BI NE mbu 2018, môse nté wua, Ngon ôsu é too melu 24, bobejañe ya Béthel ya États-Unis a Canada be nga wô’ô mvaé éyoñ be nga kate be foé nyi: Mojañ Kenneth Cook, Jr. a ntoo ébu’a ya Tin ékôane Bengaa be Yéhôva.

Mojañ Cook a nga bialé Pennsylvanie, États-unis, nne fe a nga yaé wôé. Mongô éziñe ya aba sikôlô dé nnye a nga ye’ele nye benya mejôô mbu a nga kandane tabe lycée. A nga dubane mbu 1980, Ngone samane é too melu 7, a nyoñe ki ésaé nkpwa’a mefan Ngon ébulu é too alu 1 ya mbu 1982. Éyoñ a boya ésaé nkpwa’a mefan mimbu mibaé, nde be nga loone nye Béthel ya Wallkill e New York, e Ngon awômô é too melu 12, mbu 1984.

Mimbu 25 mi nga tôñe valé, Mojañ Cook a nga saé Wofise ba kuli bekalate a Wofise ya Béthel. A nga lu’u Jamie mbu 1996, ane nye fe a nga taté na a saé Wallkill. Ngon awôm a baa ya mbu 2009, be nga lôme Mojañ Cook ba ngal Centre d’enseignement des Témoins de Jéhovah ya Patterson, e New York, a nga saé service du courrier biblique. Ngone nyini ya mbu 2016, éyoñ Mojañ Cook ba ngal be tatéya beta kpwañe Wallkill, be nga lôme be Brooklyn, e New York. Mvuse ngon étan, be nga lôme be Wofise wo tebele ésaé Warwick, e New York. Ngon ôsu ya mbu 2017, be nga telé Mojañ Cook Mvolô Émo’o asu ntilane bekalate ya Tin ékôan.