Bôte be wô’ô bo bôte ba so minlame mife, ayoñ afe, nge ke nkobô ôfe ôbangam, ve be nji su’u valé. Ba liti fe fulu éte be bôte ba be be be nji bo ñyebe wua, nkôñ ényiñe wua; a ne fe bo amu môt a ne fam nge minga. Bôte béziñ ba ji’a tyi’i bôte bevo’o mejô fo’o ve amu ôkala wop, éyeka’a jap, ñye’elan be nga bi, nge ke amu môt a ne éyem. Ve bôte bete be nji tu’a yemelane na be ne ôbangam.

Ye ô mbili fulu ôbangam? Abui da yene na bôte befe mbe be bili fulu éte. Ve e ne ôbe ayaé ya yemelane na biabebien bi ne ôbangam. Nya ajôô ki a ne ñhe na, môt ase ya be bia a ne ôbangam abim éziñ. David Williams, beta ñyeme mam a jô na: “Éyoñ môt a nji dañe nye’e nsamba bôt éziñ, nge a yene môt a so nsamba ôte, a ye taté na a tyetebe nye, éko éziñ émien teke yeme na a nga bo de.”

Vôme Jovica a nyiñ Europe ya sud-est, mon ayoñe bôt éziñ a ne wôé. Jovica a jô na: “Me mbe me buni’i na bôte bese ya ayoñ ete be ne mbia be bôt. Me nji be me yeme’e na me ne ôbangam. Me mbe me jô’ô ve na jam ma simesan a lat a be e ne été.”

Abui bijôé da telé metiñe ma wosan ôbangam. Ve fulu éte ja ke ôsu. Amu jé? Amu metiñe mete ma wosane ve mimboane mi mam mi bôt. Me se ngule ya nambe mam bôte ba fas a aval ba wô’ôtane nlem. Ôbangam wo taté ôsimesan a nleme môt été. Nde, ye môt a ne ngule ya wosane fulu ôbangam a dañe je? Ye mam méziñ me ne volô bia na bi vaa fulu ôbangam?