1-2. Amu jé ñwômane miñwo’an wo fombô bia bese?

ABUI bebo bisaé be Yéhôva ya den e bili ndi nleme ya nyiñe nnôm éto si va. Ve mone doé miñwo’an a li’iya si va a bili ndi nleme ya ke yôp. Miñwo’an mite mia kômbô yem aval ényiñ jé bo be yôbe wôé. Nde ye jam ete da fombô fe Bekristene be bili ndi nleme ya nyiñe si va? Ayé’é di bia zu yene na, ñwômane miñwo’an wo ye fe soo bôte ba ye nyiñe si va abui bibotan. Ajô te, bia bese, bi kusa bo miñwo’an nge momo, bia yiane yeme jôme Bible a jô a lat a ñwômane miñwo’an.

² Yéhôva a nga bo na beyé’é be Yésus béziñ be kobô ajô ndi nleme ya ke nyiñe yôp. Nlômane Jean ô nga jô na: “Bi ne bone be Zambe éyoñe ji, a e ngenan te yené avale bia ye bo. Bia yeme na, nge a yené, bia ye funane nye.” (1 Jean 3:2) Éfus éte ja liti na miñwo’an mi nji yem jôm bé funane je éyoñe ba ye bo minsisim. Ve jam é ne été é ne na, bé kôme yene Yéhôva a mise map éyoñe ba ye bi ma’ane map. Bible a kate ke bia mam mese a lat a ñwômane miñwo’an, ve Paul a nga kobô ajô te mone jôm. Yésus ba miñwo’an bé bo nsamba éyoñ a ye zu tyame bijôé bise y’émo. Bé tyame fe awu, nje éte é ne nsiñe wongan a su’ulan. Mvuse ya valé, Yésus é bo na biôm bise bi bo Yéhôva mewôk, éyoñ éte nje é bulan Ésaa wé éjôé, ndembene ba be bobenyañe bé be’efe bé sulu bebiene si éjôé Zambe.  (1 Bec. 15:24-28) Éyoñ éte é tame ke kui den! *

3. Bela’ane 1 Becorinthien 15:30-32 na ô liti avale ndi nleme ya ñwômane miñwuan é nga volô Paul.

³ Ndi nleme ya ñwômane miñwuan é nga volô Paul na a jibi minju’ a nga tôbane mie. (Lañe’e 1 Becorinthien 15:30-32.) A nga jô Bekristene ya Corinthe na a ne nkômesane ya wu môs ôse. A nga jô fe na: “Me nga wosane betit Éphèse.” Ye a mbe a kobô’ô ajô benya mendumuu be mbe be bo’ a betit nseñe bivôé ya Éphèse? (2 Bec. 1:8; 4:10; 11:23) Ye a kobô ajô biziligane Bejuif bi mbe ane betite ya fé? (Mam. 19:26-34; 1 Bec. 16:9) Bi nji tu’a yem. Susu’a jam bia yem a ne na, Paul a nga tôbane bidim, ve a mbe a too ndi na mvaé jé é solô minju’u yat.​—2 Bec. 4:16-18.

4. Aval avé ndi nleme ya ñwômane miñwuan ja volô bobejañe ya melu ma? (Fombô’ô fôtô ya ékô’ôla.)

⁴ Bia fe bia nyiñe mbia biyoñ. Ba wôé abui bobejañe mesi méziñ. Bevo’o ba nyiñe vôme bita bi né. Ba bevo’o ki be too vôme bijôé bia tyili ésaé nkañete jangan; ve ba ke ôsu a kañe Yéhôva to’o ba yeme na be ne ke mimbôk, nge ke wu wu. Mbamba éve’ela woba a ve bia ngule nyul angôndô. Bobejañ a besita bete be nji mate jôm amu ba yeme na, to’o ba wu den, Yéhôva é ve be édima dase melu ma zu.

5. Mbia mfasane mbé a ne te’e ndi nleme ya ñwômane miñwuan?

⁵ Paul a nga jô bobenyañe bé na be sa’ale mbia mfasane bôte ya éyoñ éte be mbe be bili. Be mbe be jô’ô na: “Nge miñwuan mi ne te wômô, enja’an a nyu, amu akiti bié wu.” Ôsimesan ôte ô mbe ô so’o ôteñ. A ne ve ane Paul a ba’alane bifia ya kalate Ésaïe 22:13; bifia bite bi mbe bi kula’ane mbia nsisime bone ya Israël ya melu mvus. Be li’i kôme bo Yéhôva ésaé, be nga viane telé jôme jia ôsu ve mimvôman, ane wé wô’ô na ba “ya’ane si.” Nne fe abui bôte da nyiñe nalé den. Ve Bible a kôme kate bia minju’ bone b’Israël be nga tôbane mie étome mbia ényiñ ate.​—2 Mka. 36:15-20.

6. Aval avé ndi nleme ya ñwômane miñwuan e ne volô bia na bi yeme tobe bemvôé bangan?

⁶ Ndi nleme ya ñwômane miñwuane ja yiane tindi bia na bi yeme tobe bemvôé bangan. Bekristene ya Corinthe be mbe be yiane’e sa’ale bôte ba biasé ndi nleme ya ñwômane miñwuan. Bi’i ki? Nge bia wulu ve a bôte ba nye’e ambiance, teke ke bisi mam ma yange bia ôsu, biabebiene wôé! Avale bôt ete e ne bo na bi ndaman élate jangan a Yéhôva. Bi ne tem bi nga kaa na bia bo mame Yéhôva a vini. Jôm ete nje Paul a nga lebe Bekristene na be kôme yooé mis asu na be bo te bo jam éziñ e ne abé.​—1 Bec. 15:33, 34.

7. Bela’ane kalate 1 Becorinthien 15:35-38 na ô kate bia nsili bôte béziñe be ne sili a lat a ñwômane miñwuan.

⁷ Lañe’e 1 Becorinthien 15:35-38. Éko éziñe bôte béziñe be mbe be sôane na ñwômane miñwuane wé  boban amu be nji be be yeme’ éyalane ya nsili wu: “Miñwuan mia wômô aya?” E ne mfi na bi yem éyalane Paul a nga ve, amu to’o dene fe, bôte ba jô bijôjô a lat a jame da bobane mvus awu. Bible ki a ye’ele aya?

8. Éve’an évé Paul a belane je asu na a liti avale miñwo’an mia wômô?

⁸ Nyule jangane ja boé éyoñe bia wu. Nde ye Zambe a ne fo’o beta ve bia ényiñ a mimfefé menyôle nga? Te bia vuane na, nnye a nga bôndé fe’e ya té biôme bise bi ne yôp a si. Nde ye bi ne buni na a ne kate wômôlô mimbim? (Met. 1:1; 2:7) Paul a belan éve’an éziñ asu na a liti na Yéhôva a ye ke tu’a wômôlô miñwo’an a menyôle be nga be’e éyoñ be nga wu. A ne ve ane ‘jôm môt a bé.’ Éyoñe wo futi fese si été, é wô’ô faa aya? Ye ja beta vame si é too fes? Teké’é, mon élé nge ke mon élok nnye a wô’ô vam. Teke fe ajô a fese wo te futi si. Paul a belan éve’an éte asu na a liti na, éyoñe Zambe a wômôlô môt, a ve nye nyul a yene “mvaé” ya ve nye.

9. Bela’ane 1 Becorinthien 15:39-41 na ô liti na Yéhôva a nji té biôme bise avale da.

⁹ Lañe’e 1 Becorinthien 15:39-41. Paul a liti bifuse bite na Yéhôva a nji té biôme bise avale da. Tit ése é bili avale nyule dé. Anon da selane bekos a binyaka. A jô fe na nlô jôbô a selane ngon. A na ‘ôteté wua wo selan ôteté ôvo’o mfa’a ya étôtok.’ To’o bia tu’a ke yen ateté amu e ne ôyabe yôp, beyeme mam ba jô na ateté e ne mevale meval. Ateté éziñ é ne nya anene, da avo’o ke aka’a tyôtyoé; éziñ é ne nyul évele, da avo’o ki éfumulu nge ke nyule mfô ane nlô jôbô. Paul a nga jô fe na “menyôle ya yôp” me ne, “menyôle  ya si” fe me ne. Jé Paul a mbe a kômbô’ô jô? E si va, bi bili menyule minsôn, ve bôte be ne yôp ane beéngele, be ne minsisim.

10. Bôte bé ke yôp ba ye wômô a avale nyul avé?

¹⁰ Paul a ke ôsu a jô’ô na: “Nalé ate fe ñwômane miñwuan ô né. Ja béban a boé; ja wômô, te boé.” Nne da bobane fo’o nalé; éyoñe môt a wu, a bulane metek. (Met. 3:19) Nde jé ja tinane ñhe na e “wômô, te boé”? Paul a nji kobô ajô bôte bé wômô a ke ôsu a nyiñe si va; ane bôt Élie, Élisée, a Yésus be nga wômôlô melu mvus. Ve a kobô ajô bôte ba wômô na be ke nyiñe yôp. Zambe a ve bôte bete ‘menyôle ya nsisim.’​—1 Bec. 15:42-44.

11-12. Yésus a nga wômô a nyule fé, miñwo’ane ki mii wômô aya?

¹¹ Éyoñe Yésus a mbe si va, a mbe a bili nyule minsôn. Ve éyoñ a nga wômô, “a nga boban nsisim wo ve ényiñ” a bulane yôp. Nne fe da bobane nalé asu miñwo’an. Paul a timine jam ete a jô’ô na: “Aval ane bi nga be’e éfunane ya nyôle ya si, bia ye fe be’e éfunane ya nyôle ya yôp.”​—1 Bec. 15:45-49.

¹² Paul a ke luu ôbut a jô’ô na: “Minsôn a metyi bi se ngule ya bo ngape ya ayoñe Zambe.” (1 Bec. 15:50) Mejô mete ma tu’a liti na Yésus a nji wômô a nyule minsôn. Aval ete da da a ñwômane miñwo’an. Ba wômô ki a nyôle minsôn a metyi, ve a nyôl é ne te boé. Nde ñwômane wop ô mbe na wo taté éyoñ évé? Paul a nga jô na ñwôman ôte ô mbe ô nga’ane te taté, a na miñwo’ane mi mbe mi wo’o melu mete, mi nji be mi wômô’ été été. Éyoñ ébien a tili’i kalate Becorinthien ôsu, beyé’é béziñ ane Jacques, be mbe be wuya. (Mam. 12:1, 2) Mvuse  ya valé, minlômane mi nga su’ulane fe mane wu.​—1 Bec. 15:6.

13. Mam mevé ma ye liti na Yésus a tebeya Njôô?

¹³ Paul ba Yésus bese bebaane be nga kobô ajô ya éyoñe Krist é tebe Njôô. Be nga jô na bita, mimfô’ôsane mi si, bibubua bi akon, a bitua bi mam bife bia ye bo ndeme ya na bi nga nyiñe biyoñe bite. Nkulan ajô ôte ô nga taté na wo jalébane mbu 1914. Yésus a nga jô fe na mbamba foé ya Éjôé Zambe “a ye katebane si se, a ye bo meyoñe mese ndem; wônaa asu’ulane da ye bo.” (Mt. 24:3, 7-14) Paul a nga jô na, a ne ve éyoñe Yésus é bo Njôô nde fe miñwo’ane mi nga mane wu mii taté na mia wômô.​—1 Bet. 4:14-16; 1 Bec. 15:23.

14. Mvome fé miñwo’ane mia wômô melu ma mi bili?

¹⁴ Miñwo’ane mia wu melu ma mia wômô été été. Mejô me Paul bia koone me 1 Becorinthien 15:51, 52 ma yemete jam ete. A jô na: “Bia bese bia ye bo te tabe ôyo, ve bia bese bia ye veñesan, ôyôme nté, nté ya nkabeke dis, éyoñe toñ ja su’ulan ja kobô.” Mejô me Paul mete ma tôébane den. Ngo’ abime meva’a bobenyañe be Krist bete ba bu’ubane me éyoñ ba wômô! Ba kôme bi mvome ya “tabe [a] Tate nnôm éto”!​—1 Bet. 4:17.

15. Ésaé évé miñwo’ane mia ye ke bo yôp?

¹⁵ Bible a kate bia ésaé miñwo’ane mia ye ke bo yôp. Yésus a nga jô na: “A nyô a dañ, a nyô a ba’ale mimboane mi mam miam akekui asu’ulan, nnye  ma ye ve ngule ya jôô meyoñ: a a ye jôô me a ntum étyé, aval ane mevie’e ya mmé mevie’e ma bôlé bifase bifas; aval ane ma fe me nga nyoñ be Ésaa wom.” (Nli. 2:26, 27) Ba be Yésus ba ye jôô meyoñ a ntum étyé.​—Nli. 19:11-15.

16. Aval avé bone be bôte bé dañ awu?

¹⁶ Miñwo’ane mia ye dañ awu teke vaa nge beté. (1 Bec. 15:54-57) Mvuse ñwômane wop, ba ye bo ngule ya vaa mbia be bôte bese si va. Jam ete dé boban Harmaguédon. Wônaa bizu’u bi bôte bii dañe bita ya Harmaguédon bii bi mvome ya nyiñe mfefé émo. (Nli. 7:14) Bia ye fe yen ane bemillion be bôte be nga mane wu ba wômô miñwuan. Ngo’o abime meva’a bia ye wô’ô môse ba jô wu! (Mam. 24:15) Éyoñ éte nje fe ba bese ba ke ôsu a wulu ba’aba’a a Yéhôva ba ye dañ awu e nga so bia be Adam a bi fane ya nyiñe nnôm éto.

17. Bela’ane 1 Becorinthien 15:58 asu na ô liti jame bia bese bia yiane bo den.

¹⁷ Nleme wo yiane bômbô bia bese si éyoñe bia lañe mejô me Paul bia koone me kalate Becorinthien ôsu a lat a ñwômane miñwuan. Jôm ete nje bia bese bia bibane na bi tôñe melebe mé ya “bulu bo ésaé Tate.” (Lañe’e 1 Becorinthien 15:58.) Nge bi bo mban ésaé Yéhôva, wônaa bia ye bu’ubane mbamba ényiñ a yange bia melu ma zu. Ngo’o môse bia jôô wô wu! Môt é kôme li’i anyu é yoo, a sili’ émiene na: ‘Za aka’a mvaé di! Nde me nga yeme fo’o bo Zambe wom ésaé!’