Yésus a nga liti bia avale bia ye “[yeme] na Éjôé Zambe é ntoo bebé.” (Luc 21:31, Mfefé Nkôñelan) A nga jô na, abui mam da ye boban ane beta bita, beta mimfô’ôsane mi si, bemfumbale ya zaé a mbia b’akon; nga biabebien bia yene mam mete a mis den?​—Luc 21:10-17.

Nge ô vaa nalé, Bible a liti fe na, “melu me asu’ulan” bôt ba ye bi mbia mefulu. Ô ne ke lañe mam mete 2 Timothée 3:1-5. Éyoñe wo yen avale mimboan ete den, teke bisô na womien wo me’ete na, nkulan ajô ôte wo lu’an a mam ma bobane den.

Nalé a tinan ñhe aya? Na Éjôé Zambe é mbeme bo mintyendan mia ye soo mbamba be mame si va. (Luc 21:36) Éyoñe bia lañe Bible, Zambe a ka’ale na a ye soo mbamba be mame si va, a na bôte ba ye nyiñ été ba ye bu’ubane me. Bi tame yene mam méziñ y’été.

“Ane a nga veban ngule ya jôô, a étôtok, a [éjôé], ajô te nde bôte bese, a meyoñe mese, a minkobô mise b’aye bo nye bisaé: njôane wé ô ne njôane ya nnôm éto, ñwô w’aye bo te lôt, a [éjôé] jé e ne ji j’aye bo te jañ.”​—DANIEL 7:14.

Jôme nalé a tinan: Ô ne ngule ya nyiñe meva’a été éjôé Zambe émien a teléya; Mone wé émien nnye a ne Njôô y’éjôé éte.

“A môt a to été a ye bo te jô na, m’akon.”​—ÉSAÏE 33:24.

Jôme nalé a tinan: Wo ye ke beta kone môs éziñ; wo ye nyiñe nnôm éto.

“A mane mewosan akekui susu’a ya si nyô.”​—BESAM 46:9.

Jôme nalé a tinan: Bita a minju’u mise bi nga soo mie mia ye man.

“Mbia môt a ye fe tabe . . . Ve bôt be ne minlem évôvoé b’aye nyoñe si.”​—BESAM 37:10, 11.

Jôme nalé a tinan: Mbia be bôte bese ba ye jañ, fo’o ve bôte be bili nkômbane ya bo Zambe mewôk mbe ba ye nyiñe si.

“B’aye lôñe menda, a tabe me; b’aye bé mefupe mindik, a di bibuma ya été.”​—ÉSAÏE 65:21, 22.

Jôme nalé a tinan: Si ése ja ye bo angôndô ya abeñe vôm ya tabe. Zambe a ye tôé meye’elane mangan, na nkômbane wé ô boba’ane “si” va.​—Matthieu 6:10.