Ñye’elan wo so Bible ô ne ngule ya tyendé binyiñe bi bôt. Tame yene bive’ane bibaé bi: Ricardo ba Andres.

RICARDO: Me nga nyiine nsamba beze mimfaka me to mimbu 15. Be nga bo na me tyendé abui. Ane me nga tyi’i na ma yiane bo mimbu awôm nda mimbôk! Jam ete é ne yené akut, ve vôme me nga nañ, be mbe be se’ a semé bôte be nga tabe mimbôk tañe mimbu awôm. Ma fe me nga kômbô vu be.

Me nga bo mam mese beze mimfaka be mbe be bo’o, nyuane banga, ébamba a évô. Alu éziñ, bi mbe bi luma’ane mengal. Me nga jô fo’o na me wuya, ve me nga fam awu. Mvuse ya valé, me nga taté na ma fas ényiñe jam a minsôñane miam; nde me nga tyi’i na ma zu tyendé. Ve aya? Me nga ye yene mvolane vé?

Abui bivuvumane biam é nji be é nyiñi’ meva’a été. Be mbe be bili abui minjuk. Ve nda bôte ndômenyañe jam é mbe é nyiñi’ meva’a été. Me mbe me yeme’e na be ne mbamba be bôt, a na ba tôñe miñye’elane ya Bible. Be nga ye’ele ma na, éyôlé Zambe é ne Yéhôva. Mvuse mbia jam a nga boban, me nga sili Yéhôva mvolan meye’elan, me bela’ane éyôlé jé! Me mbe fe’e ne vema éyoñe Ngaa Yéhôva éziñ a nga zu kute ma mbé môs ô nga tôé valé. A nga taté na a ye’ele ma Mejô me Zambe.

Me nga ji’a tôbane beta njuk. Bemvôé me nga taté bi be mbe be loene ma na bia be be bi beta bo nsamba. Akusa bo é nji be tyi’ibi, me nji kañese. Me nga tyi’i na ma zu kee ayé’é ôsu, a me ne mevak amu me nga bo de. Me nga tyendé nya ntyendane, a me mbe me nto mevak.

Ma simesan éyoñe me nga kate Zambe meye’elan été na, ma kômbô bo mimbu awôm nda mimbôk asu na bôte be semé ma. Ve mvuse ya valé, me nga jô nye na, a kañese na me bo nkpwa’a mefan to’o ve mimbu awôm asu na me volô bôte bevok, fo’o v’ane be nga volô ma. Zambe a nga yalane ma, amu me nga bo nkpwa’a mefan tañe mimbu 17! Me nji telé abo nda mimbôk môs éziñ.

Abui bemvôé me mbe me bili é nga tabe ayabe nda mimbôk. Bevok be maneya wu. Éyoñe ma fombô mvus, ma ve bivuvumane biam bi ne Bengaa akéva. Be nga jeñe na be selane bôte bevok, be tôñe miñye’elane ya Bible. Me nga su’ulane semé be a dañe beze mimfaka bia be be bi mbe bi wulu’u. Ma ve fo’o Zambe akéva amu a nga volô ma na me yeme nya zene.

 ANDRES: Me nga yaé azoé été vôme banga, wup, mewôé me bôt a ébamba bi ne vôm ase. Ésa wom a mbe nso’o meyok, a to fe ôlo banga. Ba mema be mbe be juan éyoñ ése, be taane fe.

Me nga taté na ma nyu meyok a banga me to mongô. Me mbe me nyiñi’ minseñ minseñ, me kele ma wube bôte biôm, me kuane fe bie. Éyoñ me nga bo nya môtô, pepa a nga kômbô volô ma; nde a nga jô ma na, me kuane banga a biôm bife éjôé ja tyili. Me nga ji’a bi abui moné. Mvuse ya valé, bezimbi be nga zu bi ma nda a bôté ma ajô na, ma te kômbô wôé môt . Nde be nga fete ma mimbôk tañe mimbu mitan.

Tyé éziñ, be nga bañete mimbô’ô mise na, mi ke vô’ôlô minkañete Bengaa be Yéhôva. Nde me nga tyi’i fo’o na ma ke. Mam me nga wôk me nga nambe ma, nde me nga taté na ma yé’é Bible a Bengaa be Yéhôva. Be nji jeñe na be kate ma jam ma kômbô wôk, ve be nga liti ma miñye’elan mi ne Bible été.

Me nga ji’a yeme na, me vo’o kui na me tyendé nge be nji volô ma, e dañe dañ éyoñe bemvôé me mbe me bili be nga taté na ba tibili ma amu me mbe me yé’é Bible. Nde me nga sili Yéhôva ngule jé a fe’e jé meye’elan été. Ane a nga volô ma na, me bo te sulu mo si, a ve fe ma ayo’o nleme ya kañete mimbô’ô mivok.

Éyoñ éyoñe ya kui mimbôk é nga kpwaan, woñ ô nga bi ma; awolo te, me nji be me kômbô’ô kôlô nda mimbôk. Éyoñe me kele’e, abui mimbôk é nga zu ya’ane ma. Bevo’o y’été be nga jô jô ma na, “Kele’e mvo’é, a môta Zambe.”

Nlem ô ne ma abé éyoñe ése ma simesan aval ényiñe jam é nga ye bo, nge me nji ye kañese na Yéhôva a ye’ele ma. Ma ve nye abui akéva amu a nga liti ma nye’ane wé, a amu a nji wua ma fé. *