Beye’ele be nga kee bongô be sikôlô dulu éziñ. Mbia jam ve zu kui: bobefam béziñ ya sikôlô ate be nga jô’ôbô monafam mbok a ngu. Bese be mbe mfañe sikôlô éziñ ya Canada. Mvuse mbia jam ate, Leonard Stern a nga tili kalate Ottawa Citizen na: “Mongô a ne bo atyeñ, a ne bi abui ñyeman a biôm bi mo; ve mam mete mese me vo’o kamane nye na, a bo mbia be mam.”

Stern a ke ôsu a jô na: “Jam ôsu bebiaé ba yiane sôñ éyoñe ba ye’ele bone bap é ne na, be yeme kandé mvaé ba abé. Ve mbia jam a ne na, bebiaé ba viane tindi bone bap na, be bo beta besikôlô asu na be bi mfañ ésaé wo ye ve be abui moné.”

E ne été na, sikôlô a ne mfi. Ve ja’a môt a bili abui ñyeman aya, jam ete e vo’o volô nye na, a juan a mbia minkômbane mié. Nde ñhe, bi ne bi ñyeman ô ne volô bia na, bi wosane mbia minkômbane miangan vé?

Kalate Zambe a ne ane ngobô. Éyoñe bia lañe nye, bia kôme yene minné miangan a mbia mefulu bi bili. (Jacques 1:23-25) Ve Kalate Zambe a nji su’u valé. A volô bia na bi bo mintyendan mia yian, a bi mefulu ma so mvo’é. Bi ne lañe fulu mvam, nkoon éngôngol, ôjibi, njôane nlem, a nye’an. Kalate Zambe a liti na, nye’an ô ne “élat ja dañe mvaé.” (Becolossien 3:14) Amu jé nye’an ñwô wo dañe mfi? Tame yene jame Kalate Zambe a jô a lat a fulu éte.

• “Nye’an wo ajaé jibi, a ô ne mvam; nye’an ô ne te bo mesengan; nye’an ô ne te wumu ôbien, ô ne te bo mebun, ô ne te bo ane e ne te yian, ô ne te jeñe mam mé, ô ne te yaa, ô ne te lañesan abé; ô ne te va’a vôm ya ékotekot, ve wo ava’a a benya mejôô, wo abuti mam mese, . . . wo ajibi mam mese. Nye’an ô ne te ke man.”​—1 Becorinthien 13:4-8.

• “Nye’an ô ne te bo môt mfe abé.”​—Beromain 13:10.

• “Jame ya ôsu mfa’a ya mam mese, mi bo’an ayôñ mfa’a ya nye’ane wônan miabebien mia nye’esan; amu nye’an wo abuti jama mbia be mam.”​—1 Pierre 4:8.

Ô wô’ô wô’ô aya éyoñe ô ne nsamba a bôte wo nye’e? Nga nlem ô bôô wo si ne mieññ? Yaa! Amu wo yeme na ba yi mvo’é jôé, a be vo’o vañe bo wo jam é ne kolé wo ôbak.

Nye’an ô ne fe tindi bôte na be nyume bebiene mam, nge tyendé fatan ényiñe jap asu mvo’é bôte bevok. Bi tame nyoñ éve’an: George a mbe  mevak éyoñ a nga bi ndaé; a mbe a kômbô’ô lôt éyoñ a nye. Ve a mbe a bili nju’ éziñ. George a mbe a nya’a sika nyé, nde nnôme ngone wé a nga jô nye na, a bo te nyu sika vôme mon a né. George a nga bo aya? Akusa bo a mbe a nyuya ta’a tañe mimbu 50, a nga jô’é mbia fulu ate asu mvo’é ndaé jé. Nga mi lôô ngul nye’an ô bili!

Nye’an ô ne fulu bia yiane jeñe na bi bi. Bebiaé be bili beta mbe’e ya ye’ele bone bap avale be ne liti fulu nye’an. Ba ve be jôme ya di, ba kamane be, a ba volô be éyoñe ba kon nge éyoñe jam éziñ da ndeñele be. Bebiaé ba nye’e bone bap ba laan a be a ba ye’ele be. Ba ve be melep, a ba ye’ele be avale be ne yeme kandé mvaé ba abé. Ba liti fe bone bap mbamba éve’ela.

Ve éngôngole jam é ne na, bebiaé béziñ ba bo ki ésaé jap avale da yian. Ve, ye nalé a tinane na, bone bap ba ye jaé ntuk? Teké’é fo’o! Ja’a bôte be nto benya bôtô, a ba be nji yaé mbamba nda bôt, be nga bo mintyendan ényiñe jap, a su’ulane bo mbamba be bôt. To’o bôte bi nji be bi buni’i na be ne tyendé môs éziñ be nga kui na be bo de; nlô ajô wo tôñe le wo zu kobô ajô te.