ASU BEBIAÉ
7: Mbamba mefulu
JÔME NALÉ A TINAN
Mbamba mefulu me ne abo dulu womiene wo tobe na, wo tôñ ényiñe jôé. Bi ne nyoñ éve’an: ye wo ve ngule jôé ése na ô bo zôsô e mam mese? Amu nalé, wo ye fe kômbô ye’ele bone bôé mbamba fulu ate.
Mbamba mefulu ma wulu fe a mbamba ntaban. Éve’an é ne na, môt a bili mbamba miñye’elan a lat a avale ba yiane nyiñ a nye’e a saé a bôte bevok, a ne zôsô, a nyoñe fe bôte bevo’o ngap (mefulu me ne tyi’ibi ya yale éyoñ môt a ngenan ésoé).
ÑYE’ELANE YA BIBLE: “Ye’ele’e mongô zen a yiane ke, ja’an éyoñ a nto nnôm, a ye bo te kôlô je.”—Minkana 22:6.
AMU JÉ É NE MFI
Mbôl émo é nto njalan a technologie, mbamba mefulu me ne mfi. Minga éziñ a to jôé na Karyn a jô na: “Ô ne ngule ya koone mbia be mam be ne tindi wo abé avale minsini ese, a awolo ése. Bone bangan be ne ngule ya tabe bia fefel ve da, be yene’e fe mvite mam!”
ÑYE’ELANE YA BIBLE: “Benya bôtô . . . be [bili] ngule ya yemelane jôm é ne abé a ji é ne mvaé.”—Behébreu 5:14, Mfefé Nkôñelan.
Mbamba ntaban a ne nya mfii. A nambe bone be mam (aval ane e jô na “engôngol” a “akiba”), a ne fe fulu ya liti bôte bevo’o na wo nyoñe be ngap: fulu é nto njeñeban, amu bôte ba dañe nyoñe ngap a biôme bi mo biap aval ane beminsini a lôte môta binam.
ÑYE’ELANE YA BIBLE: “Ane mi anye’e bôt be bo’o mia, bo’ane fe be aval ete.”—Luc 6:31.
JAM Ô NE BO
Kate’e be mefulu wo yi na be bi. Bi ne nyoñ éve’an: befase mam ba jô na bisoé bi ne ji’a sa’ale nkeane binoñ ôsusua na bia luk nge ba tu’a bie kate na mboan ôte ô ne abé.
MELEP: Ô ne belane jam é ndôme boban asu ya na ô taté minlañ mia fombô ajô mbamba mefulu. Éve’an é ne na, nge mefoé ma kañete ajô mewôé me bôt amu ziñ, ô ne jô na: “Jam ete é ne angôndô ya abé, avale mbia ñwô’an ôlune bôte ba wô’ô ba bevok ji! Wo simesane na bôt ba kui na be su’ulane bo nalé amu jé?”
É ne nya ayaé na bongô be yeme nsela’ane a ne zañe mvaé a abé nge bebien be nji yeme jé é ne mvaé a jé é ne abé.”—Brandon.
Ye’ele’e mbamba mefulu. Kalate Parenting Without Borders a jô na: “Ja’a bone be bongô be ne yé’é jô na “éngôngol” a “akiba,” be semene fe bôte bevok. Avale bongô ba yene na be ne bibu’a ya beta nsamba bôt (aval ane nda bôt, sikôlô, ayoñ) aval ete fe bé bo nkômesane ya bo mbamba be mam bé volô bôte bese, sa ke ve bebien étam.”
MELEP: Va’a bone bôé bisaé asu ya na ô ye’ele be fulu ya saane bôte bevok.
“Nge bone bangan ba mane yemban a bisaé den, dé bo be tyi’ibi éyoñe bé taté na ba nyiñ étam. E yeme be’e mimbe’e miap é bo é nto be ngumba fatan ényiñ.”—Tara.
