1-2. (a) Amu jé nlômane Paul ô nga jô na nye’ane ñwô wo “dañe” mefulu mese? (b) Bia zu bi biyalane ya minsili mivé ayé’é di?

 ÉYOÑE nlômane Paul ô nga kobô ajô mbunan, ndi nlem a nye’an, ô nga su’ulane jô na “jame da dañe [mefulu] mete mese é ne nye’an. (1 Cor. 13:13) Amu jé Paul a nga jô nalé? Amu na melu ma zu, mfefé émo, da ye beta sili na bi bi mbunane bengaka’a be Yéhôva, amu mame mese bi too me ndi dene ma ye bo me maneya tôéban. Ve da ye sili na bi ke ôsu a nye’e Yéhôva a bôte bevok. Ajô te, nye’ane bia nye’e be wo ye yaé nnôm éto.

² Mbôle nye’ane wo ye ke mane môs éziñ, ajô te da ye sili na bi yalane minsili mi. Nsili ôsu, amu jé bia yiane nye’esane zañe jangan? Nsili baa, aval avé bi ne liti na bia nye’esan? Nsili lale, aval avé bi ne ke ôsu a bo na nye’an ô ne zañe jangan ô tu’a bo ngul?

3. Beamu bevé ba yiane tindi bia na bi nye’esan?

³ Amu jé é ne mfi na bi nye’esan? Éyoñe bia nye’e bobejañ, bia kôme liti na bi ne benya bekristen. Yésus a nga jô minlômane mié na: “A zene nyi, bôte bese ba ye yeme na mi ne beyé’é bam, nge mi bili nye’an e zañe jenan.” (Jean 13:35) Nde fe éyoñe bia nye’esan, nalé a bo na bi ba’ale élat é ne zañe jangan. Paul a nga loone nye’an ôte na nye’ane “wo late bôte nya nlatane.” (Col. 3:14) Ve beta jame mfe a yiane tindi bia na bi nye’esan. Nlômane Jean ô nga jô bekristene bevo’o na: “Môt ase a nye’e Zambe, a yiane fe nye’e monyañe wé.” (1 Jean 4:21) Éyoñe  bia nye’esane bia liti na bia nye’e Zambe.

4-5. Va’a éve’ane ja liti nja ô ne zañe nye’ane bia nye’e Zambe a nye’ane bia nye’e bôte bevok.

⁴ Nja ôvé ô ne zañe nye’ane bia nye’e Zambe a nye’ane bia nye’e bobejañ a besita bangan? Élat é ne zañe nleme wongan a bibu’a bivo’o ya nyule jangan é ne volô bia na bi kôme wô’ô jam éte. Éyoñe dokita a yi na a yeme nge nleme môte wo kute mvo’é, a wô’ô ka’a nye mone minsini wo. Éyoñe dokita a ka’a môte mone minsini wo a ne ngule ya yeme mame méziñe ma fombô nleme môt. Nde nye’elan ôvé bi ne nyoñ été?

⁵ Avale dokita a ne yeme nge nleme wongan ô ne mvo’é éyoñ a ka’a bia mone minsini wo, avale te fe bi ne kui na bi yeme nge nye’ane bia nye’e Zambe ô ne ngul éyoñe bia fombô élate bi bili a bobejañ a besita bangan. Nge bia yene na nye’ane bia nye’e bobejañ ô nga voé, nalé a ne fe liti na nye’ane bia nye’e Zambe ô nga voé. Ve nge bia ke ôsu a nye’e bobejañ, nalé a ne ndeme ja liti na nye’ane bia nye’e Zambe ô ne ngul.

6. Nge nye’ane bia nye’e bobejañ a besita bangan ô nga voé, amu jé jam éte é ne angôndô ya mbia jam? (1 Jean 4:7-9, 11)

⁶ Nge bia yene na nye’ane bia nye’e bobejañe a besita ô nga voé, yeme’e na a ne angôndô ya mbia jam. Amu jé? Amu nalé a tinane na élate bia be Yéhôva é nga ndaman. Nlômane Jean wo kôme jô bia na: “Môt a nji nye’e monyañe wé a yen a mis, a vo’o nye’e Zambe a ngenane teke yen.” (1 Jean 4:20) Jam éte da ye’ele bia jé? Asu na Yéhôva a wô’ô bia mvaé, môt ase ya be bia a “nye’e nyu mbok.”—Lañe’e 1 Jean 4:7-9, 11.

7-8. Mame mevé bi ne bo asu na bi liti na bia nye’esane zañe jangan?

⁷ Bia koon atiñe di abui biyoñe Kalate Zambe “môt ase a nye’e nyu mbok.” (Jean 15:12, 17; Rom. 13:8; 1 Thes. 4:9; 1 P. 1:22; 1 Jean 4:11) Ve nye’an ô ne fulu é ne nlem été, a teke môt a ne yene nleme wongan. Nde, aval avé bi ne liti bobejañ a besita na bia nye’e be? Bi ne de bo a zene ya minkobô miangan a mimboone miangan.

⁸ Bi bili abui mezene ya liti bobejañ a besita na bia nye’e be. Mezene méziñe ya été ma: “Môt ase a kobô’ô môt ba nye be too benya mejôô.” (Zach. 8:16) “Tabané mvo’é zañe jenan.” (Marc 9:50) “Mfa’a ya na môt ase a liti nyu mbok ésemé, bo’ané bôte be ôsu.” (Rom. 12:10) “Môt ase ya be mia a nyoñe’e nyu mbo’o mvo’é.” (Rom. 15:7) “Kelané ôsu . . . a jamé bôte bevok.” (Col. 3:13) “Kelané ôsu a be’e mimbe’e mi bôte bevok.” (Gal. 6:2) “Môt ase a kele’e ôsu a volô nyu mbo’o nlem.” (1 Thes. 4:18) “Môt ase a kele’e ôsu . . . a lôñe nyu mbok.” (1 Thes. 5:11) “Môt ase a ye’elan asu nyu mbok.”—Jacq. 5:16.

9. Amu jé bia liti na bia kôme nye’e bôte bevok éyoñe bia ve be ngule nyul? (Fombô’ô fe fôtô.)

⁹ Bi tame taté zu yene jam éziñe bi ne bo asu na bi liti bôte bevo’o na bia nye’e be. Paul a jô na: “Môt ase a kele’e ôsu a volô nyu mbo’o nlem.” Amu jé bia liti na bia nye’e bôte bevok éyoñe bia volô be minlem? Kalate éziñ a timine bifuse ya Kalate Zambe bite a jô’ô na, éfia “volô nlem” Paul a nga belane je ja tinane na “e  tebe môte fefel asu na ô volô nye éyoñ a tôbane minjuk.” Ajô te, éyoñe bia volô bobejañe ba tôbane minju’u nlem, bia volô be na be beta tebe tetele a ke ôsu a wulu zene ya ényiñ. Éyoñ ése bia volô mojañe nge ke sita a tôbane njuk nlem, bia liti nye na bia nye’e nye.—2 Cor. 7:6, 7, 13.

10. Nja ôvé ô ne zañe nkoon éngôngol a mveane ngule nyul?

¹⁰ Beta nja a ne zañe nkoon éngôngol a mvolane nlem. Amu jé bia jô nalé? Éyoñe môt a wô’ô môt a tôbane minjuk éngôngol, a kômbô bo jam éziñ asu na a volô nye. Ajô te, bi wô’ô taté ko bôte bevok éngôngol, mvuse ya valé nje bia zu volô be minlem. Paul a nga liti na beta nja a ne zañe nkoon éngôngole Yéhôva a mvolane minleme wé. Paul a jô na Yéhôva a ne “Ésa wongan a wô’ô bia éngôngol abui a Zambe ya mvolane minlem ôse.” (2 Cor. 1:3) Éyoñe bia lañe note d’étude ya Kalate Zambe ya nkobô Énglis Paul a belane bifia “wô’ô bia éngôngol” asu na a liti avale bia yiane wô’ô bôte bevok éngôngol. Ajô te “ba loone Zambe na Ésa nge ke anjeñe ya nkoon éngôngol amu fulu nkoon éngôngole ja so be nye.” A fulu éte ja tindi nye na a volô bia minleme “minju’u mise bia tôbane mie.” (2 Cor. 1:4) Avale bivôvoé mendime bia volô bôte ba wô’ô évé minlem, aval éte fe nde Yéhôva a volô bôte ba tôbane minju’u minlem. Nde aval avé bi ne ko bôte bevok éngôngol a volô be minlem ane Yéhôva? Jam ôsu bi ne bo é ne na bi ve ngule ya bi mbamba mefulu me ne volô bia na bi wô’ô bôte bevok éngôngol a volô be minlem. Mefulu mete me ne mevé?

11. Kalate Becolossien 3:12 a kalate 1 Pierre 3:8 a liti na mefulu mevé mefe bia yiane bi asu na bi tu’a nye’e bôte bevok a volô be minlem?

¹¹ Jé ja ye volô bia na bi bi avale nye’ane da ye tindi bia na ‘bi ke ôsu a volô bôte bevo’o minleme’ môs ane môs? Bia yiane jeñe na bi bi mbamba mefulu aval ane fulu ya yeme wô’ô bôte bevo’o mintaé, nye’ane bobenyañ, a mbamba nlem. (Lañe’e Becolossien 3:12; 1 Pierre 3:8.) Aval avé mefulu mete ma ye volô bia? Éyoñe bia ko bobejañ éngôngol a nyoñe ngap a be, bia ye bi nkômbane ya volô be minlem éyoñe ba ye tebe minjuk été. Jôme te nje Yésus a nga jô na, “mame me ne njalane nlem été mme ma kui anyu. Mbamba môt a kuli mbamba be mame ba so nye nlem été.” (Matt. 12:34, 35) Éyoñe bia volô bobejañ a besita be tele minjuk été minlem, bia kôme liti be na bia nye’e be.

12. (a) Amu jé bia yiane tabe ntyele na nye’ane bia nye’e bôte bevok ô bo teke voé? (b) Minsili mivé bia zu jeñe biyalan éyoñe ji?

¹² Bia bese bia kômbô ke “ôsu a nye’esan.” (1 Jean 4:7) Ajô te é ne mfi na bi bo teke vuane mejô me Yésus ma, “nye’an abui bôte wo ye ke wo voé.” (Matt. 24:12) Yésus a nji jô na beyé’é bé abui ba ye bo teke nye’e bôte bevok. Ve bia yiane tabe ntyele ya vu mefulu me bôte ba bômane bia. Nté bia ba’ale jam éte ôsimesan, bi tame zu jeñ éyalane ya beta nsili nyi: Jé ja ye volô bia na bi yeme nge nye’ane bia nye’e bobejañ ô ngenane ngul?

13. Jé é ne telé nye’ane wongane meve’ele été?

¹³ Zene jia é ne volô bia na bi yeme nge nye’ane wongan ô ngenane ngul é ne éyoñe  bia nyoñ éyoñe ya fombô avale bi wô’ô bo éyoñe bi tele bité biziñ. (2 Cor. 8:8) Pierre a nga liti été jia ya été éyoñ a nga jô na: “Jame da dañe mame mese é ne na, môt ase a nye’e nyu mbo’o nya nye’ane, amu nye’ane wo buti abui minsem.” (1 P. 4:8) Ajô te bisek a bikobe bi bobejañe bi ne telé mbunane wongane meve’ele été.

14. Kalate 1 Pierre 4:8 a liti na bia yiane bi avale nye’an avé? Va’a éve’an.

¹⁴ Éyoñe ji, bi tame zu fa’a mame Pierre a nga jô. Ngap ôsu ya éfus 8 ja liti na bia yiane bi—“nya nye’ane.” Éfia “nya” Pierre a belane je ja tinane na “e ndamé jôm éziñ.” Ngabe baa ya éfus éte ja liti jame bia yiane bo éyoñe bia nye’e bôte bevo’o nya nye’ane. Nya nye’ane bia nye’e bobejañ a tindi bia na bi buti bikobe biap. Bi tame zu nyoñ éve’ane ji: Nye’ane bia nye’e bobejañ ô ne ane bi bili mba’an éfus éyé mo, éyoñ éte bia taté na bia kuli je ôte’ete’e ôte’etek akekui ja buti sake nseme wua nge mibaé ve “abui minsem.” E “buti” a tinane na e jamé. Aval éfus éyé é ne buti jôm é ne mvit, avale te fe nye’an ô ne buti bikop a bise’e bi bôte bevok.

15. Nge nye’ane bia nye’e bobejañe a besita ô ne ngul, bia ye kui na bi bo jé? (Becolossien 3:13)

 ¹⁵ Nye’ane bia nye’e bobejañe wo yiane bo ngul aval é ne na—bi ne jamé bikobe biap to’o éyoñe é nji bo tyi’ibi. (Lañe’e Becolossien 3:13.) Éyoñe bia jamé bôte bevok, bia liti na bi bili ngule nye’an, a na bia kômbô ve Yéhôva nlem avak. Jé é ne volô bia na bi jamé bôte bevok a na bi bo teke ji’a wôk ôlun éyoñe ba soñe bia nge ke bo bia jam é ne abé?

16-17. Jé ja ye volô bia na bi biasé bone bikobe bi bôte bevok? Va’a éve’an. (Fombô’ô fe fôtô.)

¹⁶ Beme’e mise môé mbamba mefulu bobejañ a besita be bili, sake bikobe biap. Bi tame nyoñ éve’ane ji. Tame simesane na mia be bobejañ a besita mia lôte mbamba éyoñe nsamba. Éyoñe mi nga zu kandan, éyoñ éte mia nyoñe fôtô nsamba. Mbôl ô nji yeme nge fôtô ôsu a ye bo abeñ, wo beta bise befôtô befe bebaé, éyoñe te a bo befôtô belal. Ve éyoñe wo fombô wua ya été, wo yene na mojañ éziñ a wutan asu. Wo ye bo fôtô ate aya? Wo ye tyame nye amu ô bili befôtô befe be ne abeñ, a môt ase a muñ été, to’o mojañ ate.

¹⁷ Bi ne ve’e befôtô bia ba’ale a mbamba be mame bia ba’ale ôsimesane wongan. Bi wô’ô lôte mbamba biyoñ a bobejañ a besita bangan, a bi ne teke vuane mbamba biyoñe bite. Éko éziñ é nga kui éyoñ  éziñe na mojañe nge ke sita éziñ a jô nge bo mbia jam éziñ. Ye bia yiane ba’ale jam éte ôsimesane wongan? Nga bi ne ve ngule ya vuane jam éte fo’o ve avale bia tyame fôtô a ne abé? (Mink. 19:11; Éphé. 4:32) Bi ne ve ngule ya vuan ékobe kristene fok é nga bo amu bia simesan abui mbamba biyoñe bi nga lôt a nye. Aval asimesan éte nde bia nyane de a jeñe na bi ba’ale.

18. Beta be mame bevé bia te yen ayé’é di a lat a nye’an?

¹⁸ Amu jé bia yi na nye’ane ô ne zañe jangan ô tu’a bo ngul? Avale bia te yen, éyoñe bia nye’e bobejañ a besita, bia liti Yéhôva na bia nye’e nye. Aval avé bi ne liti bobejañ a besita na bia nye’e be? Zen ôsu é ne éyoñe bia volô be minlem. Môt ase ya be bia a ne ke ôsu a volô bôte bevo’o minleme nge a bili fulu nkoon éngôngol. Aval avé bi ne ke ôsu a tu’a nye’esane zañe jangan? Éyoñe bia jamé bikobe bi bobejañ a besita to’o éyoñ é nji bo tyi’ibi.

19. Amu jé bia yiane dañe nye’esane zañe jangan éyoñe ji?

¹⁹ Amu jé éyoñe ji nje bia yiane dañe nye’esan? Tame yene jame Pierre a jô: “Memane ya mame mese me ntoo bebé. Ajô te, . . . môt ase a nye’e nyu mbo’o nya nye’ane.” (1 P. 4:7, 8) Mbôle memane ya mbia émo nyi me ntoo bebé, jé é ne kui bia? Yésus a nga jô beyé’é bé na: “Meyoñe mese ma ye vini mia amu éyôlé jam.” (Matt. 24:9) Asu na bi bi ngule ya jibi évini éte, bia yiane bo jôme jia. Nge bia nye’e bobejañ a besita bangan, Satan a ye ke ve’ele kui na a kandé bia, amu nye’ane—“ñwô wo late bôte nya nlatane.”—Col. 3:14; Philip. 2:1, 2.