Nge w’akômbô bo mvôé Zambe, w’ayiane tôñe ñyebe Zambe a nye’e. Yésus a nga jô na “benya bebuni” b’aye kañe Zambe a “benya mejôô.” (Jean 4:23, 24) Zôsôô zen ya kañe Zambe é ne ve jia. (Beéphésien 4:4-6) Zôsôô ñyebe j’ake môt ényiñ ya nnôm éto, ve évus ñyebe w’ake nye awu.​—Matthieu 7:13, 14.

Ô ne yemelan zôsôô ñyebe nge wo fombô bôt ba tôñe wô. Aval Yéhova a ne mvaé, nde fe benya bebuni b’ayiane bo mbamba be bôt. Aval ane mbamba élé ôfumbi j’awum abeñ bibuma, nde zôsôô ñyebe fe a yiane miase mbamba be bôt.​—Matthieu 7:15-20.

Bemvôé be Yéhova ba tu’a semé Kalate Zambe. Ba yem na Kalate Zambe aso be Zambe. Ba jô’é na mam Kalate Zambe a kobô me wuluu ényiñ jap, me volô be éyoñ be bili minjuk, a me ye’ele fe be mejô me Zambe. (2 Timothée 3:16) Ba jeñ na be bo mam ba ye’ele.

 Bemvôé be Yéhova ba nye’esan. Yésus a nga liti na a nye’e bôt éyoñ a nga ye’ele be mejô me Zambe, a saé mikôkon. Bôt ba tôñe zôsô ñyebe fe b’aliti na b’anye’e bôt bevôk. Aval ane Yésus, be nji biasé minzôzoé mi bôt nge bôt y’ayoñ afe. Yésus a nga jô na b’aye yemelan beye’é bé a zen ya nye’an be bili zañ jap.​—Jean 13:35.

Bemvôé be Zambe ba wumulu jôé dé e ne na Yéhova. Nge môt a ben a belan éyôlé jôé, ye a ne bo nya mvôé wôé? Momo! Éyoñ bi bili mvôé, bia belan éyôlé jé a wumulu nye be bôt befe. Nde bôt ba yi na be bo bemvôé be Zambe b’ayiane belan éyôlé jé a kate bôt befe mam mé. Yéhova a yi na bi bo nalé.​—Matthieu 6:9; Beromain 10:13, 14.

Aval ane Yésus, bemvôé be Zambe ba ye’ele bôt mam y’Éjôé Zambe. Éjôé Zambe é ne Éjôé e tele yôp été, nje j’aye bo si nyô Paradis. Bemvôé be Zambe ba kate bôt befe mbamba foé y’Éjôé Zambe te.​—Matthieu 24:14.

Bengaa be Yéhova ba jeñ na be bo bemvôé be Zambe. Ba semé Kalate Zambe a ba nye’esan. Ba belan a wumulu jôé Zambe, be ye’ele fe bôt befe mam y’Éjôé Zambe. Bengaa be Yéhova mbe ba kañe Yéhova nya nkañane.