Ye wo nye’e wo wô’ô mbamba mefoé? Bi ne meva’a ya kate wo na, mbamba foé a ne asu dôé a bôte wo nye’e.

Bia koone mbamba foé ate e Bible, nnye ate Yéhôva Zambe, Nté ya biôm bise a nga bo na be tili, den a nto ayab éyoñ. E kalate nyi, bia zu dañe kobô ajô bekalate benyin ya Kalate Zambe be bili mbamba mefoé asu môt ase ya be bia. Be bili biyôlé bi bôte Zambe a nga top na be tili be: Matthieu, Marc, Luc, a Jean.

Abui bôt da loone bekalate bete na, bekalate benyin ba kañete ényiñe Yésus. Bekalate bete be bili mbamba foé a lat a Yésus, nnye ate a ne zene Zambe a nga belane je asu na a kôté bone be bôt; a aval ane Njôô ya Éjôé Zambe, a ye so mbamba be mame ya nnôm éto asu ba bese ba buni nye.​—Marc 10:17, 30; 13:13.

Mi ne sili miabebien na, amu jé Zambe a nga bo na be tili bekalate benyin ba kañete ényiñ a miñye’elane mi Yésus?

Jam ete é ne nya mfii. Bi tame nyoñ éve’an: Tame simesane na bôte benyin be to fefele beta ñye’ele. Nyi a tele nye ôsu a ne masa ya wofise ba nyoñe taxe. Nyô a to nye mbo nnôm a ne dokita. Nyô a nto nye mbo ngal a ne ñyobe kos, a ne fe beta mvôé ñye’ele. Nyi nyini a tele mvus, nnye a dañe mongô, a to a fombô’ô be. Bese benyin be ne bezôsô be bôt, a be nji yene mam avale da. Éyoñe ba ye kañete mame beta ñye’ele ate a nga jô a ma a nga bo, ba ye ke ngôné avale mame da. Éyoñe bia ye lañe bekalate bete benyin, bia ye yeme mone jam ase beta ñye’ele ate a nga jô, a ma a nga bo. Éve’ane ji ja kôme fo’o liti bia mfi ya bi bekalate benyin ba kañete ényiñe Yésus, Beta Ñye’ele.

Bi tame ke éve’an ôsu: Masa ya wofise ba nyoñe taxe a dañe kobô Bejuif, ajô te, a dañe ngôné miñye’elan mia ye nambe be. Dokita ki nye a kobô ajô nsaan akon a miñyeyem, teke dañe ngôné mam méziñ masa ya wofise ba nyoñe taxe  a te tili nkañete wé. Beta mvôé wé ki a dañe ngôné mbamba mefulu beta ñye’ele a bili. Nkañete nyô a dañe mongô wo ye bo étun. Ve minkañete miap mise mi ne betotyi. Nde, e bi bekalate benyin ba kañete ényiñe Yésus a volô bia na, bi tu’a yem miñye’elane mié, ésaé a nga bo, a avale môt a mbe.

Bi wô’ô wô’ô bôte be jô’ô na, ‘Mbamba foé Matthieu’ nge na, ‘Mbamba foé Jean.’ Bi vo’o sôane be amu, bekalate bete bese be bili “mbamba foé a lat a Yésus Krist.” (Marc 1:1) Ve éyoñe bia kôme fombô, bia yene na, mbamba foé a lat a Yésus a ne ve wuwua, a bia koone foé éte bekalate benyin bete.

Abui beyé’é Kalate Zambe é nga ve’e minkañete bia koene mie kalate Matthieu, Marc, Luc a Jean. Wua y’été a ne mone Syrien ba loene na, Tatian; a nga bo ésaé te zia mimbu 170 É.J. A nga yene na, minkañete mi ne bekalate bete benyin mi ne betotyi, a mia so be Zambe; nde a nga bamane bekalate bete bese na be bo ve nkañete wua a nga loene na, Diatessaron.

Kalate, Yésus: Zen, benya mejôô, ényiñ a ne fe avale da, ve a selane nyô mbok amu a ne totyi, a bili fe minkañete mise. Jam ete e ne ngule ya boban amu bi nga tu’a wô’ô aval avé minkulane mejô mi Yésus a minkana a nga kan mi nga tôéban. Nalé a volô na, bi kôme wô’ô mam a nga jô a ma a nga bo, a éyoñ évé mam mete me nga boban. Minnôm mi biôm be nga koone mie, mi nga volô fe na bi kôme yeme mam méziñ, a jam betili be mbe be kômbô’ô ngôné. Bi vo’o yemete na, bia kôme yem éyoñe mam mete mese me nga boban. Ve minkañete mi ne kalate Yésus: Zen, benya mejôô, ényiñ mi ne betotyi.

Nté wo lañe kalate nyi, jeñe’e na ô ba’ale foé é ne mfi asu dôé a bôte wo nye’e. Simesa’ane jame Yésus Krist émien a nga jô Thomas: “Ma me ne zen, me ne fe benya mejôô, a ényiñ: teke môt a zu be Tate, ve amu ma.”​—Jean 14:6.

Kalate, Yésus: Zen, benya mejôô, ényiñ a ye volô wo na, ô kôme tu’a yeme na, Yésus nnye a ne “zen.” A ne fo’o ve a zene jé nje ô ne subu Yéhôva Zambe bebé meye’elan été. A fe na, Yésus a ne zene ja volô wo na, ô beta late ngbwa a Zambe. Nde fe, ô ne bi mbamba élat a Zambe fo’o ve a zene ya be Yésus.

Yésus a ne “benya mejôô.” A mbe a kobô’ô benya mejôô a tôñe’e fe me ényiñe jé; bi ne fo’o jô na Yésus nnye a nga liti bôte jé é ne benya mejôô. Abui minkulane mejô e nga tôébane be nye, mi nga bo “yaa be nye.” (2 Becorinthien 1:20; Jean 1:14) Minkulane mejô mite mia volô bia na, bi yem beta ésaé Yésus a mbe a bili a lat a nsôñane Zambe.​—Nlitan 19:10.

A Yésus a ne “ényiñ.” A zene ya ntañ, a nga ve bia ényiñe jé é mbe te nsem, a fane ya bi ‘nya ényiñi,’ “ényiñ ya melu mese.” (1 Timothée 6:12, 19; Beéphésien 1:7; 1 Jean 1:7) A ye fe liti na a ne “ényiñ,” asu bemillion be bôt ba ye wômô a ndi nleme ya nyiñe Paradis nnôm éto.​—Jean 5:28, 29.

Bia bese bia yiane kôme yeme beta ésaé Yésus a bili a lat a nsôñane Zambe. Ajô te, kele’ ôsu a tu’a yeme Yésus: “zen, benya mejôô, a ényiñ.”