Bia nyiñ émo bôte ba loene mvaé na abé a abé na mvaé. (És 5:20) Mbia ajô a ne na, abui bôt da bo mam Yéhôva a vini aval ane mvine mame ya bisôk zañe befam befam nge ke binga binga. Bongô be sikôlô a bôte befe be ne jeñe na be tindi bisoé Bekristen na bi tôñe mbia mboane wop. Aval avé ô ne volô bone bôé na be bo teke ku avale meve’ele ete?

Yañele’e benyo bon a zene ya miñye’elane ya Kalate Zambe. (Lv 18:3) Ôte’ete’e ôte’etek, ye’ele’e be jôme Kalate Zambe a jô a lat a mvine mame ya bisôk. Mam wo ye’ele be ma yiane lu’an a akala dap. (Dt 6:7) Sili’i womiene na: ‘Ye me volôya fo’o bone bam na be bi mbamba ñyenan mam a lat a avale ba yiane liti nye’an, avale ba yiane jaé biyé bi ne éjijin, a na bôte bevok ba yiane semé bibua bi nyule biap bi ne nsolan? Ye bone bam ba yem jam ba yiane bo nge môt éziñ a kômbô be liti pornographie nge jô be na be bo jam e ne abé mise me Yéhôva? Nge bia taté ye’ele be mam mete, ba ye kui na be sa’ale abui minjuk. (Min 27:12; Éc 7:12) Éyoñ wo nyoñ éyoñe ya ye’ele bone bôé aval ete, wo liti ne fômelé na wo nyane édima élik Yéhôva a nga ve wo.​—Bs 127:3.

YENE’E VIDÉO A NE NLÔ AJÔ NA, LÔÑE’E NDA JA YE LIBI: BA’ALE’E BONE BÔÉ MFA’A YA “MAM ME NE ABÉ,” MVUSE YA VALÉ, YALA’ANE MINSILI MI:

• Jé ja bo na bôte béziñ be kate kobô bone bap ajô mam befam a binga?

• Amu jé bebiaé ba yiane ve bone bap “nleban a ñye’elan bia so be” Yéhôva?​—Beép 6:4, Mfefé Nkôñelan.

• Bikpwelé bivé ékôane Yéhôva é kuliya mfa’a ya volô bebiaé na be yeme ye’ele bone bap ajô mame befam a binga?​—w19.05 af. 12, nka’ale

• Amu jé wo yiane bo mbane ya laan a benyo bon ôsusua na ba tebe mbia été?