Moïse a mbeme wu. Valé a wuluya ayoñ mimbu mimbu. Yéhôva a nga jô nye na: ‘Ma zu bo na ô yene Si ya Ntiñetan, ve sa ke wo wo ye nyiñili ayoñe dam e si éte.’ Ane Moïse a nga jô Yéhôva na a tobe ñhe môte mfe, asu na môt ate a wuluu ayoñe dé. Nde Yéhôva a nga yalane nye na: ‘Kele’e kate Josué na, nnye me tobeya.’

Moïse a nga kat ayoñ ése na a mbeme wu, a na, Josué nnye a ne môte Yéhôva a te tobe na, a kee de Si ya Ntiñetan. Nde Moïse a nga kobô Josué a jô’ô nye na: ‘Te ko woñ. Yéhôva émien a ye volô wo.’ Mvuse ya valé, Moïse a nga bete Nkôle Nebo. Éyoñ a kuiya nkôle yôp, Yéhôva a nga liti nye si a nga ka’ale Abraham, Isaac, a Jacob. Moïse a nga wu a bili mimbu 120.

A nga bo na, môs éziñ, Yéhôva a nga loone Josué a jô nye na: ‘Dañe’ Ôsôé ya Jourdain, a kelek e Canaan. Ma ye volô wo avale me nga volô Moïse. Bo’o mbane ya lañe Metiñe mam môs ôse. Te ko jôm éziñe woñ. Bo’o ve mam ma jô wo na ô bo.’

 Josué a nga lôme beloé si bebaé e tison be mbe be loone na Jéricho. Bia ye dañe kobô ajô ete kabetôlô a zu. Éyoñe beloé si be bulaneya, be nga kate Josué na, mbamba éyoñe ya nyiine Canaan nnye le. Tyé kpwa, Josué a nga jô môt ase na, awolo ya téé é kuiya. A nga jô bepretre be mbe be be’e éwolo élat na be ke ôsu. Éyoñe be kuiya Jourdain, be nga koone na ôsôé ô ne ndôn. Ve nné ane be nga telé mebo map mendim, nde ôsôé ô nga tebe ô teke beta lôt, a mendim y’ôsôé me nga vele! Nde bepretre be nga wulu akekui Jourdain zañ, a tebe valé, akekui ayoñ ése é nga dañ ôsôé. Ye wo buni na jam ete e nga bo na, bon b’Israël be beta simesan avale Zambe a nga kôté be Évele Mañ?

Ane bon b’Israël be nga ke kui Si ya Ntiñetan. Be nga lôñe menda a bitison. Be nga bé mefube bidi, mefube mindik, a bilé bife bia wum bibuma. Menyañ a wôé bi mbe bi lene’e si éte.