Nicolas ba Céline be nga tôbane nju’u ôfe. Béthel ya France a nga jô be na be ke mfefé ékôane bekristen, ane be nga kañese. Ba jô na: “Atata’a bi mbe angôndô ya mevak, ve mvuse ya valé bi nga taté na bia jôbane ntyi’ane bi nga nyoñ amu bemvôé bangane be mbe be nga jembane bia. Bi ngenane teke bi ngul élat a bobejañe ya mfefé ékôane bekristene wongan.” a Éyoñe wo tyendé ékôane bekristen ô ne tôbane minjuk miziñ, ve aval avé ô ne ba’ale ava’a dôé a bo mfi asu mfefé ékôane bekristene wôé? Jé bôte bevo’o be ne bo asu na be volô wo? Bibotane ya nsisime bivé ô ne bi, a aval avé ô ne su’u mfefé ékôane bekristene wôé?

MAME MENYINE ME NE VOLÔ WO NA Ô DAÑE MINJUK Ô NE TÔBANE MIE

1. Tabe’e Yéhôva mebun. (Bsa. 37:5) Kazumi, ya Japon, a nga kôlô ékôane bekristen a mbe a tabeya mimbu 20 éyoñe be nga jô nnôme wé na a ke saé afôla éfe. Aval avé “a nga ke ôsu a bo Yéhôva ésaé?” Kazumi a jô na: “Me mbe me kate’e Yéhôva éyoñ ése mame me mbe me tyelé’é ma nleme yôp, aval ane éto étam, a mame mefe me mbe me ko woñ. Éyoñ ése me nga bo de, Yéhôva a nga ve ma ngule me mbe me yiik.”

Aval avé ô ne tu’a tabe Yéhôva mebun? Avale da sili élo’o mendim a biôme bife ya si asu na é yaé, avale te da da asu na mbunane wongan ô tu’a bo ngul, da sili avale mendim éziñ. Nicolas bia te jô nye yôp a jô na, éyoñ a nyoñ éyoñe ya bindi bive’ela bi—bôte be nga nyume bebien abui mame na be bo nkômbane Zambe ane Abraham, Yésus a Paul, jam éte da yemete ndi nleme jé na Yéhôva a ye su’u nye. Éyoñe wo lañe Kalate Zambe étame môs ôse, ane ô vaa na nalé a ne volô wo na ô ji’a yemban a mintyendane  mi ne kui ényiñe jôé, nalé a ye fe volô wo na ô yé’é mame mefe ma ye volô wo na ô ve bôte ya mfefé ékôane bekristene wôé ngule nyul.

2. Te ve’e ékôane bekristene wo so a mfefé ékôane bekristene wôé. (Eccl. 7:10) Éyoñe Jules a nga kôlô Benin a ke tabe États-Unis, a nga yen angôngô ya ayaé ya yembane metume ya wôé. A jô na: “Me mbe me wô‘ôtane ve ane nge da sili na me kate môt ase ma tôbane nye za me ne.” Mbôle mame me mbe me sela’an a ma a mbe a maneya yembane me, Jules a nga taté na a sa’ale bobejañ a besita. Ve éyoñ a nga ve ngule ya subu bobejañ a besita bebé, a nga tyendé ôsimesane wé. A jô na: “Éyoñe ji, ma kôme yene na bôte bese be ne avale da, to’o be ne abôta si avé. Avale ba kobô étame nde fo’o da selan. É ne nya mfii na bi kañese bôte bevok avale be ne.” Ajô te, te ve’ele ve‘e bôte ya mfefé ékôane bekristene wôé a ba ya vôme wo so. Anne-Lise, sita éziñ a ne nkpwa’a mefan a jô na: “Me nji kôlô vôme me mbe me too a nsôñane ya ke koone mame me nga li’i mvus, ve me nga bo de amu me mbe me kômbô yé’é mimfefé mi mam.”

Bemvendé fe be nji yiane ve’e mfefé ékôane bekristene wop a ji ba so. Nge bobejañe ya mfefé ékôane bekristene wôé ba bo mam aval afe, nalé a nji tinane na ba bo ki mam avale da yian. Môt a ne fek a kôme taté jeñe na a yem avale mame ma bobane vôm a ne ôsusua na a ve ôsimesan éziñ. (Eccl. 3:​1, 7b) É ne mvo’é na ô liti bobejañe mbamba éve’ela a lôte na ô yemete be na be yene mam ane wo.—2 Cor. 1:24.

3. Jene’e na ô bi abui mame ya bo mfefé ékôane bekristene wôé. (Philip. 1:27) É ne été na éyoñe môt a tyendé étaba’a jam éte da nyoñe nye abui éyoñ a abui ngul, ve jame da dañe mfi é ne na a ji’a taté na a tabe bisulane mfefé ékôane bekristene wé. Amu na, nge bobejañ a besita ya mfefé ékôane bekristene wôé be ngenane teke wo yen, nge ki na ba yene ki wo éyoñ ése, nde ñhe ba ye bo aya asu na be su’u wo? Lucinda a bengo bé bebaé be nga kôlô vôme be mbe be too a ke nyiñe beta tison éziñe ya Afrique du Sud. Lucinda a jô na: “Bemvôé bame be nga lebe ma na me jeñe na me bi bemvôé mfefé ékôane bekristene wom, na me kañete a bobejañ a yalane bisulan. Bi nga jô fe bobejañe na be ne zu bo bisulan asu minkañete nda jangan.”

Éyoñe wo “saé fufulu” a bobejañ a besita ya ékôane bekristen, mia veane ngule nyul a môt ase a yemete mbunane nyu mbok. Bemvendé be nga lebe Anne-Lise bia te jô nye yôp na a ve ngule ya kañete a môt ase ya ékôane bekristene jé. Nde mfi ôvé a nga bi? A jô na: “Me nga ji’a yemelane na jame te nde me mbe me yiane bo asu na me wô’ôtane na ma fe me ne ébu’a ya ékôane bekristen.” Nde fe, éyoñe wo nyoñe ngap a bisaé biziñ ane e vos Aba Éjôé a bo mfuban été, wo liti na ô nga yen ékôane bekristen éte ane énjôé. Nté wo ye ve ngule ya bo mam a bôte bevok, nté ôte ôse bobejañ a besita ba ye nye’e be too a wo, a wo ye wô’ôtane na ô ntoo ébu’a ya mfefé nda bôte jôé ya nsisim.

4. Jene’e na ô bi mimfefé bemvôé. (2 Cor. 6:​11-13) Nge bôte be yeme na ô ne avale môte da yeme nyoñe ngap a bôte bevok, da ye bo tyi’ibi na mia  be be mi bo bemvôé. Ô ne ve ngule ya kui Aba Éjôé ôsusua na ésulane ja taté, éyoñe ki ésulan é maneya, ô ne beta tabe mone nté asu na ô laan a bôte bevok a jeñe na ô kôme yeme be. Jeñe’e na ô yeme biyôlé biap. Nge wo ve ngule ya ba’ale biyôlé bi bôte bevok, a éyoñ ô ne mbamba nlem ô too fe avale môte be ne laan a de tyi’ibi, bôte befe be ne jeñe na be tu’a yeme wo a mia be be mi ne su’ulane bo mbamba bemvôé.

Te jeñe na ô solé avale môt ô ne amu wo yi na bobejañ a besita be nye’e wo, va’a be éyoñe ya yem avale môt ô ne. Bo’o avale Lucinda bia te jô nye yôp a nga bo. A jô na: “Bi bili mbamba bemvôé éyoñe ji amu bi nga nyoñe ntyi’ane ya bo bi bañete bôte bevo’o nda jangan.”

“MÔT ASE YA BE MIA A NYOÑE’E NYU MBO’O MVO’É”

Bôte béziñe be ne ko woñ éyoñe ba nyiin Aba Éjôé é too njalane a bôte be nji yem. Nde aval avé ô ne volô bôte be ndôme so ékôane bekristene jôé? Nlômane Paul wo jô na: “Môt ase ya be mia a nyoñe’e nyu mbo’o mvo’é, avale Krist fe a nga nyoñe mia mvo’é.” (Rom. 15:7) Éyoñe bemvendé ba vu Krist, be ne volô bôte be ndôme so na be wô’ôtane na ba nye’e be. (Fombô’ô nka’ale ô ne na, “ Mame me ne volô wo éyoñe wo tyendé ékôane bekristen.”) Ve bibu’a ya ékôane bekristene bise, to’o bone be bongô be ne volô bôte be ndôme so na be wô’ôtane na be ne nda jap.

Bia nyoñe bôte bevo’o mvo’é éyoñe bia liti be fulu anyep, ve bi ne fe de bo éyoñe bia su’u be bevôme ba yi mvolan. Éve’an é ne na, sita éziñ a mbe a ndôme suane mfefé tison, ane sita éziñ a mbe a nyiñi’i tison été a nga nyoñ éyoñe ya liti nye tison, a nga kate fe nye avale ba bo asu na be nyoñe metua tison éte. Jam éte é nga nambe sita a mbe a ndôme so angôndô ya abui, a nalé a nga volô nye na a ji’a yemban a afôla éte.

FANE YA YAÉ

Éyoñ étandak é nyiñeya abim éyoñ éziñ, ékôbe jé é wô’ô bo é tyendé abui biyoñ ôsusua na ja bo ngule ya yele a mefabe mé. Avale te fe éyoñe wo ke mfefé  ékôane bekristen, wo yiane titan asimesan ése é ne bo na ô kate ndamé mefabe môé ésaé Yéhôva. Nicolas ba Céline ba jô na: “Éyoñe bi nga kôlô vôme bi mbe bi too a ke nyiñe vôme mfe, nalé a nga volô bia na bi bi mefulu mefe. Bi mbe bi yiane yembane mimfefé mi bôt, mfefé étaba’a, a jeñe na bi yé’é mimfefé mi mam.” Jean-Charles bia te jô nye atata’a ya nlô ajô wu a kate bia bibotane nda bôte jé é nga bi, a jô na: “Éyoñe bi nga ke mfefé ékôane bekristen, bone bangane be nga tu’a bo biwôlô nsisim a nalé a nga volô be na be tu’a subu Yéhôva bebé. Mvuse bone bengon, ngo jangan é nga taté na ja bo bisaé ésulane ya zañe sondô, ndômane jangane ki é nga bo nkañete mbamba foé a ngenane teke duban.”

Jé ô ne bo nge été jôé ja kañese ki na ô kôlô vôm ô too a ke nyiñe vôme mfe, éko éziñe vôme bekañete mbamba foé ba jemban? Nge é ne nalé, nga ô ne tyendé ñyenane mame wôé a lat a ékôane bekristene jôé a ve ngule ya tôñe melebe méziñe bia te ve yôp? Nté wo futi ndi nleme jôé be Yéhôva, kele’e ôsu a nyoñe ngap a bisaé bia boban ékôane bekristene jôé a nleme wôé ôse. Jeñe’e na ô kañete a bôte bevok a na ô bi mimfefé bemvôé. Nge ô bili bemvôé béziñ, va’a ngule ya yemete élate jôé a be. Ye ô ne nyoñe ntyi’ane ya volô bôte be ndôme so, nge ki su’u bôte ba yi mvolane mimfa’a miziñ? Mbôle nye’an ô ne fulu ja volô na be yemelane benya bekristen, éyoñe bia volô bôte bevok nalé a ne bo na bi subu Yéhôva bebé. (Jean 13:35) Ô ne tabe ndi na “Zambe a yen avale mimvean éte mvaé.”—Héb. 13:16.

Akusa bo minju’u be nga tôbane mie, abui bekristen é nga kui na é ba’ale ava’a dap a wume mbamba bibuma mimfefé bikôane bekristene miap,—wo fe ô ne de bo. Anne-Lise a jô na: “Éyoñe me nga tyendé ékôane bekristen, nalé a nga volô ma na me yeme yoone bôte bevo‘o nleme wom.” Kazumi ki a jô na, éyoñe wo kôlô vôm éziñ a ke tabe vôme mfe, “ô ne yen ane Yéhôva a su’u wo a lôt aval a nga bo melu mvus.” Jules nye a jô aya? A jô na: “Bemvôé bame ya mfefé ékôane bekristene wome ba volô ma na me wô’ôtane na me ne nda jam. Éyoñe ji, ma nye’e mfefé ékôane bekristene wom aval é ne na me nji kômbô beta kôlô été.”