Bengaa be Yéhôva ba volô bôt a ye’ele be Bible mesi a lôte 200. Ve mesi 35 étam mme ma bi abim mimvean e ne jalé miñyiane miap. Nne ñhe ba jalé miñyiane ya mesi mevok aya?

 Tin ékôan ja fase miñyiane ya nsisime Bengaa be Yéhôva ya si se, a ésaé ése ba bo. Ba kôme bo sito’o ya moné ase bia bi a kabe nye avale da yian. Bebéthel ya mesi ba bo abui mimvean ba lôme moné a bu’u be asu mesi me ne azoé. Bia vu Bekristene ya ntete mimbu ôsu, mbe bete be mbe be vola’an asu na môt ase a bi “abime da.” (2 Becorinthien 8:14) Be mbe be bela’ane biôm bi mbe bi bu’u be, asu na be volô Bekristen be nji be be bili mfañe jôm.

 Bobejañe ba nyiñe mesi me ne azoé ba yene nta’ane mam ete aya? Bi tame taté kobô ajô Tanzanie; bôt abui ya wôé ba bi ki toyini ébaé môs. Bi nga belane moné a so mesi mefe na bi kôm Aba Éjôé ya akônda ya Mafinga. Bobejañe ya akônda ete be nga tili na: “Nté ane ésaé éte é nga man, bizu’u bi bôt bia tabe bisulan! Bia ve Yéhôva a bobejañe ya si se akiba amu be ne mvam. Mvam éte ja bo na bi bu’ubane mbamba vôme ya kañe Yéhôva.”

 Bobejañe béziñe ya Sri Lanka be nga ye wu zaé étome COVID-19. Imara Fernando ba mone ndômane wé Enosh be mbe nsamba ôte. Ve mimveane mi nga so mesi mefe mi nga volô be na be jalé miñyiane miap. Ane be nga nyoñe nkôs a afep a tili mejô ma: “Bia ve bobejañe bese be nga volô bia angôndô ya abui akiba. Bia wô’ô mvaé ya bo bibu’a ya beta nda bôte Yéhôva, a bia ke ôsu a ye’elane na Yéhôva émien a su’u bobejañ mbia biyoñe ya asu’ulane bi.”

 Bobejañe be kusa nyiñe si fé, bese be ne évak ya kabe biôm be bili. Enosh émiene fe a nga kôme mone caisse asu na a bo a futi’i moné été, ndemben nye’e fe a volô bobejañe ba tôbane minjuk. Guadalupe Álvarez fe a nga liti fulu akap. A nyiñe vôm éziñe Mexico, wôé tyôtyoé bôt étame mbe be bili moné amane ngon. Ve a bo mimvean, a ve abim ase a ne ngule ya ve. A jô na: “Ma ve Yéhôva akiba amu mvame jé a nye’ane wé ô ne mban. Ma yeme na to’o ma ve tañ aya, moné ate a ke fulan a nyi bobejañe befe, a a ne ngule ya volô ba ba tôbane minjuk.”

 Bebéthel ba lôme bobejañe ya mesi me ne azoé moné ba wô’ô mvaé ya bo de. Anthony Carvalho a ne ébu’a wo Wofise ya Béthel ya Brésil, a jô na: “Bi nga bo abui mimbu bi bii’ mvolane wo so mesi mefe. Mvolan ôte ô nga bo na abui bôt e nyiin ékôane Yéhôva Brésil. Den, mam me tyendéya, bia fe bi mbili ôbe’ebe’e moné, a bi nto ngule ya volô bôte bevok. Bobejañe ya va ba yeme na mbamba foé a yiane kañetebane si se, a ba jeñ a ngul ése na be’efe be su’u ésaé éte.”

 Aval avé Bengaa be Yéhôva be ne yeme su’u bobejañe bap be tele minju’u été? Te mia lôme wofise ya ngume si moné, ve futa’ané nye nkop ô ne asu ésaé ja bobane si se. Bia koone je meba m’Éjôé, ve bi ne fe bo mimveane mite a zene ya donate.dan124.com. Bia ve mia angôndô ya abui akiba amu mimveane mite mise.