Bi too ndi na mame mese ma ye wulu mvô’é asu bia bese mbu 2023 wo taté wu, a asu menda me bôt mangan. Amu mbé a ve bia ndi éte?

 Kalate Zambe a kate bia mbamba fôé, na minju’u mise bia tôbane mie den, mi ne ve asu mon étun éyoñe, amu minju’u mite mia zu mane ana’ana . É ne ntilan Kalate Beromain na “Amu mame mese me nga tilibane melu mvus, me nga tiliban asu na bi bi ñye’elan, ndemben. . . A zene ya mvolane minlem ya mintilan, bi ne bi ndi nlem.”​—Beromain 15:4.

•   Nge wo kômbô tua wô’ô bengagakaa ya Kalate Zambe, lañe nlô ajô ô ne na “Nyaa ndi nlem asu melu ma zu.”

 Ndi nlem Kalate Zambe a ve é ne ane “atyi étyé asu ényiñ.” (Behébreu 6:19, atone) Ndi nlem éte é ne volô bia na bi tebe ne bip. Ndi nlem éte ja volô fe bia mfa’a ya minju’u bia tôbane mie éyoñe ji, ndemben bi bo te sili mo si mboone ôte wo ye so bia nya mvô’é . Éve’an :

•   Bi tame zu yen ane ndi nlem ya Kalate Zambe é nga volô môjan éziñ. Yene’e vidéo nyu: Me mbe teke beta jibi fatan ényiñ jam.

•   Bi tame yen aval ndi nlem Kalate Zambe a ve é ne volô bia éyoñ môte bia nye’e a wu. Yene vidéo nyu: Mvolan asu ba be ne minlem ntyi’an.

 Bôt abui ba kañese na mbamba be mame ba ye boban, ve be bili bisô nlem mfa’a ya ndi nlem jap . Ôsimesane wop wo luane ki a bengaka’a ya Kalate Zambe . Amu jé? Amu na bengaka’a ya Kalate Zambe ba so be Yéhôva  a émien, “nnye a se ngule ya laane minsos.” (Tite 1:2) Yéhôva étam nnye a bili ngule ya tôé minsoñane mié mise ; nnye étam a ne bo “jam ése.”​—Besam 135:5, 6.

 Bia bañete mia a ayoñ ése na mi bu’uban ndi nlem Kalate Zambe a ve, mi ne bi ndi nlem éte éyoñe mia ‘vune Mintilane môs ane môs.’ (Mam 17:11) Bia bañete mia na miabebien mi kañese ayé’é Kalate Zambe é ne zezé. Tata’ané mbu 2023 a ndi nlem !