñ ete fe a nyoñe ntyi’ane ya tôñe me. Ajô te, bebiaé ba yiane jeñe na be ye’ele bone bap, ataté nkeñelé, a nsôñane ya volô be na, be bo beyé’é be Krist, a duban. Nkeñelé mon ô vo’o fo’o duban. Ve Bible a liti na, bongô be ne ôkala éziñ be ne ngule ya kabetane benya mejôô.

5, 6. (a) Mam Bible a jô a lat a Timothée ma bo na bi simesane na a nga duban éyoñ évé? (b) Aval avé bebiaé be ne fe’e meyen be ne volô bone bap?

⁵ Timothée a nga kabetane benya mejôô a to mongô. Nlômane Paul ô nga jô na Timothée a nga yé’é Mejô me Zambe aso nkeñelé. Akusa bo ésaa a nji be mbo ésaé Yéhôva, nyia ba émvame minga jé, be nga volô nye na a kabetane benya mejôô. Nalé a nga bo na a tebe ne bip mbunan été. (2 Tim. 1:5; 3:14, 15) Éyoñ a nga kui bebé mimbu 20, Timothée a mbe a nto ngule ya be’e beta mimbe’e akônda.​—Mam. 16:1-3.

⁶ Mon ase a bialé avale dé; bone bese be vo’o tôlôbô éyoñe jia, nge ke avale da. Bongô béziñ ba fas ane benya bôtô, a be wô’ô kômbô ji’a duban. Bevo’o ki ba yiane taté bo abe’ebek, ôsusua na ba duban. Ve bebiaé be ne fe’e meyen be nji yiane tindi bone bap a ngule na be duban. Ve ba yiane volô mone wop ase na a yaé nsisim. Bebiaé ba vak éyoñ mone wop a tôñe mejô me ne kalate Minkana 27:11. (Lañek.) ve be nji yiane vuane nsôñane wop ô ne na, bone bap be bo beyé’é be Yésus. Ajô te, bebiaé ba yiane sili bebiene nsili wu: ‘Ye mone wom a mbili fo’o abime ñyeman é ne volô nye na a ve émiene ngumba be Yéhôva, a duban?’

7. Ye da sili na môt a kômbô duban a mane yeme Bible ase? Timi’in.

⁷ Mbiaé ase a yi na, mone wé a bi abime ñyeman e ne volô nye na, a bo ngule ya ve émiene ngumba be Yéhôva. Ve e nji sili na, môt a mane yeme Bible ase, ôsusua na a ve émiene ngumba be Yéhôva a baptizôban. Ja’a éyoñ môt a dubaneya, a yiane ke ôsu a kô’ôlane ñyemane wé. (Lañe’e Becolossien 1:9, 10.) Nde ñhe, abime ñyeman avé môt a yiane taté bi?

8, 9. Jé nkañete Paul ba mba’ale mimbôk wo ye’ele bia?

⁸ Jam é nga kui nda bôt éziñe ya ntete mimbu ôsu e ne volô bebiaé. (Mam. 16:25-33) Éyoñ a kele’e nlômane baa bebé mbu 50 É.J., Paul a nga tebe Philippes. Nde a môs a va, be nga vañe bi ba Silas a wua be nda mimbôk. Ve zañ alu, mfô’ôsane si ô nga bo na mimbé ya nda mimbôk mi yombô. Mba’ale nda mimbôk ve zu ko woñ; a nga kômbô wôé wôé émien, amu a nga buni na mimbô’ô mise mi maneya tup, ve Paul a nga vañe nye. Ane Paul ba Silas be nga kañete mba’ale nda mimbôk ate a nda bôte jé. Mam be nga yé’é a lat a Yésus me nga tindi be na be bo jé? Na be duban teke jañele éyoñ. Jé nkañete ôte wo ye’ele bia?

⁹ Beyeme mam ba jô na, mba’ale nda mimbô’ ate a mbe a yiane bo nnôme mone bezimbi ô mbe ô keya awo’an bisaé. A nji be a yeme’ Kalate Zambe. E mbe sili’i ve na a yeme miñye’elane ya atata’a, ane jé ja tinane na e bo mbo ésaé Yéhôva, a na, a nyoñe ntyi’ane ya tôñe miñye’elane mi Krist. E nji sili abui éyoñe na ñyeman ôte, a nkômbane wé ya tôñe metiñe me Zambe, bi tindi nye na a duban. Teke bisô na éyoñ a dubaneya, a nga ke ôsu a kô’ôlane ñyemane wé. Aval avé éve’ane ji é ne volô mbiaé éyoñ mon a liti na a yem, a na, a nye’e miñye’elane ya atata’a, a éyoñ a liti na, a wô’ atinane ya mveane môt émiene ngumba, a mbaptizô? Mi ne jô nye na a ke yene bemvendé, be kate nye nge a nto ngule ya duban. * Aval ane Bekristene bevo’o bese, a ye ke ôsu a yaé ñyemane ya Mejô me Zambe, akekui nnôm éto.​—Bero. 11:33, 34.

10, 11. (a) Jé bebiaé béziñ ba simesan? (b) Jé bebiaé ba yiane telé ôsu?

¹⁰ Bebiaé béziñ ba simesane na mone wop a yiane taté mane sikôlô, a yene bisaé, ôsusua na a duban. Mbiaé ase a simesane nalé a ne buni na a volô mone wé, ve ye nsôñan ôte wo ye soo mon benya meva’a ényiñ? Ye wo lu’an a miñye’elane ya Bible? Zene fé Yéhôva a yi na mongô a tôñ?​—Lañe’ Ecclésiaste 12:1.

¹¹ Bebiaé be nji yiane vuane na, mam mese ya émo ma wosan ésaé Yéhôva a ôsimesane wé. (Jc. 4:7, 8;  1 Jean 2:15-17; 5:19) Asu na bone benan be wosane Satan, émo jé, a nsisime ya été, ba yiane bi ngul élat a Yéhôva. Mbiaé a tindi mone na a telé mame ya émo ôsu a ndumekane nye nlô, a bo fe na a los mame ma dañe mfi ényiñ. A bebiaé, ye mia ye bele yebe na, mbia émo nyi a yale bone benane fé? Ba’alané na, bia bi benya mevak, fo’o ve éyoñ bia telé Yéhôva ôsu ényiñe jangan.​—Lañe’e Besam 1:2, 3.

12. Amu jé bebiaé béziñ be nji yi na bone bap be ji’a duban?

¹² Sita éziñ a kate bia amu jé a nji be a yi na ngo jé é ji’a duban; a jô na: “Ma wô’ô ôsone ya jô de, ve me mbe me mate’ na mone wom a tebe feñ.” Abui bebiaé da fas ane sita ate; be wô’ô yi na bone bap be taté lôt ôkala ya ézezam. (Met. 8:21; Min. 22:15) Be wô’ô jô na: ‘Nté mone wom a ngenane te duban, a vo’o tebe feñ.’ Mfasan ôte ô ne angôndô ya abé. Amu jé?​—Jc. 1:22.

13. Ye Yéhôva a ye bo te tyi’i môt ajô amu a ngenane te dubane nga? Timi’in.

¹³ E nji bo abé na bebiaé be yi na, mone wop a duban éyoñ émien a nto ngule ya nyoñe ntyi’ane ya ka’ale Yéhôva na, a ye bo nye ésaé nnôm éto. Ve ba kop, nge ba buni na, Yéhôva a ye ke tyi’i mone wop ajô, amu a ngenane te baptizôban. Amu jé bia jô nalé? Amu Yéhôva a nji yange na môt a duban asu na a tyi’i nye ajô. Nge mone wônan a nga yeme kandé jam e ne mvo’é a di e ne abé, yemané na Yéhôva a ye tyi’i nye ajô. (Lañe’e Jacques 4:17.) Ajô te, bebiaé be ne fek, ba jeñ a ngul ése na, be liti mone wop mbamba éve’ela, a lôte na be vañe jañele nye éyoñ. Ba taté na ba ye’ele nye na a nye’e metiñe me Yéhôva a ngenan abum été. (Luc 6:40) Mon a yaé a nyeke’e Mejô me Zambe a ne ntindane ya kabetane memvinda me Yéhôva, mboon ôte ki ñwô wo ye dañe ba’ale nye ényiñe jé.​—És. 35:8.

14. Aval avé bemvendé be ne su’u bebiaé, nté ba volô bone bap na be yaé nsisim a duban?

¹⁴ Bemvendé ya akônda be ne fe su’u bebiaé; éyoñ ba laan a bongô, be ne liti be mfi ya bi mbamba minsôñan. Sita éziñ a nto nkpwa’a mefane dene mimbu 70 a mvuk, ve a ngenan a simesa’an minlañ ba Mojañ Charles T. Russell be nga laan, valé a bili ve mimbu misaman. A jô na: “A nga nyoñe minute 15 na a laane ma ajô ya minsôñane ya nsisim.” Yaa, mbamba bifia bi ne tabe môte nlem ayap. (Min. 25:11) Bemvendé be ne fe belane bebiaé a bone bap asu bisaé ya Aba Éjôé, be va’a bongô mimbe’e be ne ngule ya be’e.

15. Aval avé bibu’a ya akônda bi ne ve bongô ngule nyul?

¹⁵ Bibu’a ya akônda fe bi ne volô bebiaé, bi ne subu bongô bebé. Bia yiane ji’a yen mone jam ase a liti na mongô a kômbô yaé nsisim? Ye mongô a te ve mbamba éyalan ésulan, ye a te bo ésaé sikôla beminisi? Ye a te dañe meve’ele méziñ, nge ki  na, ye a te kui na a kañete sikôlô? Jika’a ke se’e nye a nlem ôse. Ô ne fe tyi’i na wo laan a mongô wua nge bebaé, ôsusua na ésulane ja taté, nge ke éyoñ é maneya. Nge bia bo mam mete a mam mefe, bongô ba ye yene na, be’efe be ne bibu’a ya “beta ékôane” Yéhôva.​—Bs. 35:18.

16, 17. (a) Élat évé é ne zañe mbaptizô a ényiñe jangane ya melu ma zu? (b) Ava’a avé bebiaé bese ba kômbô bi? (Fombô’ô fôtô ya atata’a.)

¹⁶ Bebiaé be bili beta ma’a ya yale bone bap “melep a ñye’elane” Yéhôva été. (Beép. 6:4; Bs. 127:3) Ayoñ Ézulia, bone bese be mbe be bialé’ be mbe mveane be Yéhôva; ve den, môt a bialé ki a too Ngaa, to’o bebiaé bé be ne Bengaa be Yéhôva. A nde fe, mon a so ke abume be nyia a nye’e Yéhôva. Ataté môs a bialé, bebiaé ba yiane sôñe na mone wop a bo ñyé’é Yésus, ba yiane volô nye na a ve émiene ngumba be Yéhôva a duban. Teke jam afe e ne mfi adañe dili. Beta étibela’a nnye a ntele nseñe nyi! Nde, mveane môt émiene ngumba be Yéhôva a mbaptizô, a ésaé môt a bo Yéhôva a nlem ôse, mbie étam bia ye kamane nye na a wu.​—Mt. 24:13.

¹⁷ Éyoñe sita bia te jôô nye atata’a a nga tyi’i na a duban, bebiaé bé be nga kômbô yemelan nge a tu’a yeme jam a bo. Éyoñ be nga yene na a nto ngule ya duban, be nga su’u ntyi’ane wé. A ye’e duban ane akiti, ésaa a nga bo angôndô ya mbamba jam. Blossom a jô na: “A nga jô bia bese na bi kute meboñe si a ye’elane Yéhôva. Nde a nga jô Yéhôva na, a wô’ô mvaé, amu mone Blossom wé a nye’e, a te tyi’i na a ve Nye ényiñe jé.” Mimbu 60 a mvuk mi lôteya, ve Blossom a jô na: “Azukui ôkala me nto wu, me nji vuan alu ete môs éziñ!” A bebiaé, ngo’o nge mia fe mia wô’ôtan ava’a besom ba bi, éyoñ bone bap ba ve bebiene ngumba be Yéhôva, a duban!