Môt éziñ a mbe a nyiñe si ya Uts a to jôé na Job. A mbe a bo’o Yéhôva ésaé. A mbe a bili abui akum a beta nda bôt. A mbe mbamba nlem, a mbe a volô minzôzoé, minkus a bobenyui. Ve ye wo buni na, a nji tôbane minjuk mbôl a mbe a bo’o mam me ne mvo’é nga?

Job a nji be a yeme na Satan a fombô mam mese a bo. Môs éziñ, Yéhôva a nga sili Satan na: ‘Ye ô yeneya fo’o mbo ésaé wom Job nga? Amu môt a nji bo ane nye si nyô. A ne mewôk, a ne fe zôsôô.’ Nde Satan a nga yalane na: ‘Ye Job a bo wo mewô’ô e zezé? Ke a ne amu wo kamane nye a botane nye. Wo ve nye abui si a biyem. Tame vaa nye biôm bite bise, bi yen nge é beta kañe wo.’ Ane Yéhôva a nga jô nye na: ‘Ve’ele nye nge wo yi, ve te wôé nye.’ Amu jé Yéhôva a nga jô’é na Satan a ve’ele Job? Amu a mbe a yeme na Job a vo’o lume nye mvus.

Ane Satan a nga taté na a tibili Job a zene ya abui bibubua. A nga taté bo na Besabéen be zu wube benyak a bijakas bi Job. Mvuse ya valé, nduan é nga mane di’i mintômba mié mise. Ye mon étun a nga tame lôt, ane Bechaldéen fe be nga mane zu wube bechameau bé bese. Be nga wôé fe bebo bisaé be mbe be ba’ale biyeme bié. Jam da dañe dañ é mbe na, môs ôte bone be Job be mbe be ja’ak, be nya’ak, éyoñ éte nda é nga ku be nyul, bese be mane wu. Jam ete e nga bo nye mintaé nlem, ve a nji lume Yéhôva mvus.

Ve Satan a nji su’u valé. A nga lume nye mbia ôkon, mot me nga kui nye nyul ése. Mintaé mi Job mi nga be abui. A nji be a  yeme’e amu jé a tôbane minju’u mite mise. Ve Job a nga ke ôsu a bo Yéhôva ésaé. Zambe a nga wô’ô mvaé amu a nga yene Job a kele ôsu a bo nye ésaé.

Ane Satan a nga lôme bôte belal na be ke ve’ele Job. Bôte bete be nga jô Job na: ‘Teke vaa nge beté, wo jeñe na ô solé mbia jam éziñ ô nga bo, jôm ete nje Zambe a foñôsô wo.’ Ane Job a nga yalane be na: ‘Teké’é, me nji bo mbia jam éziñ.’ Ve Job a nga taté na a simesane na, Yéhôva nnye a bo na a tôbane mbia be mam bete. Ane a nga jô na, Zambe a nji bo zôsôô.

Ndômane môt éziñ é too jôé na Élihu, é nga kôme vô’ôlô minlañe mi Job a bôte belal be nga zu lebe nye. Éyoñ a nga nyoñe nkobô, a nga jô be na: ‘Mam mese mia te jô me nji bo été. Yéhôva a ne angôndô ya mvam, a dañ abime mona môt a ne simesan. A vo’o ke bo mbia jam éziñ. A yene mam mese ma boban, a jeñe fe na a volô bôte be tele minju’u été.’

Éyoñ éte nje ñhe Yéhôva a nga kobô Job a jô’ô na: ‘Ô mbe vé éyoñe me nga té yôp a si? Amu jé wo jô na me nji bo zôsôô? Wo kobô mam ô nji yem.’ Ane Job a nga meme na a nga kop, ane a nga jô na: ‘Ma te fo’o kop. Me jaéya wô’ô be kobô’ô ajô dôé, ve den, me lôô wo a mise mam. Teke jam éziñ é ne kate wo. Ma jôbane mam mese me nga jô.’

Mvuse ya valé, Yéhôva a nga bulane ve Job mvo’é jé ya minsôn, a beta fe nye ve abui biôm a dañ abim a mbe a taté bi. Job a nga beta nyiñ abui mimbu meva’a été. Yéhôva a nga botane Job amu a nga bo nye mewôk, akusa bo minju’u a nga tôbane mie. Ye wo ye fo’o vu Job, ye wo ye fo’o ke ôsu a kañe Yéhôva ja’a wo tôbane minjuk?